جاڭا كوپىردىڭ قۇرىلىسى تۋرالى ەلوردانىڭ قالالىق ءماسليحات جانىنداعى قوعامدىق كەڭەس وتىرىسىندا ايتىلدى.
«بىزگە قالا تۇرعىندارىنان كوپ سۇراقتار كەلىپ جاتادى. سونىڭ ءبىرى ەلوردادا كولىك كەپتىلىسىن ازايتىپ, سول جاعالاۋ مەن وڭ جاعالاۋ اراسىنداعى كولىك اعىنىن رەتتەۋ ءۇشىن ەكى كوپىر سالىنۋى ءتيىس ەدى. ءبىرى تاۋەلسىزدىك داڭعىلىنىڭ بويىندا, ەكىنشى جاڭا ۆوكزال جاقتا. بۇگىندە سول كوپىرلەردى سالۋ جاعى قالاي بولىپ جاتىر؟», دەپ سۇراق قويدى قوعامدىق كەڭەس مۇشەسى ەرجان باعداتوۆ.
بۇل سۇراققا نۇر-سۇلتان قالاسىنىڭ كولىك جانە جول-كولىك ينفراقۇرىلىمىن دامىتۋ باسقارماسىنىڭ باسشىسى جانسۇلتان ساپارباەۆ جاۋاپ بەردى.
«تاۋەلسىزدىك داڭعىلىنداعى كوپىر بويىنشا جوبالىق-سمەتالىق قۇجاتى بەكىتىلىپ, مەردىگەر كومپانيا انىقتالدى. بۇگىندە بيۋدجەتتى ناقتىلاۋ بويىنشا ءوتىنىش جىبەرىلدى. رەسپۋبليكالىق بيۋدجەتتەن كەلەسى جىلعا كوپىر قۇرىلىسىنا 10 ملرد تەڭگە سۇرادىق. ازىرگە جاۋابىن كۇتىپ وتىرمىز. جوبانىڭ جالپى قۇنى 16 ملرد-قا جۋىق تەڭگەنى قۇرايدى. ەكىنشى كوپىر «نۇرلى جول» ۆوكزالى ماڭىنداعى ۇلى دالا داڭعىلى بويىندا بوي كوتەرمەك. ءبىز ول كوپىردى سالۋعا قاتىستى جۋىردا ەكىنشى رەت بايقاۋ جاريالادىق. سەبەبى ءبىرىنشى رەت جاريالاعانىمىزدا كوپىر سالۋعا ەشكىم نيەت تانىتپادى. قازىر مەردىگەر كومپانيانى تاۋىپ, كەلەسى جىلى قالا كۇنى قارساڭىندا كوپىر قۇرىلىسىن اياقتايمىز دەپ جوسپارلاپ وتىرمىز», دەپ جاۋاپ بەردى جانسۇلتان ساپارباەۆ.
