ءيا 123 جىلدان بەرى ۇزدىكسىز ءبىلىم بەرىپ كەلە جاتقان احمەت بايتۇرسىنوۆ اتىنداعى №1 مەكتەپ-ليتسەيىنەن تۇلەپ ۇشقان ەلىمىزگە تانىمال, ابىرويلى ازاماتتار كوپ.
سولاردىڭ ءبىرى تۇركىستان قالاسىنىڭ قۇرمەتتى ازاماتى, باتاگوي, ابىز-اقساقال ابدىبەك قاجى بەيسەنوۆتىڭ وسى مەكتەپتى بىتىرگەنىنە 66 جىل تولىپتى. ءبىر قىزىعى مەكتەپتىڭ سىنىبى دا 66 بولىپ شىقتى. بيىلعى جىلى مەكتەپكە تۇڭعىش قادام باسقان وقۋشىلار ءبىلىم الاتىن ءبىر سىنىپتى بەيسەنوۆتەر اۋلەتى تۇگەلدەي جاراقتاندىرىپ بەرگەن. ابدىبەك قاجى مەن ۇلپاتشا اجە 10 پەرزەنتىنەن 36 نەمەرە, 40 شوبەرە ءسۇيىپ وتىر. اقساقالدىڭ وتباسى «ايالى الاقانى اق اجەنىڭ», «ۇلگىلى وتباسى» اتتى بايقاۋلاردىڭ باس جۇلدەسىن يەمدەنسە, ابىز اتانىڭ ءوزى رەسپۋبليكالىق دەڭگەيدە وتكىزىلگەن «باتامەنەن ەل كوگەرەر...» بايقاۋلارىندا نارتاي جانە مولدا مۇسا اتىنداعى نوميناتسيالاردى جەڭىپ الدى. كىشى ۇلى ءالجان قاجى دا اكە جولىن باسىپ, وتكەن جىلى وبلىس بويىنشا باتاگويلەر بايقاۋىندا باس جۇلدەنى يەلەندى. اقساقالدىڭ ولەڭدەرى مەن وي-پىكىرلەرى, قوعامداعى ماسەلەلەر تۋرالى ماقالالارى رەسپۋبليكالىق, وبلىستىق دەڭگەيدەگى گازەت-جۋرنالداردا جاريالانعان.
كۇنى كەشە ءومىرى ونەگە ابدىبەك بەيسەنوۆتىڭ اتىنا مەكتەپتەن باستاۋىش سىنىپ كابينەتىنىڭ اشىلۋ سالتاناتى وتكىزىلدى. جيىنعا وبلىستىق جانە قالالىق ءبىلىم سالاسىنىڭ باسشىلارى, زيالى قاۋىم وكىلدەرى, ۇلاعاتتى ۇستازدار مەن جۋرناليستەر قاتىسىپ, جۇرەكجاردى لەبىزدەرىن جەتكىزدى.
تۇركىستان
