ەلەكتروندىق ەڭبەك بيرجاسىندا ادەتتەگىدەي وت جاعۋشىلارعا سۇرانىس كوپ بولسا, كەرىسىنشە جۇمىس ىزدەگەن زاڭگەرلەر, قارجىگەرلەر مەن مال وسىرۋشىلەر كوپ.
«وتكەن ايلارمەن سالىستىرعاندا قازان ايىندا مۇعالىمدەر مەن سۇحبات الۋشىلارعا سۇرانىس تومەندەدى. سونىمەن قاتار ەڭبەك بيرجاسىندا قۇرىلىس سالاسىنىڭ قىزمەتكەرلەرى: ارماتۋراشىلار مەن بەتونشىلاردى ىزدەۋشىلەر كوبەيدى. بۇل ماماندارعا دەگەن سۇرانىس قازان ايىندا 2,2 مىڭ بوس ورىندى قۇرادى, ياعني وتكەن ايعا قاراعاندا 1,8 مىڭعا ارتىق بولدى. مۇنداي مامانداردىڭ تاپشىلىعى سونداي, اتىراۋداعى جۇمىس بەرۋشىلەر ولاردىڭ جالاقىسىن 500 مىڭ تەڭگەگە دەيىن كوتەرۋگە ءماجبۇر بولدى», دەيدى ەڭبەك رەسۋرستارىن دامىتۋ ورتالىعىنىڭ اتقارۋشى ديرەكتورى الەكساندرا مولچانوۆسكايا.
ەلىمىزدىڭ وڭىرلەرىنە جەكە توقتالساق, قازان ايىندا ەلەكتروندىق ەڭبەك بيرجاسىندا جاڭا ەڭبەككەرلەردى ىزدەۋ جاعىنان تۇركىستان وبلىسىنىڭ جۇمىس بەرۋشىلەرى بەلسەندىلىك تانىتقان. مۇنداعى سۇرانىس بارلىق بوس ورىننىڭ 14%-ىن قۇراعان. سونداي-اق جاڭا كادرلارعا دەگەن جوعارى قاجەتتىلىك شىمكەنت (11%), الماتى (10%) جانە نۇر-سۇلتان (9%) قالالارىندا بايقالعان. وتكەن ايدا شىمكەنت قالاسىندا قازىرگىدەن 3,6 ەسە از بوس جۇمىس ورنى ورنالاستىرىعان. ال الماتى وبلىسىندا كەرىسىنشە, جۇمىس تۋرالى ۇسىنىستار سانى ەكى ەسەگە (51%-عا) قىسقارعان.
«ەلەكتروندىق ەڭبەك بيرجاسىنداعى ءاربىر بەسىنشى بوس جۇمىس ورنىن جەكە كاسىپكەرلەر جاريالادى, ونىڭ ىشىندە بوس ورىنداردىڭ 62%-ى 3 ايماققا – قوستاناي جانە تۇركىستان وبلىستارىنا, سونداي-اق شىمكەنت قالاسىنا تيەسىلى», دەپ تولىقتىردى ءسوزىن ا.مولچانوۆسكايا.
جالاقىعا كەلەتىن بولساق, ونىڭ كولەمى وڭىرلەرگە جانە ماماندىققا بايلانىستى ءارتۇرلى. مىسالى, ەڭ كوپ ەڭبەكاقى – اتىراۋ وبلىسىندا. اتالعان وبلىستا قازان ايىندا 1,2 ملن تەڭگەدەن 1,5 ملن تەڭگەگە دەيىن جالاقىسى بار 11 بوس لاۋازىم اشىلعان. جۇمىس بەرۋشىلەر جوبا باسشىلارى مەن مەنەدجەرلەرگە, بازالىق تەحنيكالىق قىزمەت كورسەتۋ جونىندەگى ۇيلەستىرۋشىلەرگە, باس ينجەنەرلەرگە (وڭدەۋ ونەركاسىبىندە), مەحانيك-ينجەنەرلەرگە, كونسترۋكتور-ينجەنەرلەرگە, ينجەنەرلەر-باعدارلاماشىلارعا, جابدىقتاردى جيناقتاۋ جانە تەلەكوممۋنيكاتسيا سالاسىنداعى تەحنيكالىق قولداۋ جونىندەگى ينجەنەرلەرگە وسىنداي ەڭبەكاقى ۇسىنىپ وتىر.
