اگەنتتىكتەن ءمالىم ەتكەندەي, جىل سايىن مەملەكەت وتىندى زاڭسىز ساتۋدان ميللياردتاعان بيۋدجەت قاراجاتىن جوعالتادى. قىلمىس جاساۋشىلار بيۋدجەتتىك تولەمدەر جۇرگىزبەي, رۇقسات قۇجاتتارىنسىز مۇناي ءوندىرۋدىڭ جانە ساتۋدىڭ ءتۇرلى قىلمىستىق سحەمالارىن پايدالانادى. قارجىلىق مونيتورينگ اگەنتتىگى وسىنداي قىلمىستىڭ ءبىرىن اشكەرەلەگەن.
«اگەنتتىكتىڭ شىمكەنت قالاسى بويىنشا اۋماقتىق دەپارتامەنتىنىڭ قىزمەتكەرلەرى شىعۋ زاڭدىلىعىن راستايتىن قۇجاتتارسىز 180 توننادان استام مازۋتتى ساتۋ دەرەگىن انىقتادى.
«Alma Oil Trading» جشس ديرەكتورى ج.ناقىپوۆ بەلگىسىز تۇلعادان مازۋت ساتىپ الىپ, كەيىننەن سارىسۋ اۋدانى اكىمدىگىنىڭ تۇرعىن ءۇي-كوممۋنالدىق شارۋاشىلىق, جولاۋشىلار كولىگى, اۆتوموبيل جولدارى جانە تۇرعىن ءۇي ينسپەكتسياسى بولىمىنە زاڭسىز ساتقان. بارلىعى 17 ملن تەڭگەدەن استام سوماعا وتىن ساتىپ الىندى», دەلىنگەن تاراتىلعان حابارلامادا.
جشس ديرەكتورى ج.ناقىپوۆ 3,5 جىلعا شارتتى تۇردە باس بوستاندىعىنان ايىرىلدى.
