ايماقتار • 25 قازان، 2021

اتىراۋدا ەكونوميكالىق قىلمىستاردىڭ زالالى 2،8 ملرد تەڭگەنى قۇرادى

558 رەت كورسەتىلدى

اتىراۋدا 9 ايدا ەكونوميكالىق قىلمىستاردان كەلگەن زالال مولشەرى 2،8 ملرد تەڭگەنى قۇرادى، دەپ حابارلايدى Egemen.kz.

اتىراۋ وبلىستىق ەكونوميكالىق تەرگەۋ دەپارتامەنتىنىڭ باسقارما باسشىسى قاحارمان جاردەموۆتىڭ مالىمەتىنشە، بيزنەس وكىلدەرى دە زاڭ بۇزۋشىلىققا ءجيى بارادى. زاڭسىزدىقتىڭ دەنى سالىق تولەۋدەن جالتارۋ، جالعان شوت-فاكتۋرالاردى شىعارۋ، مەملەكەتتىك قاراجاتتى جىمقىرۋ نەمەسە ۇرلاۋمەن بايلانىستى بولىپ وتىر.

«بيىلعى 9 ايدا دەپارتامەنتتىڭ وندىرىسىندە 71 قىلمىستىق ءىس بولدى. ونىڭ ىشىندە دەپارتامەنت قىزمەتكەرلەرىمەن سوتقا دەيىنگى تەرگەۋ باستالعان 56 قىلمىستىق ءىس بار. بۇل – تەرگەۋ جۇرگىزىلىپ جاتقان ىستەردىڭ جالپى سانىنىڭ 78،9 پايىزى. وسى كەزەڭدە 34 قىلمىستىق ءىستىڭ 18-ءى سوتقا جولدانىپ، 16 ءىس اقتالمايتىن نەگىزدەرگە سايكەس قىسقارتىلدى. تەرگەۋى اياقتالعان قىلمىستىق ىستەر بويىنشا انىقتالعان زالالدىڭ سوماسى 2،8 ملرد تەڭگەنى قۇرادى. ونىڭ 2،4 ملرد تەڭگەسى مەملەكەت پايداسىنا وتەلدى» دەيدى قاحارمان جاردەموۆ.

ونىڭ ايتۋىنشا، دەپارتامەنت قىزمەتكەرلەرى د. ەسىمدى ايەل قۇرعان ۇيىمداسقان قىلمىستىق توپتى انىقتاعان.

«كۇدىكتى 2017-2019 جىلدارى 715 ملن تەڭگەدەن استام مولشەردە زالال كەلتىرە وتىرىپ، ءارتۇرلى كاسىپكەرلىك سۋبەكتىلەردەن بيۋدجەتكە سالىق تولەۋدەن جالتارۋعا ىقپال ەتكەن جالعان شوت-فاكتۋرالار جازىپ بەرگەن. سوت ۇكىمىمەن د.-نىڭ قىلمىسپەن تاپقان قاراجاتقا ساتىپ العان مۇلكى تاركىلەنىپ، 7 جىلعا باس بوستاندىعىنان ايىرىلدى. ۇيىمداسقان قىلمىستىق توپتىڭ قاتىسۋشىلارىنا ء تۇرلى جىلدارعا باس بوستاندىعىنان ايىرۋ جازاسى تاعايىندالدى» دەپ ءمالىم ەتتى قاحارمان جاردەموۆ.

 

سوڭعى جاڭالىقتار

ۇقساس جاڭالىقتار