وتاندىق حيپ-حوپ يندۋستريانىڭ تالانتتى وكىلدەرىن ءبىر شىعارماشىلىق الاڭدا توعىستىرعان «جىر الىبى – جامبىل» رەسپۋبليكالىق فەستيۆالى ءوز مارەسىنە جەتتى. جامبىلدىڭ 175 جىلدىعىنا ارنالعان جاڭا فەستيۆال زاماناۋي فورماتتا وتكىزىلدى. فەستيۆالگە جامبىل اقىننىڭ مۇراسىنان قۋات العان جاس مۋزىكانتتار قاتىستى. Instagram, YouTube, Facebook الەۋمەتتىك جەلىلەرى ارقىلى ىرىكتەلگەن قاتىسۋشىلار ونەرلەرىن جوعارى دارەجەدە كورسەتە ءبىلدى. جاس تالاناتتاردىڭ ارتيستىك شەبەرلىگى, ءسوز ساپتاۋى, ۆوكالدىق قابىلەتتەرى ونەر سۇيەر قاۋىمنىڭ زور ىقىلاسىنا بولەندى.
قاتىسۋشىلار اراسىندا قازاقستان حالقى اسسامبلەياسىنىڭ ەتنومادەني بىرلەستىكتەرىنىڭ وكىلدەرى: ورىس, بەلورۋس, وزبەك, ۇيعىر جانە باسقا ەتنوستار بولدى. ولاردىڭ بارلىعى رەپ جانە ءان پارتيالارىن قازاقشا ورىندادى.
فەستيۆال قر مادەنيەت جانە سپورت مينيسترلىگىنىڭ ۇيىمداستىرۋىمەن ءوتتى. بۇل فەستيۆالدىڭ ماقساتى – جامبىلدىڭ مۇراسىن ناسيحاتتاي وتىرىپ, جاس تالانتتاردى قولداۋ, ەل ايماقتارىنىڭ ءوزارا شىعارماشىلىق بايلانىسىن نىعايتۋ. ۇيىمداستىرۋشىلاردىڭ ايتۋىنشا, جامبىلدىڭ مۇراسىن جاستار اراسىندا تانىمال ەتۋ, جامبىل قالدىرعان وسيەتتەردى وسكەلەڭ ۇرپاقتىڭ ساناسىنا ءسىڭىرۋ وتە ماڭىزدى. ەلىمىزدىڭ تۇكپىر-تۇكپىرىنەن كەلىپ, جوباعا قاتىسۋشى جاستار مول تاجىريبە جيناعاندارىن جەتكىزدى. سولاردىڭ ءبىرى – قوستاناي قالاسىنان كەلگەن دەنيس ياكوۆلەۆ. ول جامبىلدىڭ «ۋگاي-اي» ءانىن دومبىرامەن ورىندادى.
«جامبىلدىڭ زامانىندا اقىندار ايتىسى كەڭىنەن تاراسا, قازىر جاستار اراسىندا ايتىستىڭ جاڭا فورماسى- رەپ-باتتل تانىمال. فەستيۆال جاس ۇرپاقتىڭ جامبىل جىرلارىنا دەگەن جاڭاشا كوزقاراسىن جەتكىزدى», دەدى دەنيس. جوبا اياسىندا جاستار اراسىندا تانىمال Kyle Ruh, Ziruza, Ray, Nei1tron, Madi Rymbaev, Soulbirkez, Esko سىندى جاس ارتىستەر ونەر كورسەتىپ, ونەردەگى ەرەكشە جەتىستىكتەرىمەن ءبولىستى. ونەر جولىندا تاجىريبە جيناپ ۇلگەرگەن Kyle Ruh ەسىمىمەن بەلگىلى ءانشى ەرىك تولەنوۆ ۇلى اقىننىڭ جىرلارى ءالى كۇنگە دەيىن وزەكتى ەكەندىگىن ايتتى.
«جامبىل اتامىز جىرلاعان ماڭىزدى تاقىرىپتاردى بۇگىندە جاس رەپەرلەر ايتىپ ءجۇر. ءبىز جامبىلدىڭ مۇراسىنان شابىت الىپ, جاستار اراسىندا تانىمال بولاتىن زاماناۋي تۋىندىلاردى ۇسىنامىز», دەپ جەتكىزدى جاس ءارتىس.
فەستيۆال الماتى قالاسىندا ءو.جولداسبەكوۆ اتىنداعى ستۋدەنتتەر سارايىندا ەكسكليۋزيۆتى جاڭا تۋىندىلار ورىندالعان ۇلكەن گالا-كونتسەرتپەن اياقتالدى.
