ء«ۇش جىل ىشىندە تۇسىمدەردىڭ ءوسۋىن ەسكەرە وتىرىپ, الەۋمەتتىك سالاعا ارنالعان شىعىستاردى 30%-عا ۇلعايتۋ جوسپارلانىپ وتىر. جالپى, 2022-2024 جىلدارى الەۋمەتتىك سالاعا 26,7 ترلن تەڭگە بولىنەدى. بۇل قۇرالدار كوپتەگەن الەۋمەتتىك ماسەلەلەردى شەشۋگە مۇمكىندىك بەرەدى. مىسالى, الەۋمەتتىك تولەمدەردى يندەكستەۋ, مۇعالىمدەرگە, دارىگەرلەرگە, بيۋدجەتتەن جالاقى الاتىن باسقا دا قىزمەتكەرلەرگە جالاقىنى كوتەرۋ جانە كوپتەگەن الەۋمەتتىك نىسانداردى سالۋ قاراستىرىلعان», دەدى ماۋلەن اشىمباەۆ سەناتتىڭ جالپى وتىرىسىندا.
ول بۇگىنگى وتىرىستا سەناتورلار بىرقاتار وزەكتى ماسەلەلەردى كوتەرگەنىن اتاپ ءوتتى.
«اتاپ ايتقاندا, اۋىل حالقىن سۋمەن, ينتەرنەتپەن قامتاماسىز ەتۋ, فەلدشەرلىك پۋنكتتەر جەلىسىن كەڭەيتۋ ماسەلەلەرى قوزعالدى. وسىعان بايلانىستى ۇكىمەت مۇشەلەرىنەن دەپۋتاتتار كوتەرگەن بارلىق ماسەلەلەردى ەسكەرۋدى سۇرايمىز. الداعى ءۇش جىلعا ارنالعان رەسپۋبليكالىق بيۋدجەت پارلامەنت قاراعاننان جانە وعان پرەزيدەنت قول قويعاننان كەيىن ەلدىڭ يگىلىگىنە قىزمەت ەتەدى دەپ ۇمىتتەنەمىز. بىزدە مەملەكەت باسشىسى بەلگىلەگەن ماقساتتار بار. ءبىز ولاردى بىرگە جۇزەگە اسىرۋىمىز كەرەك. بۇل جۇمىستا سەنات دەپۋتاتتارى ۇكىمەتكە قاجەتتى قولداۋ كورسەتۋگە دايىن», دەپ تۇيىندەدى سەنات توراعاسى.
بۇگىن پلەنارلىق وتىرىستا «2022-2024 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسى قارالدى. سەنات زاڭ جوباسىنا بىرقاتار تۇزەتۋلەر ەنگىزىپ, ماجىلىسكە قايتارۋ تۋرالى قاۋلى قابىلدادى.
