اۋعانستاننىڭ اسكەري بازاسىنا شابۋىل جاسالدى

كەشە «تاليبان» قوزعالىسىنىڭ سودىرلارى اۋعانستاننىڭ پاكستانمەن شەكارالاس جاتقان كۋنار پروۆينتسياسىنداعى اسكەري بازاسىنا شابۋىل جاسادى. بۇل تۋرالى Lenta.ru حابارلادى. «فرانس-پرەسس» اگەنتتىگىنىڭ مالىمەتى بويىنشا, سودىرلاردىڭ شابۋىلىنان 20 شاقتى اسكەري قازا بولعان. سونداي-اق ولار كەم دەگەندە جەتى ادامدى تۇتقىنعا الىپ كەتكەن كورىنەدى. Reuters اگەنتتىگىنىڭ دەرەگىنە قاراعاندا, اۋعانستان اسكەرى تۇتقىنداردى بوساتۋ ماقساتىندا ارنايى ءىس-قيمىلدارىن باستاپ كەتكەن. بەلگىلى بوعانداي, تاليباندار تۇتقىندا ۇستاپ وتىرعان اقش اسكەري قىزمەتكەرى بوۋي بەرگدالدى گۋانتانامو تۇرمەسىندە جازاسىن وتەپ جاتقان بەس سودىرىنا اۋىستىرۋ جونىندەگى كەلىسسوزدەرىن توقتاتقان. «تاليبان» قوزعالىسى اۋعانستاننىڭ اسكەريلەرى مەن پوليتسيا قىزمەتكەرلەرىنە ءجيى شابۋىل جاسايدى. تەك, 2013 جىلدىڭ وزىندە عانا مۇنداي وقيعالاردىڭ سانى بىرنەشە مىڭعا جەتكەن ەكەن. ايدار ورىسباەۆ. دەرەككوز: Lenta.ru. فوتو: Rus.telegram.ee.