قوعام بولىپ اتى وشكىر ىندەتپەن كۇرەسىپ جاتقانىمىزعا ەكى جىلداي بولىپتى. ەتىمىز ۇيرەنىپ كەتتى مە, ءاۋ باستاعىداي دۇربەلەڭ جوق. وبلىس تۇرعىندارى سانيتارلىق دارىگەر بەكىتىپ بەرگەن ەرەجەنى بەكەم ساقتانادى. بۇرىنعىداي ەمەس, توي-تومالاق سايابىرسىعان.
وبلىس ورتالىعىندا, اۋدانداردا ىندەتپەن كۇرەسۋ ماقساتىنداعى پروۆيزورلىق ورتالىقتار وكپەنى جەلدەتكىش اپپاراتتارمەن, توسەك-ورىنمەن تولىقتاي قامتىلعان. قات-قابات كيىنگەن دارىگەرلەر كۇن-ءتۇن دەسپەي ارپالىسىپ ءجۇر. ەڭبەكتەرىنىڭ ناتيجەسى دە جوق ەمەس, ءولىم-ءجىتىم ازايدى.
– وتكەن تاۋلىك ىشىندە كوۆيدتى پنەۆمونيامەن اۋىرعانداردى قوسا ەسەپتەگەندە 68 پاتسيەنت ستاتسيونارلاردان ەمدەلىپ, جازىلىپ شىقتى. ال وتكەن تاۋلىك بويىنشا تاعى 9 سيمپتومسىز اۋرۋ بەلگىلەرى بار ازاماتتىڭ ءۇي كارانتينى اياقتالدى, – دەيدى وبلىستىڭ باس دارىگەرى ەرمەك وماربەكوۆ.
جالپى, ءوڭىر بويىنشا بۇگىنگە دەيىن ينفەكتسيالىق ستاتسيونارلاردان ەم الىپ شىققاندار سانى ونىڭ ىشىندە كوۆيدتىك پنەۆمونيامەن اۋىرعانداردى قوسا ەسەپتەگەندە 24 229 ادامعا جەتتى. 10 234 ناۋقاس ءۇي كارانتينىن اياقتاپ, 34 463 ادام تولىقتاي ساۋىعىپ شىقتى. مۇنىڭ ءبارى تىڭعىلىقتى دايىندىقتىڭ, بىلىكتى مامانداردىڭ ارقاسى.
دارىگەرلەر ايتقانداي, ىندەتتى ءبىرجولا جەڭۋدىڭ جولى – ۇجىمدىق يممۋنيتەت, ياعني ۆاكتسينالاۋ. وبلىستا بۇل باعىتتا دا تىنىمسىز جۇمىستار جۇرگىزىلىپ جاتىر. ماسەلەن, ەكپە الماعاندار Ashyq جۇيەسى ارقىلى انىقتالىپ, بىرقاتار نىسانعا كىرىپ-شىعا المايدى. 2021 جىلعى 9 قاراشاداعى مالىمەت بويىنشا شىعىس قازاقستان وبلىسىندا ۆاكتسينانىڭ I كومپونەنتىن 890 358 ادام, II كومپونەنتتى 827 664 ادام سالدىرعان ەكەن. ۆاكتسينانىڭ قالعان كومپونەنتتەرىنە كەلەر بولساق, I كومپونەنتتەن 15 117 دوزا, II كومپونەنتتەن 32 738 دوزا قالدى. وڭىردە قازىرگى ۋاقىتتا ۆاكتسينانىڭ 3 ءتۇرى بار: سپۋتنيك-V, QazVac جانە Sinopharm. ايتا كەتەرلىگى, وبلىستا جاسوسپىرىمدەر مەن جۇكتى ايەلدەرگە دە ۆاكتسينا ەگۋ جۇمىستارى قولعا الىنباق. ازىرشە جەر-جەرلەردە ءتۇسىندىرۋ جۇمىستارى باستالىپ كەتتى. مەديتسينا قىزمەتكەرلەرىنىڭ ايتۋىنشا, ۆاكتسينا ەگىلمەس بۇرىن بالانىڭ نەمەسە جۇكتى ايەلدىڭ دەنساۋلىعى تولىقتاي تەكسەرىلەدى. سوندىقتان قاۋىپتەنۋگە ەش نەگىز جوق.
شىعىس قازاقستان وبلىسى
