ۆەدومستۆونىڭ مالىمەتىنشە, ۆاكتسينا اقمولا وبلىسىنداعى -80-90 گرادۋس تەمپەراتۋرا ارالىعىندا جۇمىس ىستەيتىن 2 توڭازىتقىش كامەراسىنا ورنالاستىرىلدى.
ودان بولەك, 1 دانا اۆتورەفرەجيتور جاڭادان ساتىپ الىندى. قۇرىلعى مينۋس جانە پليۋس كەز-كەلگەن تەمپەراتۋرادا قالىپتى جۇمىس ىستەيدى.
«الداعى دۇيسەنبىدەن باستاپ ۆاكتسينا وزگە ايماقتارعا تاسىمالداناتىن بولادى. اتالعان ۆاكتسينامەن, ەڭ الدىمەن بالالار, 12-17 جاس ارالىعىنداعى جاسوسپىرىمدەر مەن جۇكتى ايەلدەرگە (16-37 اپتاداعى جۇكتىلىك مەرزىمىندەگى اياعى اۋىر كەلىنشەكتەرگە), بوسانعانىنا 42 كۇن تولعان بالا ەمىزەتىن انالارعا سالىناتىن بولادى», دەدى ۆەدومستۆودان.
قازىرگى تاڭدا اقمولا وبلىسى اۋداندىق اۋرۋحانالار ەكپە ماۋسىمىنا دايىن.
«مەديتسينالىق ۇيىمدار, مەكتەپتەر, مەديتسينالىق قىزمەتكەرلەر ارنايى ادىستەمەلىك دايارلىقتان ءوتىپ, تولىق اتتەستاتسيالاندى. ەكپە ەگۋ جۇمىستارىنا رۇقسات الدى. ءدال وسى ساتتە اتا-انالاردىڭ كەلىسىمىن الۋ ءۇشىن اقپاراتتاندىرۋ جۇرگىزىلىپ جاتىر. اۋدانداردا تۇسىندىرمە جۇمىستارى قارقىندى جۇرۋدە. وعان جاۋاپتى ارنايى ماماندار بەكىتىلدى. ەكپە ەگەتىن بريگادالار جۇمىسقا كىرىسۋگە ءازىر», دەپ تولىقتىردى ۆەدومستۆودان.
