مەديتسينا • 18 قاراشا، 2021

داۋاسىز دەرتتىڭ انىقتالعانىنا – 40 جىل

156 رەت كورسەتىلدى

بيىل ەلىمىزدەگى دۇنيەجۇزىلىك جيتس-كە قارسى كۇرەس كۇنى 15 قاراشادا الماتىدا «ايتۆ: ارقايسىسىن تىڭدا» ناۋقانىمەن باستالىپ، 15-25 قاراشا ارالىعىندا جەر جەرلەردە وسى ۇرانمەن وتەدى. قاراپ وتىرساق، جيتس دەگەن داۋاسىز دەرتتىڭ انىقتالىپ، العاشقى وقيعالارى تىركەلگەنىنە دە قىرىق جىل وتە شىعىپتى، بىراق ايتۆ ءالى دە جاھاندىق ىندەت بولىپ قالا بەرەدى.

دۇنيەجۇزىلىك جيتس-كە قارسى كۇرەس كۇنى يۋنەيدس جيتس ىندەتىن توقتاتىپ قانا قويماي، حالىقتىڭ نەگىزگى توپتارىنىڭ، ايتۆ-مەن ءومىر سۇرەتىن ادامداردىڭ قۇقىق­تارىن قورعاۋعا، COVID-19 كۇرەستىڭ تيىم­دىلىگىن ارتتىرۋعا جانە ەكونوميكانىڭ قالپىنا كەلۋىن جانە ونىڭ تۇراقتىلىعىن قامتاماسىز ەتۋگە شاقىرادى.

– ايتۆ-مەن ءومىر سۇرەتىن ادامدارعا قاتىس­تى الالاۋ مەن كەمسىتۋشىلىكتى جويۋ، بار­لىق مۇقتاجدى قاجەتتى ءدارى-دارمەك­تەر­مەن جانە قىزمەتتەرمەن قامتاماسىز ەتۋ، ادام قۇقىقتارى مەن گەندەرلىك تەڭ­دىككە نەگىزدەلگەن تاسىلدەردى پايدالانۋ – بۇل ايتۆ جانە COVID-19 پاندەمياسىن توقتاتۋدىڭ باستى شارتتارى، – دەيدى الماتى قالاسى جيتس الدىن الۋ جانە وعان قارسى كۇرەس ورتالىعىنىڭ باس دارىگەرى مارات توكەەۆ.

ناۋقان كۇندەرى الماتى قالالىق جيتس ورتالىعىنىڭ دارىگەرلەرى قوعامداس­تىق­تارمەن جانە ۇكىمەتتىك ەمەس قوعامدىق ۇيىم­­دارمەن بىرلەسىپ، حالىقتىڭ ايتۆ-ينفەك­­تسياسىنىڭ جانە COVID-19 الدىن الۋ شارالارى تۋرالى ءبىلىمىن ارتتىرۋعا باعى­ت­تالعان ءتۇرلى ءىس-شارالار وتكىزەدى. بيز­نەس-قۇرىلىمداردىڭ قىزمەتكەرلەرى ءۇشىن ايتۆ-عا جەدەل تەستىلەۋ وتكىزۋ جانە اقپا­رات­تىق-ءبىلىم بەرۋ ماتەريال­دارىن تاراتۋ ارقىلى اكتسيالار ۇيىمداستىرىلاتىن بولادى.

ءبىلىمدى كۇشەيتۋ، ستيگما مەن ايتۆ-مەن ءومىر سۇرەتىن ادامداردى كەمسىتۋگە جول بەرمەۋ ماقساتىندا جالپى ءبىلىم بەرەتىن مەكتەپتەر مەن كوللەدجدەردىڭ پەداگوگتەرى اراسىندا الەۋمەتتىك جەلىلەردە «توقتا ايتۆ الماتى» حەشتەگىمەن بەينە-ءوتىنىش جاريالاۋ ارقىلى چەللەندج وتەدى.

تەستىلەۋدى تانىمال ەتۋ جانە ايتۆ-نىڭ بەرىلۋ جولدارى تۋرالى حاباردار بولۋدى ارتتىرۋ ءۇشىن جيتس ورتالىعىنىڭ قىز­مەتكەرلەرى دارىگەرلەرگە، پوليتسەيلەرگە، پەدا­گوگتەرگە، اسكەري قىزمەتشىلەرگە، قىلمىستىق-اتقارۋ جۇيەسىنىڭ قىزمەتكەر­لەرىنە، اۋتريچ-قىزمەتكەرلەرىنە ونلاين رەجىمىندە ترەنينگتەر مەن سەمينارلار وت­كىزەدى. س.اسفەن­دياروۆ اتىنداعى قازاق ۇلت­تىق مەديتسينا ۋنيۆەرسيتەتىنىڭ ستۋدەنتتەرى ءۇشىن «ايتۆ جانە ستيگما/ديسكريميناتسيا» ونلاين-پىكىرسايىسى جوسپارلانعان. جيتس ورتا­لىعىنىڭ دارىگەرلەرى قالانىڭ مەديتسي­نالىق ۇيىمدارى زەرتحانالارى­نىڭ قىزمەتكەرلەرى ءۇشىن «ايتۆ-عا الدىن الا تالداۋ كەزەڭىندە تەستىلەۋدىڭ ساپاسىن قام­تاماسىز ەتۋ» تاقى­رىبىندا كەڭەس ۇيىم­داستىرادى.

ايتۆ-مەن ءومىر سۇرەتىن ادامدار ءۇشىن جيتس ورتالىعىنىڭ اۋماعىندا فليۋروماشينانى پايدالانا وتىرىپ، تۋبەركۋلەزگە سكرينينگ، سونداي-اق گەپاتولوگ پەن ونكوماممولوگتىڭ كونسۋلتاتسياسىن وتكىزۋ جوسپارلانىپ وتىر.

جيتس ورتالىعىنىڭ دۇنيەجۇزىلىك ناۋ­­قاندى وتكىزۋ بويىنشا سەرىكتەستەرى ارا­سىندا اكىم­دىك، قوعامدىق دەنساۋلىق باس­قار­ماسى، الماتى قالاسىنىڭ ءبىلىم باسقار­ماسى، ءىىد، قاجك، حالىقارالىق، قوعامدىق ۇكىمەتتىك ەمەس جانە باسقا دا ۇيىمدار بار. مىسالى، 2021 جىلدىڭ 1 قاراشاسىنداعى سوڭعى دەرەكتەرگە سايكەس، الماتى قالالىق جيتس ورتالىعىندا ايتۆ-احۋالدى 3 824
ادام ەسەپتە تۇر. سوڭعى جىلدارى جى­نىس­­تىق جولمەن بەرىلۋدىڭ ءوسۋ تەندەن­تسيا­سى باي­قالدى. 2021 جىلدىڭ ون ايىن­دا جى­نىس­­تىق جولمەن بەرىلۋ ايتۆ-جۇقپا­سىنىڭ جاڭا جاعدايلارىنىڭ 79،3 پايىزىن، پا­رەنتەرالدى ەسىرتكىنى كوك­تامىر ىشىنە قول­دانۋ فاكتورى 15،2 پايىزىن قۇرايدى.

 

الماتى

سوڭعى جاڭالىقتار

اينالما جولدىڭ ازابى

ايماقتار • كەشە

ۇقساس جاڭالىقتار