مادەنيەت جانە سپورت مينيسترلىگىنىڭ باستاماسىمەن قانات قاققان جوبا ەل ايماقتارىنان كەلگەن جيىرماعا تارتا جاس مۋزىكانتتى الماتىعا شاقىردى. ولاردىڭ ىشىندە جەكە ورىنداۋشىلارمەن قاتار ونەر توپتارى دا بار. ونەرگە ەندى قادام باسقان جاس مۋزىكانتتار «جىر الىبى – جامبىل» رەسپۋبليكالىق فەستيۆالىندە ونەر كورسەتىپ, كوپشىلىكتىڭ العىسىنا بولەندى. اقىن تۋعان مەكەنگە اڭسارى اۋىپ كەلگەن جەتكىنشەكتەر ەڭ الدىمەن دوستىق داڭعىلىنىڭ بويىنداعى جامبىل اتا ەسكەرتكىشىنە گۇل شوقتارىن قويىپ, رۋحىنا تاعزىم ەتتى.
– جاڭا جوبا وتاندىق حيپ-حوپ يندۋستريانىڭ ەڭ ۇزدىك تالانتتى وكىلدەرىن ءبىر شىعارماشىلىق الاڭدا توعىستىرىپ وتىر. قاتىسۋشىلار Instagram, YouTube, Facebook الەۋمەتتىك جەلىلەرى ارقىلى ىرىكتەلدى. ىرىكتەۋ كەزىندە ونەرپازداردىڭ ارتىستىك شەبەرلىگىنە, ءسوز ساپتاۋىنا, ءماتىن يدەياسىنىڭ ەرەكشەلىگىنە, ۆوكالدىق قابىلەتتەرىنە باسا ءمان بەرىلدى. قاتىسۋشىلار اراسىندا قازاقستان حالقى اسسامبلەياسىنىڭ ەتنومادەني بىرلەستىكتەرى وكىلدەرى: ورىس, بەلورۋس, وزبەك, ۇيعىر جانە باسقا ەتنوستار بار. جوبانىڭ ماقساتى – جامبىل مۇراسىن ناسيحاتتاي وتىرىپ, جاس تالانتتاردى قولداۋ ءارى ەل ايماقتارى اراسىندا كاسىبي-شىعارماشىلىق بايلانىستى نىعايتۋ. باسقا وڭىرلەردەن كەلگەن جاستار ءۇشىن الاتاۋ باۋرايى جامبىل اقىن تۋعان مەكەن رەتىندە ىستىق. سوندىقتان فەستيۆال قاتىسۋشىلارىن اقىن ەسكەرتكىشىنە اكەلدىك, – دەيدى جوبانى ۇيلەستىرۋشىلەردىڭ ءبىرى ساۋلە يسابەكوۆا.
ۇيىمداستىرۋشىلاردىڭ ايتۋىنشا, كەزىندە جامبىل جىرلاعان وزەكتى تاقىرىپتاردى بۇگىندە قازاقستاندىق جاس رەپەرلەر كوتەرىپ, جاڭا فورماتتا ۇسىنۋدا. سوندىقتان اقىننىڭ تۋىندىلارى ءالى كۇنگە دەيىن وزەكتىلىگىن جوعالتپادى. جوبا اياسىندا جاستار اراسىندا تانىمال Kyle Ruh, Ziruza, Ray, Nei1tron, Madi Rymbaev, Soulbirkez, Esko سىندى جاستار ونەر كورسەتىپ, ونەردەگى ءوز جەتىستىكتەرىمەن ءبولىستى.
حالىق پوەزياسىنداعى جاڭا ورلەۋ جامبىل پوەزياسىمەن تىعىز بايلانىستى. الماتىدا اقىن شىعارماشىلىعىنا جاستاردىڭ ىنتاسىن وياتىپ, قىزىعۋشىلىعىن ارتتىرۋدى, جىر الىبىنىڭ باعا جەتپەس ۇلتتىق مۇراسى ارقىلى حالىقتىڭ رۋحاني دەڭگەيىن دامىتۋدى كوزدەگەن اۋقىمدى جوبالار جىل باسىنان بەرى جالعاسۋدا. ونەر وكىلدەرىنىڭ قاتىسۋىمەن ۇلى اقىننىڭ تۋىندىلارىن مۋزىكالىق-پوەتيكالىق جانە تەاترلاندىرىلعان ءىس-شارالار فورماتىندا ۇسىنعان جوبالار كوپشىلىكتىڭ ىقىلاسىنا بولەندى.
ايتالىق, ءا. قاستەەۆ اتىنداعى ونەر مۋزەيىندە «باقىت تۋرالى جىر» اتتى مەرەيتويلىق كورمە ەسىك اشىپ, عيبراتتى عۇمىر يەسىنىڭ ءومىر ورنەگىنەن سىر شەرتەتىن كورمەگە ونەر مۋزەيىنىڭ قورىندا ساقتالعان 30-دان استام كەسكىندەمەلىك, گرافيكالىق جانە مۇسىندىك تۋىندىلار قويىلعان بولاتىن. سونىمەن بىرگە اقىن ەسىمىن يەمدەنگەن جامبىل اتىنداعى قازاق مەملەكەتتىك فيلارمونياسىنىڭ باستاماسىمەن بىرقاتار اۋقىمدى ءىس-شارالار كەڭ ءورىس تاپتى.
