ىلگەرىلەۋشىلىك بار ەكەنى اتالدى

ايەلدەرگە قاتىستى كەمسىتۋشىلىكتى جويۋ جونىندەگى بۇۇ كوميتەتى گەندەرلىك تەڭدىك سالاسىندا قازاقستاننىڭ حالىقارالىق مىندەتتەمەلەردى ورىنداعانىن اتاپ ءوتتى. جەنەۆادا ءوتىپ جاتقان ايەلدەرگە قا­تىس­تى كەمسىتۋشىلىكتى جويۋ جونىندەگى بۇۇ كومي­تەتىنىڭ 57-سەسسياسى شەڭبەرىندە قازاق­ستان رەسپۋبليكاسىنىڭ ايەلدەرگە قاتىستى كەم­سىتۋشىلىكتىڭ بارلىق فورماسىن جويۋ جونىندەگى كونۆەنتسيا قاعيدالارىن ىسكە اسىرۋى تۋرالى 3 جانە 4 قۇراما مەرزىمدى باياندامالاردىڭ قورعالۋى ءوتتى. قازاقستاندىق دەلەگاتسيا باسشىسى – قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى م.بەكبوسىنوۆا بۇۇ كوميتەتى مۇشەلەرىنىڭ نازارىنا سوڭعى جىلدارداعى وزگەرىستەر ەسەبىمەن ءبىزدىڭ ەلدە جۇرگىزىلىپ جاتقان گەندەرلىك ساياسات تۋرالى باياندامانى ۇسىندى. قازاقستان دەلەگاتسياسىنىڭ مۇشەلەرى كوميتەت ساراپشىلارىن قازاقستاننىڭ الەۋمەتتىك-ەكونوميكالىق جانە قوعامدىق-ساياسي سالاسىنداعى ماڭىزدى جانە ىلگەرىندى وزگەرىستەرى جونىندە حاباردار ەتتى. اتاپ ايتقاندا, «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جىل سايىنعى حالىققا جولداۋىندا ەلباسى قازاقستان دامۋىنىڭ باسىمدىقتارى رەتىندە بۇكىل الەم ەلدەرى ءۇشىن  ەڭ قاۋىپسىز جانە جايلى مەكەن, سونداي-اق, مەديتسينالىق ءتۋريزمنىڭ جەتەكشى ەۋرازيالىق ورتالىعىن قۇرۋدى ىلگەرىلەتكەنى اتاپ ءوتىلدى. بۇل, ءوز كەزەگىندە, ءومىر ءسۇرۋ ساپاسىنىڭ جاقسارۋى مەن ۇزاقتىعىنىڭ ارتۋىنا, دەموگرافيالىق وسىمگە, ءبىلىم بەرۋ مەن دەنساۋلىق ساقتاۋ سالاسىندا الەمدىك ستاندارتتارعا جەتۋگە, تۇرعىن ءۇيدىڭ قولجەتىمدى بولۋىن قامتاماسىز ەتۋگە, سونداي-اق, ازاماتتاردى قىلمىستاردان قورعاۋعا باعىتتالعان جۇيەلى وزگەرىستەردى بولجايدى. ءوز تۇسىنىكتەمەلەرىندە كوميتەت مۇشەلەرى گەندەرلىك تەڭدىكتى ساقتاۋ ماسەلەسىندە قازاقستاننىڭ ەداۋىر ىلگەرىلەگەنىن اتاپ ءوتتى. اتاپ ايتقاندا, ماجىلىستە توراعالىق ەتكەن فرانتسيانىڭ تاۋەلسىز ساراپشىسى نيكول ەمەلين قازاقستاندىق تاراپ كوميتەتتىڭ ۇسىنىستارى مەن ەسكەرتۋلەرىن ورىنداۋعا جاۋاپكەرشىلىكپەن قاراعاندىعىن مالىمدەدى. «ەگەمەن-اقپارات».