2000 جىلدان باستاپ قازاقستان, رەسەي جانە قىتاي مەملەكەتتەرىنىڭ شەكاراسى تۇيىسكەن جەرىندە ورنالاسقان ءبىزدىڭ رەسپۋبليكامىزدىڭ ەڭ بيىك شەكارا بولىمشەسى قازاقستاندىق باتىر-شەكاراشى «رادجان باتىرقانوۆتىڭ» (بۇرىنعى اتاۋى «شىندىعاتاي») ەسىمىمەن اتالادى. كۇرشىم اۋدانى بويىنشا شەكارالىق باسقارما شىعىس قازاقستان وبلىسىنىڭ كوركەم جەرلەرىندە, تەڭىز دەڭگەيىنەن ەكى مىڭ مەتر بيىكتىكتە ورنالاسقان. ءدال وسى جەردە جاس شەكاراشىنىڭ مىنەزى قالىپتاسىپ, تاباندىلىق پەن جانقيارلىق سياقتى باعا جەتپەس جاۋىنگەرلىك قاسيەتتەرگە يە بولدى.
رادجان شىعىس قازاقستان وبلىسى كاتونقاراعاي اۋىلىندا ۇلكەن وتباسىندا دۇنيەگە كەلگەن. جاسىنان تالانتتى بالا سۋرەت سالعاندى جاقسى كورىپ, سۋرەتتەرىندە كوركەم ايماقتىڭ بارلىق سۇلۋلىعىن جەتكىزۋگە تىرىساتىن. ول جەرگىلىكتى بالالار كىتاپحاناسىنداعى قازاق باتىرلارىنىڭ ەرلىكتەرى سۋرەتتەلگەن بارلىق كىتاپتى وقىپ شىعىپتى. اناسى قيزات باتىرقانوۆا ۇلىنىڭ اسكەري كىتاپتاردى وقىعاندى ۇناتاتىنىن, ال شەكاراشى وفيتسەر بولۋ ونىڭ ەڭ بيىك ارمانى ەكەنىن ەسىنە الادى. بالا ارمانىنا جەتۋ ءۇشىن دەنە كۇشى تۇرعىسىنان مىقتى بولۋ كەرەك ەكەنىن ءتۇسىندى, سوندىقتان ول ءۇيىنىڭ كىرە بەرىسىنە قولدان قۇراستىرىلعان سپورتتىق ترەناجەرلەر ورناتىپ, دوستارىمەن بىرگە سپورتپەن شۇعىلداندى.
رادجاننىڭ بويىنداعى شەكسىز مەيىرىمدىلىك سەزىمى ونى ناعىز ەرگە ءتان ارەكەتتەرگە باستايتىن. بىردە ۇيگە قايتىپ كەلە جاتىپ, ساياباقتان «قاشىڭدار!» دەپ جۇگىرگەن جاس جىگىتتەردى بايقاپ قالادى. نە بولسا دا, رادجان بىرەۋگە كومەك قاجەت بولۋى مۇمكىن دەگەن ويمەن ەشقايدا قاشپايدى. ول سول ماڭدا پىشاق جاراقاتىمەن جاتقان جىگىتتى كوتەرىپ الىپ, جول ۇستىنە الىپ شىعادى دا, جۇك كولىگىنىڭ جولىنا تۇرىپ توقتاتادى. وسىنداي باتىلدىعىنىڭ ارقاسىندا جارالىنى دەر كەزىندە اۋرۋحاناعا جەتكىزىپ, ءومىرىن ساقتاپ قالادى.
تۋعان مەكتەبىن ءساتتى ءبىتىرىپ, رادجان الماتى قالاسىنداعى شەكارا ۋچيليششەسىنە وقۋعا تۇسۋگە اتتانادى. بىراق جاس جىگىتتىڭ جولى بولماي, ارا شاعىپ, اللەرگياسى قوزىپ, مەرزىمدى ەمتيحاندارىنا بارا الماي, قىمبات ۋاقىتىن جوعالتىپ, تۋعان اۋىلىنا ورالدى.
ال 1993 جىلدىڭ ماۋسىم ايىندا كۇرشىم شەكارا جاساعىنا جەدەل قىزمەتكە شاقىرىلدى. ءبىر جىلدان كەيىن تمد-نىڭ سىرتقى شەكاراسىن قورعاۋ ءۇشىن تاجىكستانعا اسكەري قىزمەتشىلەردىڭ كەزەكتى كومانداسى ىرىكتەلدى. رادجان ەش ويلانباستان ءوز ەركىمەن جازىلىپ, قاتارلاستارىمەن بىرگە تاجىريبەلى وفيتسەر-تالىمگەرلەردىڭ دايىندىعىنان وتەدى.
1994 جىلى ماۋسىمدا رادجان باتىرقانوۆ باسقا ەرىكتىلەرمەن بىرگە سول كەزدە «كەۆرون» شەكارا بەكەتى مەن كومەنداتۋرا ورنالاسقان كالاي-حۋمب قالاسىنا كەلەدى.
