قولداۋعا قاشاندا دايىنبىز

ەلدىڭ تۇتاستىعى مەن ءبىر­لىگىنە, ەكونوميكالىق-الەۋ­مەت­تىك دامۋىنا سۇبەلى ۇلەس قوسىپ وتىرعان «نۇر وتان» پار­تياسىنىڭ قۇرىلعانىنا دا 15 جىل تولىپ وتىر. بۇل ساياسي ۇيىمنىڭ قازىرگى اتقارىپ كەلە جاتقان جۇمىستارى, ءسوز جوق, مەنىڭ جەكە قىزمەتىممەن قاتار, ساياسي كوزقاراسىم قالىپ­تاسۋىنىڭ باسپالداعى بولدى دەسەم, ارتىق ايتقاندىق ەمەس. پارتيانىڭ سوڭعى سەزىنە قاتىسار الدىندا كوكشەتاۋ وڭىرىندەگى «سۇڭقار» دەمالىس-ساۋىقتىرۋ لاگەرىندە «جاستار–وتانعا» جوباسىنا قاتىناسىپ, ارنايى ىرىكتەۋدەن وتكەن بولاتىنمىن. ناتيجەسىندە پار­تيا­نىڭ تاريحي سەزىندە كوپ نازا­رىنا ۇسىنىلعان ساياسي دوكترينانىڭ قابىلدانۋ ساتىندە كوپپەن بىرگە ءوز ءۇنىمدى قوسىپ, قولداپ داۋىس بەردىم. جالپى, پارتيا تاريحىندا تۇڭعىش رەت جاسوتاندىقتاردىڭ سەزگە قاتىناسۋى مەن سەكىلدى كوپتەگەن جاسقا قانات ءبىتىردى. كۇن وتكەن سايىن دامىپ, ورلەۋ باعىتىنا تۇسكەن ەلىمىزدە قابىلدانعان بۇل دوكترينانىڭ الدىڭعى قۇجاتتار سەكىلدى ەلدىكتى كوزدەپ, باياندى بولاشاق ءۇشىن جۇمىس ىستەيتىن قۇجات ەكەنىنە كوز جەتكىزدىك. وسى قۇجات قابىلدانار ساتتە ەلباسى ەلىمىزدىڭ ءار وڭىرىنەن كەلگەن ازاماتتارمەن قاتار, ارنايى دەلەگات رەتىندە شاقىرىلعان 300-ءدىڭ ۇستىندەگى جاسقا ەرەن مىندەتتەر جۇكتەدى. بۇل ەل جاستارىنا كورسەتىلگەن قۇرمەتپەن قاتار, جاۋاپكەرشىلىگى تەرەڭ, بايلامى بەرىك سەنىم دەپ سانايمىن. ۇلتىنىڭ ۇلى بولاشاعى ءۇشىن وزىنە امانات ەتىپ جۇكتەلگەن ەلىن ماڭگىلىك ەلگە اينالدىرۋ جولىندا ازاماتتىقتىڭ بيىك ۇلگىسىن كورسەتكەن ەلباسى نۇرسۇلتان نازارباەۆپەن بەتپە-بەت كەزدەسىپ, ەل تاعدىرى ءبىزدىڭ قولىمىزدا ەكەنىن تاعى ءبىر مارتە ەسىمىزگە سالىپ قانا قويماي, ەرىنبەي ەڭبەك ەتۋگە, جالىقپاي ءبىلىم الۋعا شاقىردى. ءبىزدىڭ وتانىمىز بىرەۋ – ول قاسيەتتى قازاقستان ەكەنىن جادىمىزدان شىعارماي, سونىڭ جولىندا تەر توگىپ, بابالار اڭساعان اسىل مۇراتىن جۇزەگە اسىرۋ – ءبىزدىڭ مىندەتىمىز. ءوز سوزىندە پرەزيدەنت: «جاستار – ءبىزدىڭ التىن قورىمىز», دەپ ەرەكشە اتاپ ءوتتى. ەلباسى ايتقانداي, جاس قازاقستاندىقتاردىڭ پارتيانىڭ, جالپى وتانىمىزدىڭ باعدارىن قولداۋى جانە 2050 جىلعا دەيىنگى