شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, ءبىرىنشى وقيعا 24 قازان كۇنى ساعات 20:44-تە التاي قالاسىندا بولعان.
اۋرۋحاناعا ۋلانۋ بەلگىلەرىمەن ەكى بالا, اتاپ ايتقاندا 2012 جىلعى ۇل مەن 2019 جىلى تۋعان قىز تۇستكەن. جەكە تۇرعىن ءۇيدى تەكسەرۋ بارىسىندا دەپارتامەنت ماماندارى بالالارعا پەشتە جارىق بولۋى سالدارىنان ءيىس تيگەنىن انىقتادى.
«ەكىنشى وقيعا 25 قازاندا سەمەي قالاسىندا بولعان. پەش مۇرجاسىنىڭ ۋاقىتىلى تازالانباۋىنان ءيىس تيگەن 1947 جىلعى ايەل كوز جۇمدى. قۇتقارۋشىلار وسىعان دەيىن بۇل ۇيلەردە قاۋىپسىزدىك شارالارى تۋرالى ءتۇسىندىرۋ جۇمىسىن جۇرگىزىپ, بۇزۋشىلىقتار تۋرالى ەسكەرتكەنىمەن ولار ەش نازار اۋدارماعان», دەپ حابارلادى ۆەدومستۆو وكىلدەرى.
ايتا كەتەيىك, جىلىتۋ ماۋسىمى باستالعالى بەرى ءوڭىر قۇتقارۋشىلارى 92 732 تۇرعىن ءۇيدى ارالاپ, حالىققا پەش پەن ەلەكتر قۇرالدارىن پايدالانۋ كەزىندەگى قاۋىپسىزدىك ەرەجەلەرىن تۇسىندىرگەن.
