«2022 جىلى سوزىلمالى بۇيرەك اۋرۋى بار ناۋقاستاردىڭ ساتىلارى بويىنشا رەگيسترىن قۇرۋ ماسەلەسى پىسىقتالۋدا, بۇل پاتسيەنتتەرگە مونيتورينگتى كۇشەيتۋگە جانە ءتيىستى شارالار قابىلداپ, كورسەتىلەتىن مەديتسينالىق كومەكتىڭ كولەمى مەن ساپاسىنا ءتيىستى تالداۋ جۇرگىزۋگە مۇمكىندىك بەرەدى. قارسى كورسەتىلىمدەرى جوق پاتسيەنتتەر ترانسپلانتتاۋدى كۇتۋ پاراعىندا تۇر», دەپ جازدى ەرالى توعجانوۆ دەپۋتات ساۋالىنا بەرگەن جاۋابىندا.
ونىڭ ايتۋىنشا, بۇيرەك ترانسپلانتاتسياسىن كۇتەتىن پاتسيەنتتەر جىل سايىن ارتىپ كەلەدى (2019 جىلى – 2706, 2021 جىلدىڭ 9 ايىندا – 3025). بۇل رەتتە 2019 جىلى – 136, 2020 جىلى – 77, 2021 جىلدىڭ 9 ايىندا-97 ترانسپلانتتاۋ جۇرگىزىلگەن.
«ترانسپلانتاتسياعا پاتسيەنتتەر كەزەگىن تومەندەتۋ ءۇشىن قازاقستان رەسپۋبليكاسىندا 2022-2025 جىلدارعا ارنالعان ورگان دونورلىعى مەن ترانسپلانتولوگيانى دامىتۋ تۇجىرىمداماسىندا 2022 جىلدان باستاپ ءاربىر وبلىس ورتالىعىندا كوپبەيىندى ستاتسيونارلار بازاسىندا وڭىرلىك ترانسپلانتاتسيا ورتالىقتارىن اشۋ كوزدەلگەن. وندا تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە بۇيرەكتى اۋىستىرۋ بويىنشا وپەراتسيالار جاساۋ جوسپارلانىپ وتىر. نەفرولوگيالىق بەيىندەگى پاتسيەنتتەردى مەديتسينالىق وڭالتۋ امبۋلاتوريالىق دەڭگەيدە اقۋىز-ەنەرگەتيكالىق جەتىسپەۋشىلىكتى دارىمەن تۇزەۋدەن تۇرادى. گەمودياليزدەگى گيپەرفوسفاتەميانىڭ الدىن الۋ ءۇشىن «سەۆەلامەر« پرەپاراتىمەن تەگىن قامتىلادى», دەپ اتاپ ءوتتى پرەمەر-ءمينيستردىڭ ورىنباسارى.
«سونىمەن بىرگە, قازىرگى ۋاقىتتا «ساليدات قايىربەكوۆا اتىنداعى دەنساۋلىق ساقتاۋدى دامىتۋ ۇلتتىق عىلىمي ورتالىعى» شجق رمك «كەتوستەريل» پرەپاراتىن قازاقستاندىق ۇلتتىق دارىلىك فورمۋليارعا ەنگىزۋ جونىندە كاسىبي ساراپتاما جۇرگىزىپ, كەيىننەن پرەپاراتتى امبۋلاتوريالىق دەڭگەيدە تەگىن بەرەتىن دارىلىك زاتتار تىزبەسىنە ەنگىزەدى», دەدى ول.
