بۇلاي ساعىنا سويلەۋىمىزدىڭ سەبەبى, بەلگىلى سۋرەتشى مەيىرجان نۇرعوجيننىڭ «اپورت» كارتيناسى. ءبىزدى قىلقالام شەبەرىنىڭ «جاز ءدامى» توپتاماسىنان الىنعان تۋىندىسى ءتانتى ەتتى. ونىڭ كوركەمسۋرەتتەگى رەاليستىك ءادىستى جاقتاۋشىلاردىڭ قاتارىنان ەكەنى كوپكە ايان. بۇل شىعارما سول تۇجىرىمدى كەڭىنەن تارقاتا تۇسكەندەي.
قىزىعى دا سول, اۆتوردىڭ شىعارماشىلىق لوكوموتيۆى – بالالىق شاقتىڭ بەكەتى. بۇگىنگى كوزقاراس بيىگىنەن سول الاڭسىز ساتتەردىڭ اسەرلەرى مەن ەستەلىكتەرىنە, بوزبالالىق دۇربەلەڭدەرگە كوز سالادى. بالالىق شاق تاقىرىبىنىڭ ونىڭ شىعارماشىلىعىنان ەرەكشە ورىن الۋىنىڭ سەبەبى – وسى. بالانىڭ شىنايىلىعى مەن تازالىعىن, قورشاعان ورتانى تانۋداعى اۋەسقويلىعىن جانە اڭقاۋلىعىن ءدال بايقاپ جەتكىزەدى. كارتينالارىنىڭ نەگىزگى كەيىپكەرلەرى كۇشىكتەر مەن لاقتار, الما مەن ويىنشىقتار سەكىلدى بالالىق شاقتان حابار بەرەتىن سۇيكىمدى دەتالدار.
بايقاساڭىز, سۋرەتشىنىڭ شىعارماشىلىعىنا ۇلتتىق نازىك بوياۋ, ليريكالىق كوڭىل كۇي سىڭگەن. ول بەلگىلى ءبىر تاقىرىپپەن شەكتەلىپ قانا قالمايدى. ونى تاريح پەن سوعىس تاقىرىپتارى دا, تاۋ مەن دالا, قالا كورىنىستەرى, رومانتيكالىق-ليريكالىق سيۋجەتتەر, ناتيۋرمورتتار سياقتى تۇرمىستىق دۇنيەلەر دە قىزىقتىرادى.
«جاز ءدامى» توپتاماسىنداعى «اپورت» كارتيناسىندا جازدىڭ ىستىق كۇنىندە اسىر سالعان ەكى بالا بەينەلەنگەن. ەرەسەكتەۋ بالا قۇراق كورپە جايىلعان اربانىڭ سىرىعىندا ءوزىن شاباندوز سەزىنىپ وتىر. ول باسىنا گازەتتەن جاسالعان پيلوتكا كيگەن, بەلىنە بايلاعان قىزعىلت جەيدەسى قۇراق كورپەنىڭ بەتىن جاۋىپ تۇر. ال كىشكەنتاي بالا كورەرمەنگە ەنتەلەي تىك قارايدى. قولىنا پىسكەن ۇلكەن الما ۇستاپ العان. بالالاردىڭ كوپشىلىگى ۇلكەندەردىڭ اياق كيىمىن كيگەندى ۇناتاتىنى انىق. بالانىڭ اياعىنا ۇلكەن باتەڭكە كيگىزۋ ارقىلى سۋرەتشى وسى قاسيەتتى دە ءوز تۋىندىسىنا ەنگىزگەن. بۇل – كارتينانىڭ قۇپياسى.
اكەنىڭ يا اعانىڭ توزعان باتەڭكەسى, مايلانىپ ماڭدايعا جابىسقان شاش, جەردە شاشىلىپ جاتقان اتاقتى الماتىلىق اپورت, مىنە, وسىلاردىڭ بارلىعى كورەرمەنىن بىردەن ەلىكتىرىپ اكەتەدى. سۋرەتشى جارىق پەن كوڭىل كۇيدىڭ ءارتۇرلى اسەرىن شەبەر جەتكىزگەن. اسىرەسە, بوياۋلاردىڭ ءبىر-بىرىمەن ۇستاسىپ تۇرۋى قايران قالدىرادى.
شىنى كەرەك, كارتيناعا ۇزاق قاراپ تۇرساڭىز, ءبىر ءسات ۋايىمسىز بالالىق شاققا ساياحاتتاعانداي بولاسىز.
