دەنساۋلىق ساقتاۋ سالاسىنا وسىنشا كوڭىل ءبولىنىپ وتىرعانىمەن جامان ىندەتتى اۋىزدىقتاۋعا ەشكىمنىڭ ءالى كەلمەۋدە. وسى كۇندەرى قىزىلجار ءوڭىرى ىندەتتەن وڭالا الماي تۇر. سوڭعى اپتالاردا سىرقاتقا ۇشىراعانداردىڭ سانى تاۋلىك سايىن ارتۋدا. ءتىپتى تۇماۋمەن اۋىرعاندار سانى دا 1,5 ەسە ارتىپ وتىر. 25 قازاننان بەرى وبلىستا كارانتيندىك شەكتەۋ شارالارى كۇشەيدى. «الدىمىزداعى 7-10 كۇن ارالىعىندا جاعدايدى باقىلاپ كورەمىز. ەگەر تۇراقتانۋ بولماسا شەكتەۋ شارالارىن ودان ءارى قاتاڭداتۋعا تۋرا كەلەدى. جوسپارلى ەمدەۋدى توقتاتا تۇرىپ, جامان ىندەتپەن ناۋقاستانعاندار ءۇشىن قوسىمشا توسەكتەر دايىندايتىن شىعارمىز», دەدى وبلىس اكىمى قۇمار اقساقالوۆ.
قازىر سىرقاتقا ۇشىراعاندار اراسىندا ەگدە تارتقان ادامدار كوپ. بارلىق ناۋقاستىڭ 80 پايىزى سولاردىڭ ۇلەسىندە. «حالىق اراسىندا سوزىلمالى دەرتى بار ادامدارعا ۆاكتسينا ەگۋگە بولمايدى دەگەن تۇسىنىك بار. الايدا وسىنىڭ ءوزى بىرەۋلەردىڭ ويدان شىعارعانى سياقتى. ويتكەنى كەيبىر سوزىلمالى دەرتى بار ادامدار دا ۆاكتسينا ەكتىرىپ, امان-ساۋ ءجۇر», دەدى اكىم.
سولتۇستىك قازاقستاندا ىندەت جۇقتىرعانداردىڭ جالپى سانى 30 مىڭ ادامعا جاقىنداپ قالدى. بۇرىن رەسەي فەدەراتسياسىمەن شەكارالاس اۋداندارداعى احۋال كۇردەلى بولاتىن. قازىر باسقا ەلدەرمەن اۋماقتىق شەكاراسى ورتاق ەمەس, وبلىستىڭ ورتالىق اۋداندارىنداعى ناۋقاستار سانىنىڭ ارتۋى الاڭداتادى. مىسالى, سوڭعى ەكى اپتاداعى ناۋقاستار سانىنىڭ ءوسىمى الدىنداعى 2 اپتامەن سالىستىرعاندا جامبىل اۋدانىندا 111-دەن 187-گە دەيىن, ەسىل اۋدانىندا 72-دەن 123-كە دەيىن, اققايىڭ اۋدانىندا 46-دان 117-گە دەيىن ارتىپ وتىر. وسىنىڭ وزىنەن ىندەتتىڭ تارالۋ وشاعى كەز كەلگەن جەردەن تابىلاتىنىن كورسەتۋدە. «ناۋقاس بىزگە شەكارانىڭ سىرتىنان عانا كەلەدى» دەگەن سەكىلدى پىكىرلەردىڭ ۇشقارى ەكەندىگى دە كورىنىپ تۇر. سوندىقتان ساقتىق شارالارىن سالاقسىتپاي, جاپپاي جۇرگىزۋ كەرەك-اق.
بۇگىنگى تاڭداعى ۆاكتسينا ەكتىرۋ قارقىنىنىڭ ازايۋى, تۇرعىنداردىڭ ساقتىق شارالارىن ۇستانۋىنىڭ تومەندەۋى, اسىرەسە سالتاناتتى ءىس-شارالاردى وتكىزۋ كەزىندە اۋرۋدىڭ وسۋىنە اكەلۋدە. مونيتورينگتىك توپتاردىڭ جۇمىسى دا بالەندەي تيىمدىلىك كورسەتىپ تۇرعان جوق. قازان ايى باستالعاننان بەرى 23 ادامنان تۇراتىن مونيتورينگتىك توپتار 680 نىساندى قامتي وتىرىپ, 120 رەيد جۇرگىزگەن. 948 مىڭ تەڭگەگە 15 تۇلعانى جاۋاپكەرشىلىككە تارتقان. بىراق ءىس جۇزىندە سالتاناتتى شارالاردى وتكىزۋشىلەر بۇدان الدەقايدا كوپ ەكەندىگى كورىنىپ تۇر. ءداستۇرلى تۇردە توي ايلارى دەپ ەسەپتەلەتىن قازان-قاراشا ايلارىنداعى كوپ ادام قاتىساتىن توي-تومالاق ازايعان جوق.
ەگەر اپتالىق ناۋقاستانۋشىلار سانى 200-دەن اساتىن بولسا, وبلىس ءتىپتى «قويۋ-قىزىل» ايماققا كوشۋ قاۋپى بار. وندايدا ازىق-ت ۇلىك ونىمدەرىن شىعاراتىنداردان باسقا بارلىق كاسىپورىنداردىڭ قىزمەتىن توقتاتۋعا تۋرا كەلەدى. ال بۇل دەگەنىمىز – ەكونوميكاعا ايتارلىقتاي زالال. قازىردىڭ وزىندە وبلىستا بارلىق وتباسىلىق سالتاناتتار, سونىڭ ىشىندە ۇيلەنۋ تويلارىن وتكىزۋگە تىيىم سالىنعان. سونىمەن قاتار ادامدار كوپ جينالاتىن كونفەرەنتسيالار, فورۋمدار, ويىن-ساۋىق جانە وزگە دە ءىس-شارالار, كورمەلەر جاساۋعا رۇقسات جوق. ادامدار ساقتانۋ شارالارىن دۇرىس جاساپ, شەكتەۋلەردى بۇزباسا عانا جامان ىندەتتى قۇرىقتاۋعا بولاتىنىن ءومىر كورسەتىپ وتىر.
سولتۇستىك قازاقستان وبلىسى
