اتى جامان ىندەتتەن قورعانۋدىڭ بىردەن-ءبىر جولى ەكپە الۋ دەسەدى اق حالاتتىلار. ءبىر جاعىنان بارلىق مەكەمەگە Ashyq جوباسى ورناتىلعاندىقتان, «جاسىلى» جانباعانداردى, ياعني ەكپە الماعانداردى كىرگىزبەيدى. بىراق سانيتارلىق-ەپيدەميالىق باقىلاۋ كوميتەتى «اتامەكەن» ۇكپ مەن وڭىرلىك دەنساۋلىق ساقتاۋ باسقارمالارىنا مەديتسينالىق رۇقساتى بار ازاماتتاردى دەمالىس كۇندەرى مەكەمەلەرگە كىرگىزۋ تۋرالى رەسمي اقپارات جىبەردى.
باس سانيتارلىق دارىگەردىڭ قاۋلىسىنا سايكەس پايدالانۋشىعا Ashyq ءموبيلدى قوسىمشاسىندا تۇراقتى مەديتسينالىق انىقتاماسى بولسا, «جاسىل» مارتەبە بەرىلەدى ەكەن. ايتا كەتەرلىگى, «جاسىل» مارتەبەنى كورسەتۋ ءۇشىن مۇنداي انىقتامالاردى اۆتوماتتاندىرۋ ماسەلەسى قايتا قارالىپ جاتىر.
– دەنساۋلىق ساقتاۋ مينيسترلىگىنىڭ مالىمدەۋىنشە, سوڭعى ۋاقىتتا «كوك» مارتەبەلى ازاماتتاردىڭ مەديتسينالىق رۇقساتى بولا تۇرا دەمالىس كۇندەرى كاسىپكەرلىك وبەكتىلەرىنە كىرۋگە رۇقسات جوق ەدى. وسىعان بايلانىستى ۆەدومستۆو اكىمشىلىككە تۇراقتى مەديتسينالىق انىقتامانى كورسەتكەن كەزدە ازاماتتاردى ساۋدا مەكەمەلەرىنە ۋاقىتشا جىبەرۋگە رۇقسات بەرۋ تۋرالى شەشىم قابىلدادى, – دەدى وبلىستىق كاسىپكەرلەر پالاتاسىنىڭ ديرەكتورى قايرات مامىرباەۆ.
ال دەنساۋلىعى ساي بولسا, ەرەسەكتەرمەن قاتار بالالارعا, جۇكتى ايەلدەرگە دە كوروناۆيرۋسقا قارسى ۆاكتسينا سالىنباقشى. بۇل تۋرالى شىعىس قازاقستان وبلىسىندا وتكەن ءباسپاسوز كونفەرەنتسياسىندا ايتىلدى.
قازىرگى ۋاقىتتا شىعىس «سارى ايماقتا» بولعانىمەن, ەپيدەميالىق جاعداي ۋشىعىپ تۇر. سىرقاتتاردىڭ كوبى – سەمەي جانە وسكەمەن قالالارىندا. قاۋىپتى دەرت بالالاردى دا اينالىپ ءوتىپ جاتقان جوق. سانيتارلىق-ەپيدەميالىق تالاپتاردىڭ قاتاڭ ساقتالۋىنا قاراماستان, ءبىلىم باسقارماسىنىڭ مالىمەتىنشە, وقۋ جىلىنىڭ باسىنان بەرى وڭىردە ءداستۇرلى فورماتتا وقۋ كەزىندە وقۋشىلار اراسىندا اۋرۋدىڭ 660 جاعدايى تىركەلدى. قازىر 586 وقۋشى ساۋىعىپ, ادەتتەگى وقۋ رەجىمىنە ورالدى. الايدا وبلىستىڭ 55 مەكتەبىندە 108 سىنىپ ءالى كۇنگە دەيىن قاشىقتان وقىتىلۋدا.
وبلىستىڭ دارىگەرلەرى مەن ەپيدەميولوگتەرى بارلىق شەكتەۋدەن شىعۋدىڭ جالعىز جولى ينفەكتسياعا قارسى ۆاكتسينا الۋ جانە ۇجىمدىق يممۋنيتەتتى قالىپتاستىرۋ دەپ ەسەپتەيدى.
2021 جىلعى 20 قازاندا قازاقستاننىڭ باس مەملەكەتتىك سانيتارلىق دارىگەرى قاۋلى شىعارعانى بەلگىلى. سوعان سايكەس Pfizer Comirnaty پرەپاراتىمەن ۆاكتسينالاۋ جۇرگىزۋ جونىندەگى ادىستەمەلىك ۇسىنىمدار بەكىتىلدى. بۇل ۆاكتسينامەن 12 جاستان اسقان جاسوسپىرىمدەردى, سونداي-اق لاكتاتسيا كەزىندە جانە جۇكتى ايەلدەردى ەگۋ جوسپارلانۋدا.
