بۇقارالىق اقپارات قۇرالدارىنىڭ بىرىندە الماتىداعى №85 ورتا مەكتەپ وقۋشىسى دەنە شىنىقتىرۋ ساباعىنان كەيىن اۋرۋحاناعا تۇسكەنى, بالانىڭ اناسى مۇعالىمدى ۇردى دەپ ايىپتاعانى تۋرالى اقپارات تارادى. اتالعان ءبىلىم مەكەمەسىنىڭ ديرەكتورى نينەل ەركەباەۆا وقيعاعا قاتىستى پىكىر ءبىلدىرىپ, ۇستاز جايلى ايتىپ بەردى.
«تاراعان اقپاراتتىڭ ۆيدەوسى بار. ول جەردە ەشقانداي قول كوتەرۋ جوق. بىراق وقۋشىنىڭ اناسى ونىڭ قاتتى تاياق جەگەنىن جانە ميى شايقالعانىن ايتادى. بالا قازىر اۋرۋحانادا. ءبىزدىڭ سپورت زالدا بەينەباقىلاۋ ورناتىلعان, وسى بەينەجازبا ارقىلى مۇعالىمنىڭ وقۋشىنى ۇرماعانىن دالەلدەپ وتىرمىز», دەيدى مەكتەپ ديرەكتورى.
ديرەكتور دۇيسەنبى كۇنى مۇعالىمنىڭ ءوز ەركىمەن جۇمىستان كەتكەنىن ايتتى.
«دەنە شىنىقتىرۋ ءپانىنىڭ مۇعالىمى بىزدە 21 جىل جۇمىس ىستەدى, گاندبول سەكتسياسىنىڭ جەتەكشىسى بولدى. ونىڭ جەتەكشىلىگىمەن قىزدارىمىز گاندبولدان رەسپۋبليكالىق جارىستاردا بىرنەشە رەت ءبىرىنشى ورىندى يەلەنسە, بىلتىر ءۇشىنشى ورىن الدى. قازىر بىزدە دەنە شىنىقتىرۋ ءپانىنىڭ التى مۇعالىمى بار», دەدى نينەل ەركەباەۆا.
قالالىق ءبىلىم بەرۋ باسقارماسى تەكسەرۋ جۇرگىزىلىپ جاتقانىن ءمالىم ەتتى.
ء«بىلىم باسقارماسىندا تەكسەرۋ كوميسسياسى قۇرىلدى. قازىر جاعدايدى انىقتاپ جاتىر. ونىڭ ناتيجەلەرى بويىنشا ءتيىستى شارالارى قابىلداناتىن بولادى. ناتيجەلەرى تۋرالى تەكسەرۋ اياقتالعاننان كەيىن قوسىمشا حابارلايتىن بولامىز», دەپ جاۋاپ بەردى ءبىلىم باسقارماسىنان.
