وتكەن اپتادا وبلىسقا Pfizer ۆاكتسيناسىنىڭ العاشقى 35 100 دوزاسى جەتكىزىلگەن بولاتىن. اتالعان ۆاكتسينا جۇكتى جانە بالا ەمىزىپ جۇرگەن ايەلدەرگە, 12-18 جاس ارالىعىنداعى جاسوپىرىمدەرگە ارنالعان. بۇگىندە ايماقتا اتالعان كاتەگوريادا 120 مىڭعا جۋىق ازامات بار, ونىڭ 85 مىڭدايى – جاسوسپىرىمدەر.
وسكەمەندەگى №1 ەمحانادا مەكتەپ, كوللەدج وقۋشىلارى ءوز ەرىكتەرىمەن, اتا-انالارىنىڭ كەلىسىمىمەن ەكپە الۋعا كەزەككە تۇرعان. ۇزىن سونار كەزەك... ەگۋگە ماشىقتانعان مەدبيكەلەر جاسوسپىرىمدەردى كەزەگىمەن كىرگىزىپ, ىندەتكە قارسى ەگىپ جاتتى. ەككەن سوڭ سۋ تيگىزبەۋ كەرەكتىگىن جانە ەسكەرتىپ وتىردى.
– 15 قاراشادان شىعىس قازاقستان اۋماعىندا 16-18 جاس ارالىعىنداعى بالالارعا ەگۋ جۇمىستارى باستالدى. سونىمەن قاتار Pfizer ۆاكتسيناسى 16-37 اپتا ارالىعىنداعى جۇكتى ايەلدەرگە ەگىلە باستادى. بالا ەمىزىپ جۇرگەن ايەلدەر بوسانعاندارىنا 42 كۇن بولعان سوڭ عانا ەكپە الا الادى. 15 قاراشا كۇنى №1 ەمحانادا 12 ءجاسوسپىرىم ەكپە الدى. ءبارىنىڭ جاعدايى جاقسى, – دەيدى وسكەمەن قالالىق №1 ەمحاناسىنىڭ باس دارىگەرى ايمان بولاتقىزى.
دارىگەرلەردىڭ ايتۋىنشا, اقش پەن يزرايلدە تاجىريبەدەن وتكىزىلگەن Pfizer ۆاكتسيناسى وتە ءتيىمدى, ءارى قاۋىپسىز. كەيبىر مەملەكەتتەردە ەكپەنى 5 جاستاعى بالالارعا دا الىپ جاتقان كورىنەدى. ال قازاقستاندا 12 جاستان باستاپ ەگىلەدى. دەي تۇرعانمەن, دەنساۋلىق ساقتاۋ سالاسىنىڭ ماماندارى العاشىندا 16 جاستان اسقان بالالاردى ۆاكتسينالاۋدى ءجون كورگەن. اتاپ وتەيىك, بالالار جانە جاسوسپىرىمدەرگە ەكپە سالۋ مىندەتتى تۇردە اتا-اناسىنىڭ نەمەسە زاڭدى وكىلدىڭ رۇقساتىمەن عانا جۇرگىزىلەتىن پروتسەدۋرا.
ەكپە الىپ شىققان جاسوسپىرىمدەر دارىگەردىڭ قاراۋىندا جارتى ساعاتتاي بولادى. سودان كەيىن عانا ۇيلەرىنە قايتارىلادى. ول ءۇشىن ەمحانالاردا ارنايى بولمە جابدىقتالعان. ءتىپتى ىستىق شايعا دەيىن ۇسىنىلادى.
– ۆاكتسينا الۋعا اتا-انامنىڭ رۇقساتىن الىپ, ءوز ەركىممەن كەلىپ وتىرمىن. الەمدى جايلاعان ىندەتتىڭ قانداي قاۋىپتى ەكەنىن بىلەمىز. بىلگەن سوڭ دا كورونوۆيرۋس ينفەكتسياسىنا قارسى ەكپە الۋعا كەلدىك, – دەيدى وسكەمەن جوعارعى مەديتسينالىق كوللەدجىنىڭ 1 كۋرس وقۋشىسى ديلناز ايدىنقىزى.
بۇگىنگى تاڭدا وبلىس بويىنشا 12 جاستان 18 جاسقا دەيىنگى 1100-دەن استام بالانىڭ اتا-اناسى ەكپە الۋعا كەلىسىم بەرگەن. ءبىرىنشى كەزەڭدە 16 – 18 جاس ارالىعىنداعى جاسوسپىرىمدەر, سودان كەيىن 12 – 15 جاس ارالىعىنداعى وقۋشىلار ۆاكتسينالانادى. سونداي-اق 82 جۇكتى, 217 بالا ەمىزەتىن ايەل ۆاكتسينا الۋعا كەزەككە تۇرعان.
وبلىستىق دەنساۋلىق ساقتاۋ باسقارماسى باسشىلارىنىڭ ايتۋىنشا, ۆاكتسينانىڭ قاۋىپسىزدىگى مەن تيىمدىلىگىن قامتاماسىز ەتۋ ءۇشىن بەلگىلى تەمپەراتۋراداعى تەرموكونتەينەرلەردە عانا تاسىمالدانادى.
ەسكەرتە كەتەرلىگى, شىعىس قازاقستان «جاسىل» ايماقتا بولعانىمەن, كورونوۆيرۋس ىندەتىنە شالدىعىپ جاتقاندار از ەمەس. سوڭعى تاۋلىكتە 42 ادامنان انىقتالعان. ونىڭ 39-ى سيمپتومدى بولسا, ۇشەۋى سيمپتومسىز. ستاتسيونارلاردا جالپى 566 ناۋقاس ەم الىپ جاتىر. وبلىس بويىنشا توسەك قورىنىڭ جۇكتەمەسى 15%-دى قۇراپ وتىر. وتكەن تاۋلىكتە 16 پاتسيەنت تولىقتاي ساۋىعىپ شىققان. قالاي دەگەنمەن, كارانتيندىك شارالاردى ساقتانۋىمىز شارت.
شىعىس قازاقستان وبلىسى
