جۇرتشىلىققا بارىنەن بۇرىن ابدەن كوز ۇيرەنىپ قالعان Facebook اتاۋىنىڭ Meta دەپ وزگەرۋى تاڭسىق بولدى. ال رەبرەندينگتىڭ استارىندا نە جاتىر؟ الەمنىڭ ميللياردتاعان ادامىن ءبىر وزىنە «بايلاپ» قويعان قاۋقارلى كومپانيانىڭ اياقاستىنان ۇيرەنشىكتى اتاۋىن وزگەرتۋى تەگىن ەمەس. ۆيرتۋالدى عالامنىڭ بۇگە-شىگەسىن جەتىك مەڭگەرگەن تسۋكەربەرگتىڭ بۇل شەشىمى ءبىر كۇندە تۋعان جوق. ول كۇندەلىكتى تىرشىلىگىمىزگە metaعالامدى (metaverse) ەنگىزبەكشى, ياعني AR مەن VR تەحنولوگيالارى بىزگە ۇيرەنشىكتى داعدى بولىپ قالىپتاسپاق.
AR مەن VR تەحنولوگيالارى نە ەكەنىن جۇرتشىلىق جاقسى بىلسە كەرەك. بۇل – ۆيرتۋالدى الەم. ءبىر سوزبەن ايتقاندا, كوزىلدىرىك, شلەم, قۇلاققاپ سەكىلدى قۇرىلعىلار ارقىلى بەرىلەتىن 3-5D تەحنولوگيالارىنىڭ كومەگىمەن ءسىز باسقا الەمنىڭ شىندىعىنا ەنەسىز, ونداعى تىرشىلىكتى ناقتى ومىردەگىدەي سەزىنە الاسىز. مىسالى, ءسىز 3D كوزىلدىرىگىن كيىپ الىپ, كەنەت كورىپ وتىرعان ءفيلمنىڭ نەمەسە ويناپ وتىرعان بەينەويىننىڭ ىشىنە ەنىپ, ونداعى وقيعالاردى ناقتى ومىردەگىدەي سەزىنسەڭىز, وندا بۇل – VR تەحنولوگياسى. ال كوشەدە كەلە جاتىپ, الدىڭىزدان كومپيۋتەر الەمىنەن عانا كورەتىن درەگونايت پوكەمونى شىعا كەلسە, بۇل – AR.
مىنە, وسىنداي سەنسورلى كەڭىستىكتى تسۋكەربۋرگ كۇندەلىكتى ومىرىمىزگە كىرىكتىرمەك. ء«دال قازىر مەنىڭ ايتىپ جاتقانىم سىزدەرگە قيال-عاجايىپتاي كورىنۋى مۇمكىن. بىراق جاقىن بولاشاقتا ترانسفورماتسيا جاسالعان مۇنداي قارىم-قاتىناس سىزدەرگە ۇيرەنشىكتى بولىپ قالادى», دەيدى م.تسۋكەربەرگ.
ونىڭ تۇسىندىرۋىنشە, ەندى Metaنى قولدانۋشىلار تەك سمارتفوندارعا ءۇڭىلىپ قانا قويماي, 3D تەحنولوگيالاردىڭ كومەگىمەن الەمنىڭ ەكىنشى شەتىندەگى ادامداردىڭ جانىندا وتىرعانداي سەزىنەدى. ولاردىڭ «جانىندا وتىرىپ», بىرگە فيلم كورەدى, شاحمات وينايدى, كونفەرەنتسيا, جيىنداردا دا بىرگە جۇرگەندەي سەزىمدە بولادى.
تسۋكەربەرگ كوتەرىپ وتىرعان تۇجىرىمدامانىڭ ءون بويىندا ينتەرنەت الەمىن جانە كۇندەلىكتى قوعام قارىم-قاتىناسىن ۆيزۋالدى دەڭگەيگە كوتەرۋ يدەياسى جاتىر. «وسى تەحنولوگيالىق جاڭارۋ ارقىلى ءبىز ادامداردى ءبىر-بىرىمەن جاقىنداستىرا تۇسەمىز. الايدا كومپانيانىڭ اتاۋى وزگەرگەنىمەن ءبىزدىڭ باستى ميسسيامىز سول قالپىندا قالا بەرەدى. نەگىزگى باعىتقا مەتاالەمدى دامىتۋ ماقساتى عانا قوسىلدى», دەيدى م.تسۋكەربەرگ كوك لەنتا تۇرىندە مەبيۋس بەينەلەنگەن جاڭا لوگوتيپتى تانىستىرىپ جاتىپ.
نە دەسەك تە بۇل Facebook قولدانۋشىلارى ءۇشىن ەلەۋلى جاڭالىق بولدى جانە بۇل ەرەكشە شەشىم كومپانيا اكتسيالارىنىڭ كۇرت وسۋىنە الىپ كەلدى. ماسەلەن, ونىڭ اتاۋى وزگەرەدى دەگەن حابارلاندىرۋدان كەيىن-اق Facebook اكتسيالارى بىردەن 4 پايىزعا ارتقان. وتكەن اپتاداعى قور نارىعىنىڭ قورىتىندىسى بويىنشا ونىڭ ءار اكتسياسىنىڭ قۇنى 323 دوللارعا باعالاندى.
