مەديتسينا • 26 قازان، 2021

ون ءبىرىنشى پالاتا

33 رەت كورسەتىلدى

توبىل قالاسىنداعى ينفەكتسيالىق اۋرۋحانادا 10 كۇن جاتىپ، ەمدەۋ مەكەمەسىندە بولىپ جاتقان جاعدايدىڭ ءبارىن ءوز كوزىمەن كورىپ شىققان گەرحارد ۋمانسكي بۇرىن ءوزى سەزىنبەي جۇرگەن كوپ نارسەگە كوز جەتكىزگەنىن ايتادى. اسىرەسە، ونى دارىگەر مامانداردىڭ جانكەشتىلىگى قايران قالدىرىپتى.

«بىرىنەن كەيىن ءبىرى تولاسسىز ءتۇسىپ جاتقان ادامداردىڭ كوپ­تى­گىنە قاراماستان، مەديتسي­نا قىز­مەتكەرلەرى بىردە-ءبىر ناۋ­قاستى نازاردان تىس قال­دىر­ماي، وبەكتەپ ءجۇرىپ ءولىم اۋزىنان الىپ قالىپ جاتىر. ءوز اتىمنان عانا ەمەس، ىندەت تىرناعىنا ءىلىنىپ، گوسپيتالدا ەمدەلىپ، ايى­عىپ، امان-ەسەن ۇيىنە ورالعان بار­شا ناۋقاستاردىڭ اتىنان دارى­گەرلەرگە العىس ايتامىن! گوس­پيتالدا بولىپ جاتقان ءولىم مەن ءومىردىڭ اراسىنداعى ار­پالىستى دارىگەرلەر مەن ناۋقاستار عانا بىلەدى. ءوز باسىم وكپەم 25% زاقىمدانىپ 11-پالاتادا جاتتىم. مەنى قويشى، وزگەلەرمەن سالىستىرعاندا، جارام جەڭىل بولدى. قاسىمداعى ەۆگەني ەسىمدى جاس جىگىت قىزۋى كوتەرىلىپ، كوپكە دەيىن دىرىلدەپ جاتتى. دارىگەرلەر قانشا تىرىسقانىمەن دەنە قىزۋىن تۇسىرە المادى. مەدبيكە ناۋقاس كورشىمنىڭ قاسىنان تاڭ اتقانشا كەتپەدى. ءدارى كومەكتەسپەگەن سوڭ، جەنيا­نىڭ دەنەسىن ءالسىن-ءالسىن سپيرتپەن ءسۇرتىپ وتىردى. كەيدە قالعىپ كەتىپ، كوزىمدى اشىپ قالام دا، مەد­بيكەنىڭ ءالى وتىرعانىن كورەم. شىنتۋايتىنا كەلگەندە، ونىڭ مىندەتى – ءدارى سالۋ عانا عوي، ال مەن كورگەن مەدبيكە دارىدەن قايران بولماعان سوڭ، ءوز اجەسىنەن ۇيرەنگەن حالىق ەمىن قولدانىپ، ناۋقاستىڭ دەنەسىن تاڭعا دەيىن سپيرتپەن ءسۇرتىپ وتىردى. وعان قاراپ وتىرىپ، ەگەر دارىگەردىڭ بويىندا ادامگەرشىلىك، جانا­شىر­لىق، جاۋاپكەرشىلىك سىندى ادامي قاسيەتتەر بولماسا، ناۋقاستى ەشبىر ەمدەۋ حاتتاماسى قۇتقارىپ قالا المايتىنىنا كوزىم جەتتى»، دەدى دەرتىنەن ايى­عىپ شىققان ناۋقاس.

گ.ۋمانسكي ناۋقاستاردىڭ كوپتىگىنەن مەدبيكەلەردىڭ تاۋلى­گى­نە 24 ساعات بويى تىزە بۇكپەي جانتالاسىپ جۇرەتىنىن جەتكىزدى.

«مۇنداي ماماندارعا تىرىسىن­دە ەسكەرتكىش قويسا، ارتىق بولمايدى. ءبارى – جاپ-جاس قىزدار. ءبىز تۇنگە قاراي ۇيقىعا كەتەمىز، ال ولار ءالى زىر جۇگىرىپ جۇرەدى. تاڭەرتەڭ ويانساق، شارشاعان، بىراق ءالى ەم-دوم جاساپ جۇر­گەن مەدبيكەلەردى كورەمىز. پالا­تا­نىڭ تازالىعىن ساقتاۋ دا سول كىسىلەردىڭ موينىندا. مەن 10 كۇن ىشىندە 10 كەلى سالماق جوعالتتىم. كورونوۆيرۋس دەگەنىڭ – جاي نارسە ەمەس، ناعىز تاجالدىڭ ءدال ءوزى. «باسى اۋىرماعاننىڭ بال­تىرى سىزدامايدى» دەمەكشى، اۋىرماعان ادام پالاتادا بولىپ جاتقان سۇمدىقتى بىلمەيدى، بىل­مەي-اق تا قويسىن»، دەيدى گ.ۋمانسكي.

گەرحارد – گەرمانيانىڭ ازا­ماتى، الايدا قازاقستاندا تۇرۋ­عا دا زاڭدى رۇقسات قاعازى بار. قازىر قوستاناي قالاسىندا تۇ­را­دى. ايتۋىنشا، قوستانايلىق دارىگەرلەر ەۋروپا دارىگەرلەرىنەن ەش كەم تۇسپەيدى. ادامگەرشىلىك ۇل­ت­قا قارامايدى. وعان ءبىزدىڭ دارىگەرلەردىڭ جانكەشتى ەڭبەگى دالەل بولا الادى.

 

قوستاناي وبلىسى

سوڭعى جاڭالىقتار

ۇقساس جاڭالىقتار