«سەلدەن قورعاۋ بوگەتىنەن ءال-فارابي داڭعىلىنا دەيىن جانە ودان ءارى اباي داڭعىلىنا دەيىن ۇلكەن الماتى وزەنىنىڭ سۋ قورعاۋ بەلدەۋى مەن ارناسىن رەكونسترۋكتسيالاۋدى الداعى جىلعا جوسپارلاپ وتىرمىز», دەدى باقىتجان ساعىنتاەۆ.
سوڭعى ەكى جىل ىشىندە 84 نىسان اباتتاندىرىلدى. بىلتىر «قاراسۋ» شاعىن اۋداندا جاڭا رەكرەاتسيالىق ايماقتىڭ قۇرىلىسى جۇرگىزىلدى. «جەلتوقسان», «درۋجبا» ساياباقتارى, «جەتىسۋ-3» شاعىن اۋدانىنداعى سكۆەر, «يۋجنىي» ساياباعى دا اباتتاندىرىلدى. 2021 جىلى «ماياك» توعايى, «كوكمايسا» شاعىن اۋدانداعى ەسەنتاي وزەنىنىڭ جاعالاۋى, تاۋلى قىرات شاعىن اۋدانىنداعى ۋچاسكە اباتتاندىرىلدى, ءا.قاستەەۆ مۋزەيى الدىنداعى فونتان, اباي اتىنداعى وپەرا جانە بالەت تەاترى ماڭىنداعى سكۆەر, تەررەنكۋر جانە جاربۇلاق, تىكساي وزەندەرىنىڭ ارنالارى جوندەۋ جۇمىستارىنان ءوتتى.
جۋىردا ك. بايسەيىتوۆا كوشەسىنىڭ بويىنداعى جاياۋ جۇرگىنشىلەر ايماعى مەن قازاق-بريتان تەحنيكالىق ۋنيۆەرسيتەتىنىڭ ساياباعىن اباتتاندىرۋ جانە كوگالداندىرۋ كوزدەلگەن.
