امىرە قاشاۋباەۆتىڭ زيراتىن جاڭارتۋ تۋرالى باستاما كوتەرگەن شىعىس قازاقستان وبلىستىق امىرە قاشاۋباەۆ اتىنداعى مەملەكەتتىك فيلارمونيانىڭ ديرەكتورى ايبەك بەكبوسىنوۆ.
ء«بىزدىڭ فيلارمونيامىز امىرە قاشاۋباەۆ اتىندا بولعاندىقتان ءانشى اتامىزدىڭ زيراتىنىڭ قازىرگى جاعدايىن كورگىم كەلدى. وسى ماقساتپەن الماتىعا ارنايى ۇشىپ كەلدىم. امىرەنىڭ زيراتى الماتىداعى ورتالىق زيراتتا ورنالاسقان ەكەن. زيراتىن كورىپ, ونى جوندەپ, جاڭارتۋ قاجەت ەكەنىنە كوزىم جەتتى. سودان ءوزىم تانيتىن سەمەيدەگى كاسىپكەر جىگىتتەرگە حابارلاسىپ, زيراتتى جوندەۋ تۋرالى ءوز ويىمدى ايتتىم. ولار قولداۋ ءبىلدىرىپ, وسىلايشا امىرە اتامىزدىڭ زيراتى جاڭارتىلدى. ارينە ايتا كەتەيىك, امىرە – ول تەك سەمەي عانا ەمەس, ول بار قازاقتىڭ امىرەسى», دەدى وبلىستىق فيلارمونيانىڭ ديرەكتورى.
ايگىلى ءانشىنىڭ جاڭارتىلعان زيراتىنىڭ باسىنا ۇلىقبەك ەسداۋلەت, تۇرسىن جۇرتباي, روزا رىمباەۆا سەكەن تۇرىسبەكوۆ سەكىلدى بەلگىلى ادەبيەت, ونەر, مادەنيەت قايراتكەرلەرى جينالىپ, قۇران باعىشتاپ, ايگىلى ءانشىنىڭ ارۋاعىنا تاعزىم ەتتى. ايتا كەتەيىك, الماتىنىڭ ورتالىق زيراتىنا ءالىبي جانگەلدين, يسا بايزاقوۆ, دينا نۇرپەيىسوۆا, مۇحتار اۋەزوۆ, امىرە قاشاۋباەۆ, ەرمۇحان بەكماحانوۆ, احمەت جۇبانوۆ, قاليبەك قۋانىشباەۆ, كۇلاش بايسەيىتوۆا, قانىش ساتباەۆ, شاكەن ايمانوۆ, مۇقان تولەباەۆ, قاپان مۋسين سىندى بەلگىلى تۇلعالارى جەرلەنگەن. ەسكە سالساق, امىرە قاشاۋباەۆ شەت ەلدە ونەر كورسەتىپ قازاق ەلىن تانىتقان تۇڭعىش ءانشى بولدى.
گەرمانيانىڭ ماينداعى فرانكفۋرت قالاسىنداعى كونتسەرتكە قاتىسىپ, قازاقتىڭ حالىق اندەرىن تاعى دا الەمگە پاش ەتتى. امىرە قاشاۋباەۆتىڭ اندەرى دۇنيە ءجۇزى مادەنيەتىنىڭ ءىرى وكىلدەرى رومەن روللان, انري باربيۋس تاعى باسقالار تاراپىنان جوعارى باعا العان.
ا.ۆ. زاتاەۆيچ دارا تالانتتىڭ «بالقاديشا», «دۋداراي», «بەس قاراگەر», «كوك كوبەلەك» تاعى دا باسقا اندەرىن جازىپ العان. ونىڭ انشىلىك ونەرىن, ونەردىڭ پارقىن تەرەڭ تۇسىنەتىن ماماندار ا.ۆ.لۋناچارسكي, گ.ليۋبيموۆتەر جانە قازاق ادەبيەتى مەن ونەرىنىڭ كورنەكتى وكىلدەرى م.اۋەزوۆ, س.سەيفۋللين, ي.بايزاقوۆ, ءا.مارعۇلان, ج.ەلەبەكوۆ, ا.جۇبانوۆ, ق.جانداربەكوۆتەر جوعارى باعالاعان. امىرە قاشاۋباەۆ جونىندە بىرنەشە زەرتتەۋلەر, كوركەم شىعارمالار جارىق كورگەن.
