مىسالى, 16 قاراشا كۇنى وبلىستا كوروناۆيرۋس ينفەكتسياسىن 7 تۇرعىن جۇقتىرعانى تىركەلىپ وتىر. ونىڭ التاۋى ەكپە سالدىرماعاندار. اۋىرعانداردىڭ كوبى ۆيرۋس جۇقتىرعان اداممەن قارىم-قاتىناستا بولعاندار اراسىنان شىعىپ وتىر.
وسى كۇنى وبلىس «جاسىل ايماقتا» تۇر. بىراق ماماندار تۇرعىنداردىڭ وسىعان مالدانىپ, قاۋىپسىزدىك شارالارىن ۇمىتىپ كەتپەۋى كەرەكتىگىن ءجيى ايتادى. ىندەتتىڭ تارالۋىنىڭ الدىن الۋ ءۇشىن كارانتين تالاپتارىنىڭ ساقتالۋىنا مونيتورينگ جۇرگىزۋ تولاستاعان ەمەس. جىل باسىنان بەرى 15 826 نىسانعا رەيد جاسالدى. ونىڭ بارىسىندا كارانتين تالاپتارىن بۇزۋدىڭ 802 دەرەگى انىقتالىپ, 52 ملن تەڭگەدەن استام اكىمشىلىك ايىپپۇل سالىندى.
– وبلىس كولەمىندە Ashyq جۇيەسى بويىنشا وقشاۋلانۋ ءتارتىبىن بۇزعان 1 150 ازامات انىقتالدى. ولاردىڭ 741-ءى «قىزىل», 409-ى «سارى» ستاتۋستا بولعان. جان-جاعىنا ىندەت جۇقتىراتىنىن بىلە تۇرا, كارانتين تالابىن ساقتاماعان «قىزىل» ستاتۋستاعىلاردىڭ 246-سىنا اكىمشىلىك حاتتاما تولتىرىلىپ, ولار 10 ملن تەڭگەدەن استام ايىپپۇل ارقالادى, – دەيدى وبلىستىق سانيتارلىق-ەپيدەميالىق باقىلاۋ دەپارتامەنتى باسشىسىنىڭ ورىنباسارى ءاليا ابدىقايىموۆا.
ۆاكتسينالاۋ كورسەتكىشى بويىنشا قىزىلوردا وبلىسى رەسپۋبليكادا ءتورتىنشى ورىندا تۇر. ايماققا «كوميرناتي» ۆاكتسيناسىنىڭ 23 400 دوزاسى كەلدى, الدا ونى 97 مىڭعا جەتكىزۋ جوسپارلانىپ وتىر. العاشقى لەكتە بۇل ۆاكتسينا 72 ادامعا ەگىلدى.
قىزىلوردا وبلىسى