مەرزىمگە ارنالعان باعدارلامانى جۇزەگە اسىرۋعا كەڭىنەن قاتىسۋى تاريحي, مورالدىق, تۇراقتاندىرۋشى زور مانگە يە. پرەزيدەنت, سونداي-اق, جاستار ساياساتى بويىنشا جۇكتەلگەن تاپسىرمالاردىڭ تولىق ورىندالماي وتىرعانىن دا سىنعا الدى. «ۇكىمەت 2020 جىلعا دەيىنگى جاستار ساياساتى تۇجىرىمداماسىن بەكىتتى. الايدا, ونى جۇزەگە اسىرۋ ءىس-شارالارى بويىنشا قارجىلاندىرۋدىڭ كولەمى انىقتالماعان. بارلىعى باعدارلامالاردىڭ اكىمشىلىكتەرىنە كەلىسىلگەن شەك بويىنشا بەرىلگەن. ال بۇل شەك قاراجات تۇتىنۋشىعا جەتە مە, جوق پا, بەلگىسىز. تاعى ءبىر مىسال, مەنىڭ تاپسىرمام بويىنشا ءبىلىم جانە عىلىم مينيسترلىگى «جاستار» عىلىمي-زەرتتەۋ ورتالىعىن قۇردى. الايدا, قارجىلاندىرۋدىڭ جوقتىعىنان بۇل دا تولىققاندى جۇمىس ىستەي الماي وتىر», دەگەن مەملەكەت باسشىسى وڭىرلەردە جاستار رەسۋرستىق ورتالىقتارىن قۇرۋ جۇمىسىنىڭ سوزىلىپ كەتكەندىگىن, ونى جەدەل ارادا جۇزەگە اسىرۋدى ەل ۇكىمەتىنە قاتاڭ تاپسىردى. وسىدان-اق ەلباسىنىڭ جاستار تاعدىرىنا بەيجاي قارامايتىنىنا تاعى ءبىر مارتە كوز جەتكىزە تۇستىك. ءبىز ءۇشىن وسىنداي جۇمىستاردى اتقارىپ وتىرعان مەملەكەت باسشىسىنىڭ اكەلىك قامقورلىعىنا مەنىڭ زامانداستىرىم ءوز العىس سەزىمدەرىن ءبىلدىردى. قازاقستان حالقىنىڭ ەرلىك پەن بىرلىكتىڭ ۇلگىسىن كورسەتكەندىگىنە وتكەن تاريحىمىزدان ايقىن كوز جەتكىزەمىز. «ءبىز بابالارىمىز سان عاسىرلار بويى اڭساعان ارمانعا قول جەتكىزگەنىمىزدى ماقتان ەتە ءبىلۋىمىز كەرەك. ۇلتىمىزدىڭ ۇلى تاريحىنىڭ جاڭا تاراۋى قۋاتتى دا تابىستى تاۋەلسىز مەملەكەتتىڭ شەجىرەسى بولىپ جازىلۋدا. ايتاتىن ءسوز بىرەۋ-اق: ەلدىڭ بىرلىگى – قازاقتىڭ بىرلىگى», دەگەن مەملەكەت باسشىسىنىڭ باتىل باستامالارىن ءبىز, جاستار قاشاندا قولداۋعا دايىنبىز. مەملەكەتتە جۇزەگە اسىرىلىپ كەلە جاتقان باياندى باستامالار مەن ىرگەلى ىستەر بىزدەر ءۇشىن, كەمەل كەلەشەك ءۇشىن جاسالۋدا ەكەنىن جاقسى تۇسىنەمىز. ولاي بولسا, پارتيانىڭ جاڭادان قابىلدانعان قۇجاتىندا كورسەتىلگەن وڭ باستامالاردى بىرگە جۇزەگە اسىرۋعا يندەرلىك جاستار دا ارقاشان دايىن. ەندەشە, ىسكە ءسات! سۇڭقار كوشەكوۆ, يندەر اۋداندىق «جاس وتان» جاستار قاناتىنىڭ اتقارۋشى حاتشىسى. اتىراۋ وبلىسى.