الەم • 20 قاراشا, 2021

كانادادا COVID-19-عا قارسى ۆاكتسينانى 5 جاستان باستاپ سالۋعا رۇقسات بەرىلدى

334 رەت

كورسەتىلدى

1 مين

وقۋ ءۇشىن

كانادا 5-11 جاستاعى بالالارعا كوروناۆيرۋسقا قارسى Pfizer-Biotech ۆاكتسيناسىن سالۋعا رۇقسات بەردى. بۇل تۋرالى كانادانىڭ دەنساۋلىق ساقتاۋ دەپارتامەنتى مالىمدەدى, دەپ حابارلايدى Egemen.kz.

گاۋھار قاپاش

كانادادا COVID-19-عا قارسى ۆاكتسينانى 5 جاستان باستاپ سالۋعا رۇقسات بەرىلدى

ۆەدومستۆو 5 جاستان 11 جاسقا دەيىنگى بالالارعا Pfizer-Biotech شىعارعان COVID-19-عا قارسى Comirnaty ۆاكتسيناسىن قولدانۋعا رۇقسات بەردى. كومپانيا وكىلدەرى دەپارتامەنتكە ءوتىنىمىن 18 قازاندا جىبەرگەنىن ايتا كەتكەن ءجون.

«قولدا بار دالەلدەرگە بۇگە-شۇگەسىنە دەيىن تاۋەلسىز عىلىمي تالداۋ جۇرگىزىلگەننەن كەيىن دەپارتامەنت بۇل ۆاكتسينانىڭ 5-11 جاستاعى بالالارعا پايداسى قاۋىپتەن اسىپ تۇسەدى دەگەن قورىتىندىعا كەلدى», دەلىنگەن حابارلامادا.

بۇل رەتتە, بالالار دوزاسى ەرەسەكتەردەن ءۇش ەسە از بولادى (30 ورنىنا 10 ميكروگرامم). پەدياتريالىق ۆاكتسينانى ەكى رەت ەگۋ كەرەك. بۇعان دەيىن كانادادا ۆاكتسينا 12 جاستان اسقان بالالارعا عانا قولدانىلىپ كەلدى.

«كلينيكالىق زەرتتەۋلەر 5-11 جاستاعى بالالارداعى يممۋندىق رەاكتسيا 16-25 جاستاعىلاردىڭ يممۋندىق رەاكتسياسىمەن بىردەي ەكەنىن كورسەتتى. ۆاكتسينا 5-11 جاستاعى بالالارعا 90,7 پايىز ءتيىمدى جانە ونىڭ ەشقانداي اۋىر جاناما اسەرى جوق», دەدى ۆەدومستۆو وكىلدەرى.

ايتا كەتەيىك, قازىرگى ۋاقىتتا 12 جاستان اسقان كانادالىقتاردىڭ 85 پايىزدان كوبى COVID-19-عا قارسى ۆاكتسينانىڭ ەكى دوزاسىن العان. سوڭعى اپتالاردا ينفەكتسيانىڭ جاڭا جاعدايلارى كوبىنە ەكپە الماعان 12 جاسقا دەيىنگى بالالاردا تىركەلىپ جاتقانى حابارلاندى.