قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان حالىقارالىق كورمە جوباسىن قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى, «ەلباسى اكادەمياسى» كورپوراتيۆتىك قورى, قازاقستان رەسپۋبليكاسىنىڭ سىرتقى ىستەر مينيسترلىگى جانە قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىلىگىمەن بىرلەسە ۇيىمداستىردى.
كورمە ەلباسى ن.ءا. نازارباەۆتىڭ قازىرگى قازاقستاندىق مەملەكەتتىلىك تۇجىرىمداماسىن جۇزەگە اسىرۋ ناتيجەسى نەگىزىندەگى قازاقستان رەسپۋبليكاسى دامۋىنىڭ ماڭىزدى كەزەڭدەرىن كورسەتۋدى كوزدەيدى.
«1991 جىلعى 16 جەلتوقساندا ەگەمەندىگىمىزدى مويىنداعان الەمدەگى ەڭ العاشقى ەل تۇركيا رەسپۋبليكاسى بولدى. بۇل تاريحي وقيعانى قازاقستان حالقى جوعارى باعالايدى ءارى ماڭگىلىك جادىندا ساقتايدى. وسىعان بايلانىستى قازاقستان رەسپۋبليكاسىنىڭ تۇڭعىش پرەزيدەنتى – ەلباسىمىز نۇرسۇلتان نازارباەۆتىڭ: «قازاقستان مەن تۇركيا – ەجەلدەن ەنشىسى ءبىر, تامىرلاس تۋىس ەلدەر», – دەگەن ۇلاعاتتى ءسوزى بار. بۇگىنگى كورمەمىزدىڭ «قازاقستان جولى. تۇركى بىرلىگى» دەپ اتالۋى دا كەزدەيسوق ەمەس. كورمە قازاقستان تاۋەلسىزدىگىنىڭ 30 جىلدىعىنا جانە باۋىرلاس تۇركى مەملەكەتتەرىنىڭ ەلىمىزدى نىعايتۋداعى رولىنە ارنالعان», دەدى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ديرەكتورى باقىتجان تەمىربولات.
«قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ كورمەلەرى بۇعان دەيىن رەسەي مەن جاپونيادا, ال بۇگىن تۇركيادا وتكىزىلىپ وتىر. بۇل قازاقستان تاۋەلسىزدىگىنىڭ 30 جىلدىعى قارساڭىندا ءوتىپ جاتقان وتە ماڭىزدى ءىس-شارا. كورمەنىڭ «قازاقستان جولى: تۇركى بىرلىگى» اتاۋى نۇرسۇلتان ءابىش ۇلى نازارباەۆتىڭ تۇركى الەمىنىڭ جاندانۋىنا, قازاقستاننىڭ تاۋەلسىزدىك الۋىنا قوسقان زور ۇلەسىن جانە ونىڭ زاماناۋي مەملەكەتتى جاڭعىرتۋداعى ءرولىن كورسەتەدى», دەپ اتاپ ءوتتى قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىسى ابزال ساپاربەك ۇلى.
تۇركيا رەسپۋبليكاسىنىڭ پرەزيدەنتى رەجەپ تايپ ەردوعاننىڭ قۇتتىقتاۋ حاتىن تۇركيا پرەزيدەنتى اكىمشىلىگى جانىنداعى ۇلتتىق كىتاپحانانىڭ ديرەكتورى ايحان تۋگلۋ وقىپ بەردى.
«قازاقستان تۇركى كەڭەسى, تۇركپا, تۇركسوي جانە تۇركى اكادەمياسى سياقتى ۇيىمداردىڭ قۇرىلۋى مەن ينستيتۋتسيونالدىق دامۋىندا جەتەكشى رولگە يە. تۇركى الەمىنىڭ سارابدال كوشباسشىسى, قازاقستاننىڭ تۇڭعىش پرەزيدەنتى – ەلباسى نازارباەۆتىڭ بۇل ۇدەرىستەگى بەكەم ۇستانىمى ءبىزدى جىگەرلەندىردى. پرەزيدەنت قاسىم-جومارت توقاەۆ مىرزا دا ءبىزدىڭ تۇركى الەمىندەگى ىنتىماقتاستىعىمىزدىڭ تابىستى دامۋىنا بەلسەندى ۇلەس قوسۋدا. حالىقتارىمىز اراسىنداعى ءتىل, نانىم-سەنىم, تاريح سىندى رۋحاني كوپىرلەردى كۇشەيتە وتىرىپ, بارلىق ىستەردە بىرلىككە قول جەتكىزەمىز دەپ سەنەمىز», دەلىنگەن رەجەپ تايپ ەردوعاننىڭ قۇتتىقتاۋىندا.
