بانكتەگى جاعداي بىرقالىپتى

«اليانس بانك» اق باسقارما توراعاسى تيمۋر يساتاەۆقا بانكتەگى اعىمداعى احۋالعا قاتىستى بىرنەشە سۇراقتارعا جاۋاپ بەرۋىن وتىنگەن ەدىك. – تيمۋر ريزابەك ۇلى, قازىر­گى جاعدايدا بانكتەگى احۋال تۋرالى ايتقاندا ونىڭ تۇراق­تىلىعى الدىڭعى كەزەكتە تۇرا­دى ەمەس پە. سىزدەردەگى وسى تۇراق­تىلىقتىڭ نەگىزدەرى نەدە دەپ بىلەسىز؟ - اليانس بانك تۇراق­تىلى­­عىنىڭ نەگىزدەرىن ونىڭ قازاقستاننىڭ قارجى نارى­عىن­داعى ستراتەگيالىق تۇرعىدان قاتىسۋىنىڭ جيىرما جىلعا جۋىق تاريحى جانە مىقتى دا الەۋەتتى باسقارۋ توبى قۇرايدى. بانك باس كەڭسەجاي قۇرىلىمىن قايتا قارادى. بۇل ارقىلى ءبىز بيزنەس-ۇدەرىستى جىلدامداتۋ جانە ونىڭ فيليالدار ءۇشىن, سايىپ كەلگەندە, بانك كليەنتتەرى ءۇشىن قولجەتىمدىلىگىن ارتتىرۋ ماقساتىن كوزدەپ وتىرمىز. كە­لەشەكتە ءوز جۇمىسىنىڭ ءتيىم­دىلىگىن ودان ءارى ارتتىرۋ جانە جاڭا ساپالىق دەڭگەيگە كوتەرىلۋ ءۇشىن اليانس بانكتە بارلىق العىشارتتار مەن مۇمكىندىكتەر بار دەپ ايتا الامىز. – الىپقاشپا سوزدەر تۋ­دىرعان سمس حابارلامالار جايىندا نە ايتاسىز؟ - سوڭعى كۇندەردە قازاق­ستان­نىڭ, اسىرەسە, الماتى مەن استانانىڭ تۇرعىندارى نەشە ءتۇرلى كۇدىكتى سمس حابارلامالار مەن WhatsApp Messenger حابارلامالارىن الۋدا. ارينە, ولاردى نيەتى دۇرىس, ادال ادامدار جىبەرمەگەنى بەلگىلى. دالىرەك ايتقاندا, بۇل حابارلامالاردا ءۇش بانكتىڭ: تسەنتركرەديت بانك­تىڭ, كاسپي بانكتىڭ جانە اليانس بانكتىڭ تاياۋدا تاقىر­عا وتى­راتىندىعى تۋرالى ايتىل­عانى قازىر ەشكىمگە قۇپيا ەمەس. مىنە, وسىعان بايلانىس­تى اتالمىش ءۇش بانكتىڭ جانە قازاقستان قار­جىگەرلەرى قاۋىمداستىعى­نىڭ باسشىلارى مەن اكتسيونەرلەرى بۇل اقپاراتتىڭ ارانداتۋشىلىق سيپاتىن ايىپتاي وتىرىپ اتاپ كورسەتەدى. الدەبىرەۋلەر قازاق­ستاننىڭ قارجى جۇيەسىندە ءدۇر­بەلەڭ تۋعىزۋ ماقساتىن كوزدەگەنى بايقالادى. وسىنداي جاعدايدا ءبىز, البەتتە, قول قۋسىرىپ قاراپ وتىرا المايمىز. جوعارىداعى ءۇش بانك بىرىگىپ اقپاراتتىق شابۋىلدى تويتارۋعا كىرىستى, سونىمەن بىرگە, قۇقىق قورعاۋ ورگاندارىنا شاعىمداندى. – بانكتىڭ بۇدان بىلايعى ءىس-ارەكەتى, كليەنتتەرگە قاتىستى سايا­ساتى  جايلى ايتا كەتسەڭىز؟ ءوز ءمىن­دەتتەمەلەرىڭىزدى بۇرىن­عى­سىنشا ورىنداي بەرەسىزدەر مە؟ - سوڭعى كۇندەردە كليەنتتەر تاراپىنان بانك قىزمەتتەرىنە سۇرانىمنىڭ وسۋىنە بايلانىستى بولىمشەلەرىمىزدىڭ جۇمىس كەستەسى ايتارلىقتاي ۇزارتىلعانىن ايتۋعا ءتيىسپىن. ويتكەنى, قىزمەت كور­سەتۋدىڭ جوعارى ساپاسىمەن ءاردايىم كليەنتتەردىڭ كوڭى­لىنەن شىعۋ ءبىزدىڭ بانك ءۇشىن باستى باسىمدىق بولىپ قالا بەرمەك. اليانس بانك شتاتتىق ءتار­تىپتە جۇمىس ىستەۋىن ودان ءارى جالعاستىراتىنىن اتاپ كور­سەتۋىم قاجەت. سونداي-اق, قازاق­ستاندىقتاردىڭ - ءبىزدىڭ كليەنتتەرىمىزدىڭ سالىمدارى بويىن­شا دا, اعىمداعى ەسەپشوتتار بويىنشا دا بارلىق مىندەتتەمەلەرىمىز تولىقتاي ورىندالماق. تاعى ءبىر ايتا كەتەرلىك جاي, كليەنتتەرىمىزدىڭ سالىمدارىن مەملەكەت, ياعني قازاقستاننىڭ دەپوزيتتەردى كەپىلدەندىرۋ قورى قورعايدى. سەبەبى, اكتسيالاردىڭ 67 پايى­زىنا يە بولىپ وتىرعان مەملەكەت, بۇرىنعىسىنشا, اليانس بانكتىڭ باستى اكتسيونەرى بولىپ قالا بەرەدى. بۇل جاي دا بانك تۇراقتىلىعىن, جاعدايدىڭ بايىپ­تىلىعىن ساقتاۋ ورايىن­داعى اسا ماڭىزدى فاكتور ەكەندىگى كۇمانسىز. اڭگىمەلەسكەن  قورعانبەك امانجول, «ەگەمەن قازاقستان». الماتى.