ءبىرىنشى ءبولىم, ياعني اسسەسسمەنت-ورتالىق 25 قازان مەن 15 قاراشا ارالىعىندا وتكىزىلدى, وعان 235 ۇمىتكەر جىبەرىلگەن بولاتىن.
قازىرگى ۋاقىتتا اسسەسسمەنت-ورتالىقتىڭ قورىتىندىسى شىعارىلىپ, ونىڭ ناتيجەلەرى بويىنشا ەكىنشى ءبولىم – قۇزىرەتتەر بويىنشا سۇحباتقا 132 ۇمىتكەر ءوتتى.
قۇزىرەتتەر بويىنشا سۇحبات – بۇل قۇرىلىمدالعان سۇحبات ءتۇرى, مۇندا سۇراققا جاۋاپ بەرگەن كەزدە ۇمىتكەر ءوز تاجىريبەسىنەن مىسالدار كەلتىرۋى قاجەت. مۇنداي سۇحباتتا ۇمىتكەردىڭ تەك ءوزى تۋرالى جانە ءوزىنىڭ تاجىريبەسى تۋرالى ايتۋى, ءوزىنىڭ وتكەن ومىرىنەن ناقتى مىسالداردى سيپاتتاۋى قاجەت.
قۇزىرەتتەر بويىنشا سۇحبات 20-28 قاراشا ارالىعىندا كاسىبي HR-مەنەدجەرلەردىڭ قاتىسۋىمەن ونلاين فورماتتا وتكىزىلەتىن بولادى.
«وسى ىرىكتەۋ كەزەڭىنىڭ ەرەكشەلىكتەرى, بىرىنشىدەن, ۇمىتكەردىڭ كاسىبي قۇزىرەتتىلىگىنىڭ دەڭگەيىن انىقتاۋ بولىپ تابىلادى. ەكىنشىدەن, سۇحبات ۇمىتكەردىڭ ناقتى تاجىريبەسىن باعالايدى جانە ۇمىتكەردىڭ ناقتى جاعدايلاردا قالاي ارەكەت ەتەتىنىن ءدال بولجاۋعا مۇمكىندىك بەرەدى. كاسىبي تاۋەلسىز سۇحبات جۇرگىزۋشىلەر كومانداسى ۇمىتكەردىڭ قۇزىرەتىنىڭ دامۋ دەڭگەيىن عانا ەمەس, سونداي-اق ۇمىتكەرلەردىڭ ىنتا-جىگەرى مەن قۇندىلىق باعدارلارىن باعالايتىن بولادى, پاتريوتيزم جانە قازاقستان حالقىنا قىزمەت ەتۋ سياقتى قۇندىلىقتار باسىم بولىپ سانالاتىن ۇمىتكەرلەر ىرىكتەلەدى. سونداي-اق, ءار ۇمىتكەردىڭ ناتيجەلەرى سەرتيفيكاتتالعان HR مەنەدجەرلەرىنىڭ قاتىسۋىمەن تالقىلانادى. وسى بلوكتىڭ ناتيجەلەرى بويىنشا ىرىكتەۋدىڭ كەلەسى بەسىنشى كەزەڭى – ساراپشىلىق كوميسسيادا اڭگىمەلەسۋگە ەڭ ۇزدىك ناتيجە كورسەتكەن 100-دەن اسپايتىن ۇمىتكەر جىبەرىلەدى», دەدى ەرحان تاتكەن.
ىرىكتەۋ قورىتىندىسى بويىنشا 50 ۇمىتكەر رەزەرۆكە الىنادى.
پرەزيدەنتتىك جاستار كادر رەزەرۆىنىڭ ماقساتى - قوعامدىق جانە مەملەكەتتىك مۇددەلەردى باسشىلىققا الاتىن جاس تالانتتاردى انىقتاۋ.