پروتسەدۋرانىڭ قالاي وتەتىنى تۋرالى ءباسپاسوز كونفەرەنتسياسىندا شىعىس قازاقستاننىڭ باس پەدياترى گۇل قۇسايىنوۆا ايتىپ بەردى. ونىڭ ايتۋىنشا, بالالار مەن جۇكتى ايەلدەردى ۆاكتسينالاۋ وسى قاراشادان باستالادى. ايەلدەر ءوز دەنساۋلىعىن قورعاپ, جۇكتىلىكتىڭ 16-دان 37-ءشى اپتاسىنا دەيىن ەرىكتى ۆاكتسينالاۋ پروتسەدۋراسىنان وتە الادى. ءوز كەزەگىندە جاسوسپىرىمدەردى يممۋنداۋ كەزەڭ-كەزەڭمەن جۇرگىزىلەدى. ءبىرىنشى كەزەڭدە 16-18 جاس ارالىعىنداعى جاسوسپىرىمدەر كوروناۆيرۋس ۆاكتسيناسىنا قارسى ۆاكتسينا الا الادى. كەلەسى كەزەڭدەردە ۆاكتسينالاۋعا 12 جاستان 15 جاسقا دەيىنگى بالالار جىبەرىلەدى.
وبلىستىڭ باس پەدياترى اتاپ وتكەندەي, بالالاردى ۆاكتسينالاۋ اتا-انالاردى نەمەسە زاڭدى وكىلدەردىڭ اقپاراتتاندىرىلعان كەلىسىمى بولعان جاعدايدا عانا جۇرگىزىلەدى. قازىرگى ۋاقىتتا وبلىستىڭ مەديتسينالىق ۇيىمدارىندا يممۋنداۋعا جاتاتىن جاسوسپىرىمدەردىڭ ءتىزىمىن جاساۋ بويىنشا جۇمىس باستالدى.
– مەديتسينا قىزمەتكەرلەرى قازىر مەكتەپتەردە جاسوسپىرىمدەردىڭ اتا-انالارى اراسىندا پاندەميا جاعدايىندا كوروناۆيرۋسقا قارسى ەگۋدىڭ ماڭىزدىلىعى تۋرالى اقپاراتتىق-ءتۇسىندىرۋ جۇمىستارىن جۇرگىزۋدە. ۆاكتسينالاۋ بالالاردىڭ اۋرۋعا قارسى تۇرۋلارىنا يممۋنيتەت قالىپتاستىرادى, – دەيدى گۇل قۇسايىنوۆا.
سونىمەن قاتار ول ۆاكتسينالاۋ پروتسەدۋراسىنان وتپەس بۇرىن اعزادا كوروناۆيرۋس ينفەكتسياسى مەن ۆيرۋسقا انتيدەنەلەردىڭ بولۋىنا تەكسەرۋ جۇرگىزۋدىڭ قاجەتى جوق ەكەنىن اتاپ ءوتتى. Covid-19 ىندەتىمەن اۋىرعان جاسوسپىرىمدەر ساۋىققاننان كەيىن التى ايدان كەيىن پروتسەدۋراعا جىبەرىلەدى.
– ەگۋ الدىندا بالالاردى دارىگەرلەر تولىقتاي تەكسەرەدى. ەگەر يممۋنداۋعا قارسى كورسەتىلىمدەر بولماسا, بالاعا رۇقسات بەرىلەدى. ۆاكتسينا الۋعا قارسى كورسەتىلىمدەردىڭ قاتارىنا بەلسەندى زاتقا نەمەسە ۆاكتسينانىڭ باسقا كومپونەنتتەرىنە اللەرگيانىڭ بولۋى. سونداي-اق پوليەتيلەنگليكولگە اۋىر اللەرگيالىق رەاكتسياسى جاتادى, – دەپ اتاپ ءوتتى وبلىستىڭ باس پەدياترى.
ەسكەرتە كەتەرلىگى, Pfizer Comirnaty پرەپاراتىمەن ۆاكتسينالاۋ ەكى كەزەڭدە جۇرگىزىلەدى. ۆاكتسينانىڭ ەكىنشى كومپونەنتى العاشقى ەگۋدى العاننان كەيىن 21 نەمەسە 28 كۇننەن سوڭ الىنادى. ەكپەنى بىلىكتى ءموبيلدى بريگادالار جۇرگىزەدى.
شىعىس قازاقستان وبلىسى
