ءبىلىم • 26 قازان، 2021

1 قاراشادا ماگيستراتۋراعا قۇجات قابىلداۋ باستالادى

129 رەت كورسەتىلدى

1 قاراشادا ماگيستراتۋراعا ءتۇسۋ ءۇشىن ەكىنشى مارتە وتكىزىلەتىن كەشەندى تەستىلەۋگە قۇجاتتار قابىلداۋ باستالادى، دەپ حابارلايدى Egemen.kz ءبىلىم جانە عىلىم مينيسترلىگىنە سىلتەمە جاساپ.

بۇعان دەيىن ءبىلىم جانە عىلىم ءمينيسترى اسحات ايماعامبەتوۆ الەۋمەتتىك جەلىدەگى پاراقشالارىندا ماگيستراتۋرا مەن دوكتورانتۋراعا ءتۇسۋ بويىنشا قابىلدانعان شەشىم تۋرالى جازدى.

«ەندى وقۋعا قابىلداۋ جىلىنا ەكى رەت وتكىزىلەدى. بايقاۋعا جازدا گرانتقا تۇسە الماعان ۇمىتكەرلەر دە، بۇرىن كەشەندى تەستىلەۋدەن وتپەگەندەر دە قاتىسا الادى. مۇنداي ماڭىزدى شەشىمدەردى قابىلداۋ كەزىندە مينيسترلىك ستۋدەنتتەردىڭ مۇددەسىن ارقاشان ءبىرىنشى ورىنعا قويادى. بۇعان دەيىن ءبىلىم جانە عىلىم ءمينيسترى اسحات ايماعامبەتوۆ مەملەكەتتىك گرانتقا ۇمىتكەرلەر جىلىنا ەكى رەت، ءداستۇرلى تۇردە – جازدا جانە قوسىمشا قىستا تەستىلەۋدەن وتە الاتىنىن حابارلاعان. ەندى تالاپكەرلەر 1 قاراشادان باستاپ ماگيستراتۋراعا ءتۇسۋ ءۇشىن ەكىنشى مارتە وتكىزىلەتىن كەشەندى تەستىلەۋگە قۇجاتتارىن تاپسىرا الادى. تەستىلەۋدى ءساتتى تاپسىرعان جاعدايدا ۇمىتكەرلەر جاز ايىندا وقۋعا قابىلداۋ قورىتىندىسى بويىنشا بولىنگەن گرانتتاردى ۇتىپ الا الادى»، دەپ اتاپ ءوتتى ءبىلىم جانە عىلىم ۆيتسە-ءمينيسترى قۋانىش ەرعاليەۆ.

كەشەندى تەسىلەۋ ەمتيحانىنا تىركەلۋ، ماماندىق بولىنىسىندە گرانت سانى تۋرالى اقپارات الۋ قر بعم ۇلتتىق تەستىلەۋ ورتالىعىنىڭ app.testcenter.kz سايتىندا وتەدى. قۇجاتتاردى قابىلداۋ 2021 جىلعى 1-15 قاراشا ارالىعىندا جۇرگىزىلەدى. كەشەندى تەستىلەۋ 2021 جىلدىڭ 18 قاراشاسىنان 11 جەلتوقسانىنا دەيىن وتەدى.

گرانتقا ۇمىتكەرلەر ءداستۇرلى تۇردە شەت ءتىلى، ءبىلىم بەرۋ باعدارلامالارى توبىنىڭ بەيىنى بويىنشا جانە وقۋعا دايىندىعىن انىقتاۋ بويىنشا تەست تاپسىرادى. شەت ءتىلىن مەڭگەرگەنىن راستايتىن حالىقارالىق سەرتيفيكاتى بار ادامدار اۆتوماتتى تۇردە شەت ءتىلى بويىنشا تەستىلەۋدەن بوساتىلادى. تەست ناتيجەلەرىن تەستىلەۋ اياقتالعاننان كەيىن بىردەن بىلۋگە بولادى. ناتيجەسىمەن كەلىسپەگەن جاعدايدا قاتىسۋشى ەمتيحان اياقتالعان سوڭ 30 مينۋتتان كەيىن ونلاين اپەللياتسياعا ءوتىنىش بەرەدى. مەملەكەتتىك ءبىلىم بەرۋ تاپسىرىسى بويىنشا جانە اقىلى نەگىزدە عىلىمي-پەداگوگيكالىق ماگيستراتۋراعا ءتۇسۋ ءۇشىن شەكتى بالل – 75، بەيىندى ماگيستراتۋراعا ءتۇسۋ ءۇشىن 50 بالل.

ماگيستراتۋراعا ءبىلىم بەرۋ گرانتتارىن تاعايىنداۋ كونكۋرسىنا قاتىسۋ ءۇشىن قۇجاتتار 2021 جىلعى 25 جەلتوقسانعا دەيىن قابىلدانادى. ماگيستراتۋراعا قابىلداۋ 2021 جىلعى 26 جەلتوقسان مەن 10 قاڭتار ارالىعىندا وتەدى. ماگيستراتۋراعا تۇسۋشىلەر بارلىعى 3 مىڭنان استام مەملەكەتتىك ءبىلىم گرانتىنا ۇمىتكەر بولا الادى. ماماندىقتار بولىنىسىندە ەڭ كوپ گرانت «حيميا» (172 گرانت)، «ۆەتەريناريا» (169)، «مەحانيكا جانە مەتالل وڭدەۋ» (156)، «مەتاللۋرگيالىق ينجەنەريا» (137)، «قۇرىلىس ماتەريالدارىن، بۇيىمدارىن مەن كونسترۋكتسيالارىن ءوندىرۋ» (132 گرانت)، «ماتەريالتانۋ جانە جاڭا ماتەريالدار تەحنولوگياسى» (130) جانە باسقا ماماندىقتار بويىنشا بولىنگەن.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار