ۆەدومستۆو مالىمەتىنە سۇيەنسەك, وقيعا 27 قازاندا بولعان. زارداپ شەككەن بارلىق اسكەري قىزمەتشى اۆياتسيامەن ەلورداداعى گوسپيتالگە جەتكىزىلگەن.
«مامانداندىرىلعان مەديتسينالىق كومەك كورسەتۋ ماقساتىندا ماڭعىستاۋ وبلىسىنداعى وقۋ-جاتتىعۋ پوليگونىن جوسپارلى تازالاۋ كەزىندە جاراقات العان 5 اسكەري قىزمەتشى اسكەري-كولىكتىك اۆياتسيا ۇشاعىمەن نۇر-سۇلتان قالاسىنداعى باس اسكەري-كلينيكالىق گوسپيتالىنە جەتكىزىلدى. اسكەري قىزمەتشىلەردى حيرۋرگيا سالاسىنىڭ ماماندارى تەكسەردى, ولاردىڭ جاعدايى ءبىر قالىپتى, ناشارلاماعان. دياگنوستيكالىق جانە ەمدەۋ پروتسەدۋرالارىنىڭ بارلىق كەشەنى جۇرگىزىلۋدە.
قورعانىس مينيسترلىگى جالعان اقپارات تاراتپاۋدى, تەك رەسمي اقپارات كوزدەرىنە سەنۋدى سۇرايدى», دەلىنگەن ۆەدومستۆونىڭ ءباسپاسوز قىزمەتى ۇسىنعان مالىمەتتە.
