ءمينيستردىڭ ءوڭىر اكتيۆىمەن كەزدەسۋىنە وبلىس اكىمى ماحامبەت دوسمۇحامبەتوۆ قاتىستى.
جۇمىس ساپارى باعدارلاماسىنداعى ماڭىزدى شارا — ءمينيستردىڭ اتىراۋ وبلىسى قوعامدىق كەڭەسىنىڭ مۇشەلەرىمەن كەزدەسۋى بولدى. ايدا بالاەۆا وسى جىلى قابىلدانعان زاڭنامالىق تۇزەتۋلەردى ەسكەرە وتىرىپ, قوعامدىق كەڭەستەردىڭ قىزمەتىن ۇيلەستىرۋ بويىنشا اتقارىلىپ وتىرعان جۇمىس تۋرالى ايتىپ بەردى. مينيستر اتىراۋلىق قوعامدىق كەڭەس مۇشەلەرىن ولارعا بەرىلگەن زاڭنامالىق وكىلەتتىكتەردى ءوڭىر يگىلىگى ءۇشىن بەلسەندى ءارى ءتيىمدى پايدالانۋعا شاقىردى.
ودان بولەك, زيالى قاۋىم وكىلدەرىمەن جەكە كەزدەسۋ بارىسىندا, مينيستر «ۇلتتىق رۋحاني جاڭعىرۋ» جوباسىن تانىستىرىپ, ونىڭ نەگىزگى ءۇش باعىتى بويىنشا جوسپارلانعان ءىس-شارالار تۋرالى باياندادى. اتاپ ايتقاندا: ەلدىڭ زياتكەرلىك الەۋەتىن جانە مەملەكەتتىك ءتىلدىڭ مارتەبەسىن ارتتىرۋ, «ەل رۋحى» اتتى مادەنيەت سالاسىنداعى قىزمەتتەردىڭ قولجەتىمدىلىگىن ارتتىرۋ بويىنشا شارالار كەشەنىن ىسكە اسىرۋ, سونداي-اق «تاۋەلسىزدىك ۇرپاقتارى» اتالاتىن جاستار ءۇشىن جاڭا مۇمكىندىكتەر جاساۋ باعىتى.
ەسكە سالا كەتەيىك, ۇلتتىق جوبا جەتى مىندەتتى, 20-دان استام كورسەتكىشتى جانە 60-تان استام ءىرى ءىسشارانى قامتيدى.
مينيستر ا.بالاەۆا ءوز سوزىندە: «اتىراۋ ءوڭىرى – قاي كەزدە دە قازاقىلىعىن جوعالتپاعان, ۇلتتىق سالت-داستۇرگە بەرىك, رۋحانياتى جوعارى مەكەن. ءبىز قازىر «رۋحاني جاڭعىرۋ» باعدارلاماسى اياسىندا وتكەن تاريحىمىزدى تۇگەندەپ, كوپتەگەن وقيعالارعا جاڭاشا باعا بەرىپ جاتىرمىز. بۇل جۇمىستا, وسى ماڭىزدى ءوڭىردىڭ تاريحىن تۇگەندەپ, رۋحانياتىن كوتەرىپ, وسكەلەڭ ۇرپاققا ۇلتتىق تاربيە بەرىپ, دۇرىس جول كورسەتەتىن ەل زيالىلىلارى — سىزدەردىڭ قولداۋلارىڭىز قاجەت» دەدى.
مينيستر ەل دامۋىندا مەملەكەت باسشىسى ۇلتتىق ينتەلليگەنتسيانىڭ رولىنە ەرەكشە ماڭىزدى كوڭىل بولەتىنىن ايتا وتىرا, ۇلتتىق جوبانى جەرگىلىكتى جەرلەردە جۇزەگە اسىرۋعا بەلسەندى اتسالىسۋعا شاقىردى.
اتىراۋ وبلىسىنا جۇمىس ساپارىنىڭ سوڭىندا مينيستر جىلىوي اۋدانىنا بارىپ, جەرگىلىكتى تۇرعىندارمەن كەزدەسىپ, اقمەشىت قورىمىنا باردى.
ايتا كەتەيىك, قازىر ەلدەگى ەپيدەميولوگيالىق احۋالدى بىرتىندەپ قالىپقا كەلتىرۋدىڭ ارقاسىندا مينيسترلەردىڭ وڭىرلەرگە شىعۋى جانە حالىقپەن كەزدەسۋلەرى تۇراقتالىپ كەلەدى.
بۇعان دەيىن مەملەكەت باسشىسىنىڭ تاپسىرمالارىن ىسكە اسىرۋ ماقساتىندا ا.بالاەۆا وسىنداي كەزدەسۋلەردى نۇر-سۇلتان, الماتى قالالارىندا, سونداي-اق باتىس قازاقستان وبلىسىندا وتكىزگەن بولاتىن.
