سوعان سايكەس قورعاۋعا الىنعان ەڭ ءىرى 10 ورمان كەيىنگى 20 جىلدا اۋاعا پارنيكتى گاز بولە باستاعان. بۇعان دەيىن ولار CO2-ءنى جۇتاتىن اۋا تازالاعىشتار سانالىپ كەلگەن ەدى.
ورمانداردىڭ بۇلايشا كۇرت وزگەرۋىنە ادامزات كىنالى. جايىلىمدىق جەر, قۇرىلىس ءۇشىن اعاشتاردى وتاپ, ماڭگىلىك نۋ ورماندارعا اۋىز سالۋدىڭ سالدارىنان ولاردىڭ تابيعي تەپە-تەڭدىگى بۇزىلعان.
باياندامانىڭ بىرلەسكەن اۆتورى تالەس كارۆالو رەزەندەنىڭ ايتۋىنشا, بۇلار شىنايى جاعدايدىڭ بەتى عانا. ويتكەنى ەڭ تازا, ەڭ ءتيىمدى قورعالاتىن اۋماقتاردىڭ ءوزى قازىرگى ۋاقىتتا كليمات وزگەرۋىنىڭ زيانىن شەگىپ وتىر.
«اۋا رايىنىڭ كۇرت بۇزىلۋى, اۋىل شارۋاشىلىعىنا ارناپ اعاشتاردى وتاۋ جانە ورمان ورتتەرى يۋنەسكو-نىڭ الەمدىك مۇرا تىزىمىنە ەنگەن 10 ورمانىن كومىرقىشقىل گازىن شىعاراتىن ورىنعا اينالدىردى. سولاردىڭ قاتارىندا گوندۋراستاعى ريو-پلاتونو بيوسفەرالىق رەزەرۆاتى, كاناداداعى ۋوتەرتون-مۇزدىق حالىقارالىق بەيبىت ساياباعى جانە رەسەي مەن موڭعولياداعى ۋۆس-نۋر باسسەينى بار», دەيدى ول.
يۋنەسكو-نىڭ الەمدىك مۇرا تىزىمىنە ەنگەن بۇل ورمانداردىڭ كولەمى گەرمانيادان ەكى ەسەگە ۇلكەن. سونداي-اق زەرتتەۋدە شارتاراپتاعى 257 ورماننىڭ جىل سايىن اتموسفەراداعى 190 ميلليون كومىرقىشقىل گازىن جۇتاتىنى كورسەتىلگەن.
بايانداما اۆتورلارى الەم ەلدەرى باسشىلارى بيولوگيالىق ارتۇرلىلىكتى ساقتاۋعا, كليماتتىق داعدارىستارمەن كۇرەسۋ ءۇشىن تابيعاتتى قورعاۋعا نازار اۋدارۋى كەرەك ەكەنىن ايتادى. سونىمەن قاتار ورمان ەكوجۇيەسىن ساقتاۋداعى جەرگىلىكتى تۇرعىنداردىڭ قۇقىقتارىن قورعاۋدىڭ ماڭىزدىلىعىن اتاپ ءوتتى. ولار گلازگودا وتەتىن Cop26 سامميتىندە الەم كوشباسشىلارى ورماندى كەسۋدى توقتاتۋ جانە جويۋ تۋرالى مىندەتتەمەنى جاريالايدى دەپ ۇمىتتەنەدى.
