پارامەن ۇستالعان شەنەۋنىكتىڭ تاعى ءبىر بىلىعى اشكەرەلەندى

اۋىل شارۋاشىلىعى مينيسترلىگىنە قاراستى مال شارۋاشىلىعى دەپارتامەنتىنىڭ ديرەكتورى ماقسۇت باقتىباەۆتىڭ ۇستىنەن تاعى ءبىر قىلمىستىق ءىس قوزعالدى. بۇل تۋرالى «قازاقستان» تەلەارناسى حابارلادى. ول وتكەن جىلدىڭ جەلتوقسان ايىندا  مەكەمە باقىلاۋىنداعى جاۋاپكەرشىلىگى شەكتەۋلى سەرىكتەستىكتىڭ باسشىسىنان 720 مىڭ تەڭگە پارا الۋ ۇستىندە ۇستالعان بولاتىن.سول كەزدە كاسىپكەرگە مەملەكەتتىك ساتىپ الۋ كەلىسىم-شارتىنا قول قويعىزۋعا كومەكتەسەم دەپ ۋادە بەرگەن ەكەن. ال وسى جىلى ونىڭ تاعى ءبىر بىلىعى اشكەرە بولدى. «وعان قىزمەت بابىن پايدالانىپ, باعىنىشتى مەكەمە, ياعني «مال شارۋاشىلىعى جانە ۆەتەريناريانىڭ عىلىمي-يننوۆاتسيالىق ورتالىعى» جشس-نە پايدا الىپ بەرۋ ماقساتىندا باسقا كاسىپورىننىڭ زاڭدى كاسىپكەرلىك قىزمەتىنە كەدەرگى كەلتىرۋ ارقىلى مەملەكەتكە 19,5 ملن. تەڭگەگە زالال كەلتىردى دەگەن ايىپ تاعىلدى», - دەدى ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ رەسمي وكىلى مۇرات جۇمانباي. سولتۇستىك قازاقستان وبلىسىندا تۋعان م. باقتىباەۆ Voxpopuli.kz سايتىنا بەرگەن سۇحباتىندا بىلاي دەگەن بولاتىن: «بارلىعىنا تەك تامىر-بايلانىس ارقىلى عانا قول جەتكىزۋگە بولادى دەگەن قاتىپ قالعان پىكىر بار. بىراق, بۇلاي دەيتىن ادامداردىڭ كوبى ءتىپتى وسىنىڭ راس-وتىرىگىن تەكسەرۋ ءۇشىن ساۋساعىن دا قيمىلداتپايدى, ولار قول قۋسىرىپ وتىرعاندى جاقسى كورەدى. مەن مۇنداي پىكىرلەردەن اۋلاق بولدىم. بۇل - مەنىڭ ارتىقشىلىعىم. مەن بارلىعىنا تەك ءوزىم قول جەتكىزدىم جانە جەتكىزىپ ءجۇرمىن - ستۋدەنتتىك جاتاقحانادان باستاپ ەليتالىق باسپاناعا دەيىن. جاس كەزىمنەن باستاپ قوعامدىق ومىرگە بەلسەنە ارالاستىم. استاناداعى مگۋ-ءدىڭ بولىمشەسىنە «گرانتقا» وقۋعا ءتۇستىم. ءۇشىنشى كۋرستان باستاپ وقۋىمدى ماسكەۋدە جالعاستىردىم. وقۋىمدى بىتىرگەن سوڭ, «بولاشاق» باعدارلاماسى بويىنشا ءبىلىم الۋعا بەل بۋدىم. ءسويتىپ, لوندونعا وقۋعا اتتاندىم. ەندى مەن مال شارۋاشىلىعى سالاسىن جەتە تۇسىنەمىن.ءبىز ەليتالىق تۇقىمدى سيىرلاردى ءوسىرىپ جاتىرمىز». ءامىرحان الماعانبەتوۆ. دەرەككوز: «قازاقستان» تەلەارناسى. فوتو: Kz.Troniks.kz.