شقو پوليتسيا دەپارتامەنتىنىڭ كوشى-قون قىزمەتكەرلەرى قوس ازاماتتىعى بار ادامداردى انىقتاۋ ءۇشىن وبلىس اۋماعىندا كۇندەلىكتى جۇمىس جۇرگىزۋدە.
«قوس ازاماتتىقپەن ءجۇرۋدىڭ سەبەپتەرىنىڭ ءبىرى – بۇل كارانتيندىك شەكتەۋلەر كەزەڭىندە مەملەكەتتىك شەكارانى كەدەرگىسىز كەسىپ ءوتۋ, توتەنشە جاعدايلار تۋىنداعان كەزدە شۇعىل ەميگراتسيا مۇمكىندىگى, جاپپاي تارتىپسىزدىكتەر, قىلمىستىق قۋدالاۋ, ەپيدەميولوگيالىق جاعدايدىڭ ناشارلاۋى, ماتەريالدىق ارتىقشىلىقتار الۋ, اتاپ ايتقاندا زەينەتاقى ەسەبى, بالالاردىڭ تۋى كەزىندەگى جاردەماقى, جوعارى وقۋ ورىندارىنا ءتۇسۋ كەزىندە جەڭىلدىك شارتتارى بولىپ وتىر.
جىل باسىنان بەرى 800-دەن استام ادامدى قازاقستان ازاماتتىعىنان ايىرۋ تىركەلدى. نەگىزگى بولىگى – رەسەي فەدەراتسياسىنىڭ ازاماتتىعىن قابىلداعان تۇلعالار», دەدى شقو پد باستىعى ساعات ماديەۆ. ⠀
سونىمەن قاتار, قوس ازاماتتىق ءۇشىن 85 ادام اكىمشىلىك جاۋاپكەرشىلىككە تارتىلدى, ونىڭ ىشىندە شەتەلدىك ازاماتتىقتى الۋ فاكتىسى تۋرالى بەلگىلەنگەن مەرزىمدە حابارلاماعانى ءۇشىن – 24, قازاقستان رەسپۋبليكاسىنىڭ پاسپورتى مەن جەكە كۋالىگىن پايدالانعانى ءۇشىن – 61.
قوس ازاماتتىقتىڭ تاعى ءبىر جاعدايىن شەمونايحا اۋدانىنىڭ كوشى-قون قىزمەتىنىڭ قىزمەتكەرلەرى انىقتادى. ءتارتىپ ساقشىلارى 2013 جىلى ساراتوۆ وبلىسىندا رەسەي فەدەراتسياسىنىڭ ازاماتتىعىن العان 63 جاستاعى قالا تۇرعىنىن انىقتادى. ول قازاقستاندا تۇرىپ, قر ازاماتتارىنىڭ قۇجاتتارىن پايدالانعان. رەسەي ازاماتى قازاقستاننان زەينەتاقى العانى جانە وسى كۇنگە دەيىن مەملەكەتتىك قىزمەتتەردى پايدالانعانى انىقتالىپ وتىر.
«قازاقستان رەسپۋبليكاسى ازاماتتارىنىڭ جەكە باسىن كۋالاندىراتىن قۇجاتتارى الىنىپ, ازاماتتىعىنان ايىرىلعانى تىركەلدى. قۇقىق بۇزۋشى قر اقبتك- ءنىڭ 496-بابى بويىنشا 100 اەك كولەمىندە ايىپپۇل تۇرىندە اكىمشىلىك جاۋاپكەرشىلىككە تارتىلدى», دەدى ساعات ماديەۆ.
ايتا كەتەيىك, قازاقستاندا قوس ازاماتتىق الۋعا تىيىم سالىنعان.
