الەم • 03 قاراشا، 2021

اقش 11 جاسقا دەيىنگى بالالارعا ۆاكتسينا سالۋدى ۇسىندى

اقش-تىڭ اۋرۋدى باقىلاۋ جانە الدىن الۋ ورتالىعىنىڭ ديرەكتورى روشەل ۆالەنسكي 5-11 جاس ارالىعىنداعى بالالاردى كوروناۆيرۋسقا قارسى ەگۋ ءۇشىن امەريكالىق Pfizer جانە نەمىستىڭ BioNTech كومپانيالارىنىڭ ۆاكتسينالارىن قولدانۋدى ۇسىندى، دەپ حابارلايدى Egemen.kz.

گاۋھار قاپاش

اقش-تىڭ اۋرۋلاردى باقىلاۋ جانە الدىن الۋ ورتالىقتارىنىڭ توبى جۇرگىزگەن مودەلدەۋگە سايكەس، 5-11 جاس ارالىعىنداعى بالالاردى ۆاكتسينالاۋ كوروناۆيرۋس ينفەكتسياسىنىڭ تارالۋىن 2021 جىلدىڭ قاراشاسىنان 2022 جىلدىڭ ناۋرىزىنا دەيىن 8% تومەندەتەدى. توپ مۇشەسى سارا وليۆەردىڭ ايتۋىنشا، ۆاكتسيناتسيا ۆيرۋستىڭ ىقتيمال جاڭا نۇسقاسىنىڭ اسەرىن ازايتۋعا كومەكتەسەدى.

بۇعان دەيىن اقش دەنساۋلىق ساقتاۋ جانە الەۋمەتتىك قىزمەت مينيسترلىگىنىڭ جانىنداعى ازىق-ت ۇلىك جانە ءدارى-دارمەكتەر ساپاسى باسقارماسى 5-11 جاستاعى وقۋشىلارعا Pfizer جانە BioNTech كومپانيالارىنىڭ كوروناۆيرۋسقا قارسى ۆاكتسينالارىن قولدانۋدى ماقۇلداعان بولاتىن.

وقۋ جىلى باستالعالى بەرى اقش-تا بالالار اراسىندا كوروناۆيرۋسقا شالدىققاندار سانى تەز ارتقانى بايقالدى. اۋرۋحانالارعا كوروناۆيرۋس جۇقتىرىپ تۇسكەن بالالاردىڭ سانى ماۋسىمنىڭ اياعىنان تامىزدىڭ ورتاسىنا دەيىن التى اپتا ىشىندە بەس ەسە ءوستى دەلىنگەن. 5-11 جاس ارالىعىنداعى بالالار ەرەسەكتەرگە ارنالعان دوزانىڭ ۇشتەن ءبىر بولىگىن قۇرايتىن ۆاكتسينالار الادى دەپ حابارلانعان. ەكىنشى دوزا ءبىرىنشى دوزانى العان ساتتەن باستاپ ءۇش اپتادان كەيىن ەنگىزىلەدى.

سونداي-اق يممۋنيتەتى ءالسىز بالالارعا ءۇشىنشى دوزا سالىنبايتىنى اتاپ ءوتىلدى. اقش-تىڭ اۋرۋلاردى باقىلاۋ جانە الدىن الۋ ورتالىقتارىنىڭ مالىمەتتەرى بويىنشا، ەلدەگى 1،9 ميلليون بالاعا كوروناۆيرۋس دياگنوزى قويىلعان.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز