ءدارى-دارمەك باعاسى باقىلاۋدا

دەنساۋلىق ساقتاۋ مينيسترلىگى ەلىمىزدە دارىلىك قۇرالدارعا باعانىڭ وسۋىنە جول بەرمەۋ ماقساتىندا جەرگىلىكتى اتقارۋشى ورگاندارمەن بىرلەسە وتىرىپ, شۇعىل شارالار قابىلداۋدا. 2014 جىلعى 13 اقپاندا  دەنساۋلىق ساقتاۋ مينيسترلىگى بىرقاتار «فارمقىزمەتتى قولداۋ جانە دامىتۋ قاۋىمداستىعى»; «قازاقستاننىڭ فارممەديندۋسترياسى» قاۋىم­داستىعى; فارماتسەۆتيكالىق ونىمدەر ديستريبيۋتورلارى, فارماتسەۆتيكالىق فيرمالار وكىلدىكتەرى جانە «ۇلتتىق دەنساۋلىق ساقتاۋ پالاتاسى» زاڭدى تۇلعالار بىرلەستىگىمەن دارىلىك قۇرال­دارعا باعانى ۇستاپ تۇرۋ تۋرالى مەمو­راندۋمعا قول قويدى. مەموراندۋمعا قول قويۋداعى ماقسات – تەگىن مەديتسينالىق كومەكتىڭ كەپىلدىك بەرىلگەن كولەمىنە كىرمەگەن, الەۋمەتتىك وسال جانە از قامتىلعان تۇرعىندار ءجيى قولداناتىن 224 ءتۇرلى ءدارى باعاسىن 2014 جىلعى 10 اقپاندا بولعان كۇيىندە ساقتاۋ. مەموراندۋمعا كىرگەن دارىلەر ءتىزىمىن ۇلعايتۋ دا قاراستىرىلعان. مەموراندۋم بارلىق وڭىرلەرگە جىبەرىلدى. مينيسترلىك الەۋمەتتىك وسال توپتار بارىنشا ءجيى قولداناتىن دارىلىك قۇرالدارعا باعانى كوتەرۋ فاكتىلەرىن قاداعالاۋ جونىندە شتاب قۇردى, ونىڭ تەلەفونى: 8-7172-74-31-28. سونداي-اق, دارىلىك اقپارات ورتالىعىنىڭ شۇعىل جەلىسى (8800 080 88 87) تاۋلىك بويى جۇمىس ىستەيدى. كۇن سايىن بارلىق وڭىرلەردە دارىلىك قۇرالدار نارىعىنداعى جاعدايعا مونيتورينگ جۇرگىزىلىپ, جاعداي تۇراقتى ساقتالۋدا. جەكەلەنگەن وقيعالار بايقالدى, اتاپ ايتقاندا, 2014 جىلعى 19 اقپاندا شىعىس قازاقستان وبلىسىندا كەيبىر دارىلەرگە باعانى كوتەرۋ وقيعالارى ورىن الىپ, جەرگىلىكتى اتقارۋشى ورگاندارمەن بىرگە ءتيىستى شارالار قابىلداندى. دەنساۋلىق ساقتاۋ مينيسترلىگى مەموراندۋمدا كورسەتىلگەن دارىلەرگە باعانى كوتەرۋ فاكتىلەرى انىقتالعان جاعدايدا جوعارىدا كورسەتىلگەن تەلەفوندارعا حابارلاسۋدى سۇرايدى, دەپ حابارلادى دسم ءباسپاسوز قىزمەتى.