كورەرمەندەر نازارىنا ەلباسى كىتاپحاناسىنىڭ ارحيۆ, كىتاپ, مۋزەي قورىنداعى 400-دەن استام ساقتاۋ بىرلىگى, ونىڭ ىشىندە كيىم, قارۋ, اسكەري جانە ات ابزەلدەرى توپتاماسىنداعى زاتتار, ازاتتىق ءۇشىن كۇرەستىڭ ءتۇرلى كەزەڭدەرىندەگى قازاقستان تاريحى بويىنشا ارتەفاكتىلەر ۇسىنىلدى. ماسەلەن, ونىڭ اراسىندا XIX عاسىرداعى قازاق قىلىشى, بىلەزىكتەر مەن ساقينالار بار.
« ۇلى دالا ەلى: كەشەگى مەن بۇگىنگىنىڭ اراسى» بولىمىندەگى مۋزەي جادىگەرلەرى مەن ارحيۆ قۇجاتتارى ارقىلى قازاقستاننىڭ تاريحىمەن تانىسۋعا بولادى. سونداي-اق كورمە جادىگەرلەرى قازاقستاننىڭ تۇڭعىش پرەزيدەنتى – ەلباسى ن.ءا. نازارباەۆتىڭ جەكە قاسيەتتەرىن قالىپتاستىرعان ورتاعا تەرەڭ بويلاتىپ, ونىڭ « ۇلى دالانىڭ جەتى قىرى» ماقالاسىنىڭ باعدارلامالىق تەزيستەرىمەن تانىستىرادى. ەكسپوزيتسياعا ەتنوگرافيالىق كەشەن, زەرگەرلىك بۇيىمدار, كيىم-كەشەك, قارۋ-جاراق, اسكەري جانە ات ابزەلدەرى توپتاماسىنان الىنعان زاتتار, سونداي-اق قازاقستاندىق جانە رەسەيلىك تانىمال سۋرەتشىلەردىڭ كارتينالارى قويىلعان.
«قازاقستان جولى» ءبولىمى ازاتتىق العاننان كەيىنگى قازاقستاننىڭ مەملەكەتتىك دامۋ ستراتەگيالارىنىڭ, قازىرگى زامانعى مەملەكەتتىلىكتىڭ تابىستى, تۇراقتى قالىپتاسۋىنىڭ وزەگىنە اينالعان توتاليتارلىق جۇيەدەن دەموكراتيالىق ەركىندىك پەن كوپقۇرىلىمدى ەكونوميكاعا وتۋگە باعىتتالعان نەگىزگى رەفورمالاردىڭ مازمۇنىن اشادى. ءبولىمنىڭ ەكسپوزيتسياسىندا ارحيۆتىك فوتو جانە بەينەماتەريالدار, قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆتىڭ قۇرمەت بەلگىلەرىنىڭ, قازاقستاندىق جانە حالىقارالىق قوعامدىق ناگرادالاردىڭ, الەمدىك جانە ءداستۇرلى دىندەر سەزىنە قاتىسۋشىلار تارتۋ ەتكەن سىيلىقتاردىڭ مۋزەيلىك جيناعى ۇسىنىلعان.
«تۇركى بىرلىگى» ءبولىمى تۇركيا رەسپۋبليكاسىنىڭ ءبىرىنشى باسشىلارى مەن دەلەگاتسيا جەتەكشىلەرىنىڭ ماراپاتتارى, ديپلوماتيالىق سىيلىقتارى, ەكى ەل باسشىلارىنىڭ رەسمي قۇجاتتارى مەن جەكە حاتتارى ارقىلى قازاقستان مەن تۇركيا اراسىنداعى ەكىجاقتى قارىم-قاتىناستىڭ جوعارى دەڭگەيىن ايقىن كورسەتەدى. سونىمەن قاتار ەلباسىنىڭ جەكە كىتاپحاناسى مەن جەكە ارحيۆىنەن الىنعان كىتاپتار جيىنتىعىندا تۇركى بىرلىگى يدەيالارى كەڭىنەن كورىنىس تاپقان.
«قازاقستان جولى. تۇركى بىرلىگى» كورمەسىندە ن.ءا. نازارباەۆتىڭ باستى ساياسي باستامالارىنا باسىمدىق بەرىلگەن. مازمۇنى باي, ماعىناسى تەرەڭ باستامالار الەمدىك قاۋىمداستىق تاراپىنان وڭ باعا الىپ, بۇگىندە دۇنيە ءجۇزى بويىنشا ايتارلىقتاي ناتيجە بەردى.
