ءوڭىر باسشىسى ەرمەك مارجىقپاەۆ وبلىستا سپورتتى دامىتۋ باعىتىندا جاسالىپ جاتقان قاداۋ-قاداۋ شارۋالارعا توقتالا كەلىپ, ەل تاۋەلسىزدىگىنىڭ 30 جىلدىعىندا مەرەيىمىزدى اسىرعان جارقىن جەڭىسكە توقتالدى. 33 جاسىندا الەم چەمپيونى اتانعان تەمىرتاس ءجۇسىپوۆتى قۇتتىقتاپ, ەكى بولمەلى پاتەر مەن 5 ملن تەڭگەنىڭ سەرتيفيكاتىن تابىس ەتتى. چەمپيوناتتا جاسىنداي جارقىلداعان جەڭىمپازدىڭ جەكە باپكەرى قۋانىشباي قوقىشەۆقا
2 ملن 500 مىڭ تەڭگە كولەمىندە سىياقى بەرىلدى.
سايدىڭ تاسىنداي كىل مىقتىلار جۇدىرىقتاسقان چەمپيوناتتا توپ جارعان تەمىرتاستىڭ حالىقارالىق دارەجەدەگى سپورت شەبەرى, ەلىمىزدىڭ بەس دۇركىن چەمپيونى, 2013 جىلعى ازيا چەمپيونى, 2015 جىلعى بۇكىلالەمدىك بوكس سەرياسىنىڭ چەمپيونى, اسكەريلەر اراسىنداعى الەمدىك دودانىڭ جەڭىمپازى ەكەندىگىن ايتا كەتەلىك. نەشەمە جىل بويى توگىلگەن تەر, قاجىماي-تالماي ەتكەن ەڭبەك زايا كەتكەن جوق. ەل قۇراماسىنىڭ ساپىندا ءبىرىنشى بولىپ شارشى الاڭعا كوتەرىلىپ, قازاق بوكسشىلارىنا جول اشتى. قازاقستاننىڭ كوك بايراعىن جەلبىرەتىپ, ءانۇرانىن ويناتتى.
كوكشەنىڭ بوكس زالدارىندا تاربيەلەنىپ جاتقان جاس ۇرپاق تەمىرتاس اعالارىنا ۇقساپ تەگەۋىرىندى بولعىسى كەلەدى. جارقىن جەڭىس كوكىرەگىن نۇرلاندىرعان كەلەر ۇرپاقتىڭ دا تەمىر جۇدىرىقتى تەمىرتاستىڭ جولىن قۋارى ءسوزسىز.
كوكشەتاۋ
