«مەديتسينا مەكەمەلەرىندە كامەلەتكە تولماعاندارعا ەكپە سالۋدىڭ ءبىرىنشى كەزەڭى باستالدى. كەلەسى اپتادان باستاپ مەكتەپتەرگە شىعامىز. بۇعان دەيىن مەكتەپتەرمەن بىرلەسە وتىرىپ, ءبىراز جۇمىس اتقاردىق. بۇگىندە قالامىزدا 12 مەن 18 جاس ارالىعىنداعى 1619 بالا ەكپە الۋعا دايىن. رۇقسات بەرگەن اتا-انالاردىڭ ءتىزىمى دە بار. بۇل جاعدايدا اتا-انانىڭ كەلىسىمى بولماسا, تەلەفون سوعىپ, اتا-انانىڭ كەلىسىمىن سۇرايمىز», دەيدى الماتى قالالىق قوعامدىق دەنساۋلىق ساقتاۋ باسقارماسىنىڭ ورىنباسارى لاۋرا مىرزاعالي.
الماتى قالالىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى, قالانىڭ باس مەملەكەتتىك سانيتارلىق دارىگەرى جانداربەك بەكشين اتا-انالار قالاسا, بالاسىنا ەكپە جاساعان كەزدە قاسىندا بولا الاتىنىن ايتتى.
«بۇل – وتە ماڭىزدى شارا. ەگەر اتا-انالار ەكپەگە قاتىسۋعا نيەت بىلدىرسە, ەمحانالارداعى ەگۋ پۋنكتەرى دەمالىس كۇندەرى جۇمىس ىستەيدى. بولاشاقتا مەكتەپتەردىڭ مەديتسينالىق پۋنكتىلەرىندە ىسكە قوسامىز», دەدى ول.
