بانكتەر تۋرالى جالعان اقپارات تاراتقانداردىڭ ەسىمى بەلگىلى بولدى

ەلىمىز بانكتەرى تۋرالى جالعان اقپارات تاراتقانداردىڭ ەسىمى بەلگىلى بولدى. بۇل تۋرالى الماتى قالالىق پروكۋراتۋراسىنىڭ ءباسپاسوز قىزمەتى حابارلادى. سوڭعى كۇندەرى جۇرتشىلىققا ۇيالى تەلەفون نەمەسە كەيبىر سايتتار ارقىلى ەلىمىز بانكتەرىنىڭ جابىلۋى مۇمكىن ەكەنى تۋرالى اقپارات تارادى. مۇنىڭ اقىرى بانكتەردىڭ قالىپتى جۇمىس ىستەۋىنە كەدەرگى كەلتىرىپ, كوپشىلىكتىڭ الاڭداتۋشىلىعىن تۋعىزعان بولاتىن. وسىعان وراي, بانكتەردىڭ جاۋاپتى تۇلعالارى ەل ءىشىن اراڭداتقانداردىڭ ەسىمىن ءبىلۋدى سۇراپ, قۇقىق قورعاۋ ورگاندارىنا تالاپ-ارىز ءتۇسىردى. پروكۋراتۋرا مەن ۇلتتىق قاۋىپسىزدىك ورگاندارىنىڭ تەكسەرۋى ناتيجەسىندە,  «Signum» زاڭ فيرماسى» جشس قىزمەتكەرلەرى ابىلقايىر ناقىپوۆ, ۆيكتوريا تروفيموۆيچ پەن ايگەرىم اداسباەۆانىڭ بانك تۋرالى جالعان اقپارات تاراتۋعا تىكەلەي قاتىسى بولعانى انىقتالدى. ولارعا دايەكسىز حاباردى بۇرىن «بانك تسەنتر كرەديت» بانكىندە قىزمەت ىستەگەن دارحان سابدەنوۆ ايتقان ەكەن. ونىڭ وسى ارەكەتىنە بايلانىستى ءىس قوزعالىپ, 20 تاۋلىككە قاماۋعا الۋ تۋرالى سوت شەشىمى شىقتى. ال الماتى قالاسىندا ورنالاسقان «بانك تسەنتر كرەديت» وزدەرىنە كەلگەن شىعىندى ءوندىرۋ جونىندە سوتقا تالاپ-ارىز جازدى. تەكسەرۋ بارىسىندا جالعان اقپارات تاراتقان د. سابدەنوۆتىڭ ۇستىنەن بۇدان بۇرىن قىلمىستىق كودەكستىڭ 251-بابىنىڭ 2- بولىگىنە سايكەس, قىلمىستىق ءىس قوزعالعانى ءمالىم بولدى. الايدا, قۇقىق قورعاۋ قىزمەتكەرلەرىنىڭ ايتۋى بويىنشا, بۇل ءىس زاڭعا قايشى قىسقارتىلعان. سوندىقتان اتالعان ءىس قوسىمشا تەرگەۋگە جىبەرىلدى. ال جوعارىدا اتتارى اتالعان قالعان اراڭداتۋشىلارعا قاتىستى تەرگەۋ امالدارى جۇرگىزىلۋدە. ءامىرحان الماعانبەتوۆ. دەرەككوز: الماتى قالالىق پروكۋراتۋراسى فوتو:Telekomza.ru.