– ەكى ورىندىق پەن ۇستەل تەننيسىن ورناتۋ دا اباتتاندىرۋعا جاتادى. بىراق ءبىزدىڭ تۇسىنىگىمىزدە اباتتاندىرۋدىڭ ءجونى باسقا. ءبىز بالالارعا عانا ەمەس, جالپى تۇرعىندارعا ىڭعايلى ءارى قاۋىپسىز اۋلا جاساۋدى ماقسات ەتتىك, – دەيدى وسكەمەن قالاسىنىڭ اكىمى جاقسىلىق ومار.
وسكەمەندەگى بۇگىنگى بىرقاتار اۋلانى بۇرىنعىمەن سالىستىرۋعا استە بولمايدى. بۇرىن قالاي ەدى؟! تەمىرى شودىرايعان سىرعاناقتار, جالپيعان بەتون فورمالار, تاعىسىن تاعى. ونىڭ كۇتىمىنە دە اسا نازار اۋدارىلماعان. ال قازىرگى اۋلاداعى ويىن جابدىقتارى ىقشامدالعان, بالالارعا اناعۇرلىم قاۋىپسىز. سپورتپەن اينالىسامىن دەگەن جاسوسىپىرىمدەرگە دە مۇمكىندىك مول. تۋرنيكتەردىڭ ءتۇر-ءتۇرى, تەننيس ۇستەلدەرى, فۋتبول الاڭدارىنا دەيىن بار.
اۋلالاردى اباتتاندىرۋ جۇمىستارى اۋماقتىڭ ەرەكشەلىكتەرىنە قاراي جۇزەگە اسىپ جاتىر. بالالار الاڭى ادەتتەگىدەي اتكەنشەكتەر, كارۋسەلدەر, قۇم سالعىشتار عانا ەمەس, ءارتۇرلى زاماناۋي ويىن كەشەنىمەن جابدىقتالدى. سونىمەن قاتار بالالاردىڭ قاۋىپسىزدىگى ءۇشىن جەرگە جۇمساق جابىن توسەلگەن. كەڭ اۋلالارعا Street workout جابدىقتارى ورناتىلدى.
اۋلالارداعى تاعى ءبىر باستى ماسەلە, جوعارىدا اتاپ وتكەندەي – كولىكتەردىڭ كوپتىگى, تۇراقتاردىڭ ازدىعى. كەڭەس وكىمەتى تۇسىندا بوي كوتەرگەن ۇيلەردىڭ اۋلالارىندا اۆتوتۇراقتار قاراستىرىلماعان ەدى. اۋلالاردى اباتتاندىرۋ, جاڭارتۋ جۇمىستارىنىڭ ناتيجەسىندە اۋلالارداعى كولىك تۇراقتارىنىڭ ماسەلەسى دە شەشىمىن تاۋىپ كەلەدى.
– وسكەمەندە اۆتوكولىكتەر سانىنىڭ وسۋىنە بايلانىستى اۆتوتۇراقتار تارلىق ەتىپ كەلەدى. كەيبىر ۇيلەردىڭ اۋلاسىندا ينە شانشىر ورىن بولمايدى. ءبىز اۋلالاردى اباتتاندىرۋ ارقىلى بۇل ماسەلەنى دە شەشەمىز, – دەيدى قالا باسشىسى جاقسىلىق مۇقاش ۇلى ءوز سوزىندە.
كوپتەگەن اۋلادا كولىك جولدارى كەڭەيتىلدى, اۆتوتۇراقتارعا ورىن ءبولىندى. سونىمەن قاتار جاياۋ جۇرگىنشىلەر جۇرگىزۋشىلەرگە كەدەرگى جاساماۋى ءۇشىن اۋلا ىشىلىك تروتۋارلار توسەلە باستادى. جاياۋ جۇرگىنشىلەردىڭ جولدارى بالالار مەن سپورت الاڭدارىنا اپاراتىن ۇيلەردىڭ بويىمەن توسەلگەن. ال قاۋىپسىزدىكتىڭ الدىن الۋ ءۇشىن اباتتاندىرىلعان اۋلالار ءتۇن مەزگىلىندە سامالاداي جارقىراپ تۇرادى. ۇنەمدى شامدار ورناتىلعاندىقتان, پودەزدەردىڭ الدىنداعى جارىق ءتۇنى بويى جانىپ تۇرادى. بۇل قاۋىپسىزدىكتىڭ تاعى ءبىر ەلەمەنتى. البەتتە, اباتتاندىرۋ جۇمىستارى بولعان سوڭ جاسىل جەلەكتەر ەگىلدى, ورىندىقتار, قوقىس جاشىكتەرى ورناتىلدى.
– وسكەمەن وزگە قالالارعا ۇلگى بولسا ەكەن دەيمىز. ول ءۇشىن حالىقتىڭ ىڭعايلى ءومىر سۇرۋىنە بارىنشا جاعداي جاساۋعا تىرىسىپ ءجۇرمىز. اباتتاندىرۋ جۇمىستارى دا سونىڭ ءبىر بەلگىسى. الايدا بيۋدجەت ەسەبىنەن جەكە اۋماقتاردى تولىقتاي قامتۋ مۇمكىن ەمەس. سول ءۇشىن ءبىز اباتتاندىرۋ باعدارلامالارىنا ەنۋدىڭ شارتتارىن بەلگىلەدىك, – دەيدى قالا اكىمى.
ايتا كەتەرلىگى, ويىن الاڭدارىنا ارنالعان امبەباپ جابدىقتاردى جەرگىلىكتى كاسىپكەر شىعارىپ وتىر. الداعى ۋاقىتتاردا تۇرعىندار ويىن كەشەندەرىن وزدەرى-اق جوندەپ, جاڭالاپ الۋلارىنا بولادى. دەگەنمەن جاڭا جابدىقتارعا كۇتىممەن قاراسا, ءالى ۇزاق جىل تۇرعىنداردى قۋانتا بەرمەك.