جالپى, اتىراۋ – وڭىرلەر اراسىندا جالاقى جاعىنان كوشباسشى وبلىس. مۇندا جالاقىنىڭ ورتاشا دەڭگەيى بيىلعى ءۇش توقسانداعى جاعداي بويىنشا 419,1 مىڭ تەڭگەنى قۇراعان.
اتىراۋ وبلىسىمەن قاتار, ەڭبەك بيرجاسىندا جوعارى ەڭبەكاقى تولەيتىن بوس جۇمىس ورىندارىن شىعىس قازاقستان, باتىس قازاقستان, اقتوبە, ماڭعىستاۋ وبلىستارىندا جانە نۇر-سۇلتان مەن الماتى سىندى ءىرى قالالاردا تابۋعا بولادى, بۇل وڭىرلەردە ەڭبەكاقى – 600 مىڭنان 800 مىڭ تەڭگە ارالىعىندا.
قازان ايىندا ارنايى بىلىكتىلىگى جوق جۇمىسشىلار ءۇشىن ۇسىنىلاتىن ەڭبەكاقى (29,3 مىڭ بوس جۇمىس ورنى) ەل بويىنشا 58,1 مىڭ تەڭگەنى قۇرادى. ال ءبىلىم بەرۋ سالاسىنىڭ قىزمەتكەرلەرىنە (8,8 مىڭ بوس جۇمىس ورنى) ۇسىنىلعان ورتاشا جالاقى كولەمى 86,4 مىڭ تەڭگەگە تەڭ.
بۇعان قوسا, قازاقستاندىق جۇمىس بەرۋشىلەر قۇرىلىسشىلارعا ايىنا 94,8 مىڭ تەڭگە تولەۋگە دايىن, ولارعا 6,4 مىڭ بوس جۇمىس ورنى ۇسىنىلدى.
دەنساۋلىق ساقتاۋ سالاسىنىڭ كادرلارىنا دەگەن قاجەتتىلىكتىڭ ارتۋىنا بايلانىستى دارىگەرلەر مەن ورتا مەديتسينالىق قىزمەتكەرلەردىڭ جالاقىسى جوعارى بولىپ تۇر. ەلەكتروندىق ەڭبەك بيرجاسىنا شىققان 3,1 مىڭ بوس جۇمىس ورنىنا ورتا ەسەپپەن 114,9 مىڭ تەڭگە ۇسىنىلدى.
جۇمىس بەرۋشىلەر كورسەتكەن ورتاشا ەڭبەكاقى دەنساۋلىق ساقتاۋ ماماندارىنان باسقا, جوعارى لاۋازىمدى تۇلعالارعا, زاڭ شىعارۋشىلار مەن مەملەكەتتىك قىزمەتشىلەرگە (172,3 مىڭ تەڭگە) بەلگىلەندى. سونىمەن قاتار جۇمىس بەرۋشىلەر ءوندىرىس جانە سەرۆيستىك قىزمەت سالاسىنداعى كورپوراتيۆتىك بولىمشەلەردىڭ باسشىلارىنا (باسقارۋشىلارى) – 166,1 مىڭ تەڭگە (1,8 مىڭ بوس ورىن) جانە عىلىم (ستاتيستيكا) مەن تەحنيكا سالاسى ماماندارىنا, ناقتىراق ايتقاندا, ونەركاسىپتىك قاۋىپسىزدىك, ەڭبەكتى قورعاۋ جانە قاۋىپسىزدىك تەحنيكاسى ينجەنەرلەرىنە, ينجەنەر-سمەتاشىلارعا 145,7 مىڭ تەڭگە (2,3 مىڭ بوس ورىن) جالاقى ۇسىندى.
