ول ەكى قىزىمنىڭ اتىن سۇراپ, ماعان وتكىر كوزىن تاستادى. ءبىرىن الما, ەكىنشىسىن ءاليا دەگەنىمدە, ء«اليا مولداعۇلوۆانىڭ سوعىستاعى ەرلىگىن ەستىگەن ەدىم, قازاقستاننان ەكەنسىڭدەر عوي», دەدى الەكسەەنكو. ءسال ەزۋ تارتتى دا: «قارۋلاس دوسىم تالعات بيگەلدينوۆ تە قازاقستاندىق ەدى, ونىڭ سوعىستاعى ەرلىگىنە, جەتىستىگىنە ءتانتى بولدىم. بىردە جاڭا ۇشاق كەلدى, ءنومىرى 13 ەكەن. بۇل ساننان ورىستار كۇدىكتەنىپ جۇرەدى عوي. تالعات 13 سانى قازاققا قۇتتى دەپ, سوعان وتىرىپ الدى. سول 13-ءنومىرلى ۇشاعىمەن العاش رەت فاشيستەردىڭ بەرليندەگى سوعىس نىساندارىن كارتاعا ءتۇسىرۋ تاپسىرماسىن ناتيجەلى ورىندادى. بەرليندەگى سوعىس قۇرالدارى تالعاتتىڭ ۇشاعىن كورىپ, وق تيگىزە الماعانىنا قايران قالدىق.
تالعات ءۇش ءجۇز رەت اۋە شابۋىلىنا قاتىسىپ, فاشيستەردىڭ ونداعان سوعىس نىسانىن تالقاندادى. فاشيستەر تالعاتتى قۇرتۋعا قارجى ءبولىپ, تالاي ۇشقىشتى ۇشاعىنىڭ سوڭىنا سالدى. سولاردىڭ قاي-قايسىسى دا تالعاتتىڭ ۇشاعىنا وق دارىتا الماي وتقا ورانىپ جاتتى. قانداي قيىن تاپسىرمالاردا تالعات «ونى مەن ورىندايمىن» دەپ, ۇشا جونەلەتىن. بىردە گەنەرال كۋتاكوۆتى فاشيستەر قورشاپ العانى حابارلاندى. جاۋدى تەز قۇرتىڭدار دەگەن تاپسىرمانى تالعات بىردەن قابىلداپ, بەلگىلى جەرگە ۇشىپ بارىپ گەنەرالدى ۇشاعىنا مىنگىزىپ امان ورالدى. سوندا قورشاپ تۇرعان جاۋلاردىڭ بىردە-ءبىرى ۇشاققا وق اتىپ قارسىلىق كورسەتپەگەنىنە قايران قالاسىڭ. بۇل نە؟ سيقىرشى ما؟ جوق. مۇنى تالعات بيگەلدينوۆتىڭ تىلسىم كۇشپەن ءتىل تابىسقانى دەگەن دۇرىس شىعار», دەدى.
تالعات اعامىزبەن ءبىر كەزدەسۋىمدە مەنىڭ قويعان سۇراعىما وراي جۇمساق ۇنمەن: «قانداي اجال ءتونىپ تۇرسا دا اللا جولىمدى وڭعاردى. اللا تاعالا قولداسا عانا جاۋدى جەڭەمىن دەگەن وي سانامدا ۇدايى تۇراتىن. جاراتقانعا سيىنىپ ءجۇرىپ تالاي اجالمەن بەتتەسكەندە امان قۇتىلدىق. فاشيستەردىڭ كۇردەلى نىساندارىن بومبى تاستاپ جويىپ جىبەرۋ وڭاي ەمەس. ويتكەنى ولار اۋە شابۋىلىنان قورعاناتىن قارۋلارىن دايىنداپ تۇرادى عوي. وسىنداي قيىن ساتتەردە جاراتقان يە ءوزىنىڭ قۇدىرەتىمەن قولداعانىن ءاردايىم سەزىپ ءجۇردىم», دەدى.
اللا ميلليونداعان ادامنىڭ بىرىنە تىلسىم كۇشتەن قۋات الاتىن قاسيەت بەرەدى دەپ ويلايمىن. تاريحىمىزدا قازاق باتىرلارىنىڭ وتقا سالسا جانبايتىن, سۋعا سالسا باتپايتىن, قىلىش باسىن شاپپايتىن, نايزا كەۋدەسىنە كىرمەيتىن قاسيەتكە يە ەرەكشە ادامدار رەتىندە سيپاتتالۋىندا اللانىڭ قۇدىرەتىمەن بايلانىستىرماۋ مۇمكىن بە؟..
تابىل قۇلياس,
جازۋشى