بلينداجداعى ءومىر اپتاپ ىستىق پەن انتيسانيتارلىق جاعدايدا ءوتىپ جاتتى... جاۋىنگەر اناسىنا ءوزىنىڭ «قاقتىعىس ورنىنا» كەتىپ بارا جاتقانىن ايتا الماعانىن, تۋعان جەرىن ءجيى ەسكە الادى…
1994 جىلعى 28 قىركۇيەكتە حاكيم بانداسىنىڭ ەكى جۇزدەن استام قارۋلى سودىرى 9 اۆتوكولىكپەن تاجىكستاننىڭ حوروگ قالاسى ماڭىنداعى مەملەكەتتىك شەكاراسىن كەسىپ ءوتىپ, اۋعانستانعا وتۋگە بەت الادى. ولاردىڭ جولىنا 38 قازاقستاندىق جانە رەسەيلىك شەكاراشى توسقاۋىل بولىپ تۇرادى.
سوعىسقا ءبىرىنشى بولىپ كىرگەن رەسەيلىك وفيتسەر كونستانتين سەليۋك پەن رادجان باتىرقانوۆ قارۋلاستارىنا مودجاحەدتەرگە تىلدان شابۋىلداۋعا مۇمكىندىك بەرەدى. ۇرىستا اۋىر جاراقاتتانعان رادجان كوپ قان جوعالتىپ, ەسىن جيماستان قايتىس بولدى. ۇرىستىڭ ناتيجەسىندە مودجاحەدتەردىڭ كوزى جويىلىپ, سودىرلاردىڭ كەپىلىندەگى ادامدار قۇتقارىلدى.
كورسەتكەن ەرلىگى مەن باتىلدىعى ءۇشىن كىشى سەرجانت ر.باتىرقانوۆ قازا تاپقاننان كەيىن قازاقستان رەسپۋبليكاسى پرەزيدەنتىنىڭ جارلىعىمەن ءىى دارەجەلى «ايبىن» وردەنىمەن ماراپاتتالدى.
ءبىزدىڭ كەيىپكەرىمىزدىڭ كومانديرلەرى مەن ارىپتەستەرى – رەسەي فەدەراتسياسىنىڭ فقق گەنەرال-لەيتەنانتى ا.د.ميحەەۆ, وتستاۆكاداعى شق ارداگەرى پودپولكوۆنيك ا.ا.ۆولودين جانە ءدال سول كۇنى ونىمەن بىرگە قورشاۋدا بولعان بارلىق قارۋلاس دوستارى رادجان ءوز ەرلىگىمەن جولداستارىنىڭ ءومىرىن ساقتاپ, ۇرىستىڭ جەڭىسپەن اياقتالۋىن قامتاماسىز ەتتى دەپ سانايدى. ەگەر كىشى سەرجانتتىڭ شەشۋشى ساتتەگى باتىل ارەكەتى بولماعاندا, ءبىزدىڭ تاراپىمىزدان شىعىندار ەداۋىر كوپ بولار ەدى جانە ساربازداردىڭ ءبىرازى ۇيگە ورالا الماس ەدى دەيدى.
بۇل كۇندەرى رادجان باتىرقانوۆتىڭ كومانديرى بولعان شەكارا قىزمەتىنىڭ ارداگەرى, وتستاۆكاداعى پودپولكوۆنيك الەكسەي ۆولودين ءوزىنىڭ الەۋمەتتىك جەلىدەگى پاراقشاسىندا باتىر ۇلىمىزعا قازاقستان رەسپۋبليكاسىنىڭ جوعارى ماراپاتىن بەرۋدى قايتادان ۇسىنۋدا جانە بۇل نيەتتى باتىر ۇلىمىزدىڭ قاتارلاس, قارۋلاس جولداستارى دا بارىنشا قولداۋدا.
رادجان باتىرقانوۆتىڭ جاساعان ەرلىگى ءبىزدىڭ ەلدەن تىس جەرلەردە دە بەلگىلى جانە ونىڭ ەسىمى ماڭگى ۇمىتىلمايدى. باتىردىڭ ەسىمىمەن كاتونقاراعايدا كوشە مەن مەكتەپ اتالدى, 2000 جىلدىڭ قىركۇيەگىندە كۇرشىم شەكارا جاساعىنىڭ «شىندىعاتاي» شەكارا زاستاۆاسىنا ر.باتىرقانوۆتىڭ ەسىمى بەرىلدى جانە ونىڭ قۇرمەتىنە ەسكەرتكىش تاقتا ورناتىلدى.
ونىڭ ءىنىسى ساماتتىڭ ر.باتىرقانوۆ اتىنداعى شەكارا زاستاۆاسىنا قىزمەت ەتۋگە بارعانى جانە ءوز ءومىرىن ەلىمىزدىڭ شەكارالارىن قورعاۋعا ارناۋى تەگىن ەمەس.
جىل وتكەن سايىن شەكاراشىلاردىڭ ءوز باتىرلارىن ەسكە الۋ ءداستۇرىن ساقتاۋى بۇگىنگى كۇندە وتانىمىزدىڭ شەكارالارىن قورعاپ جۇرگەندەر مەن وسكەلەڭ ۇرپاقتى پاتريوتيزم رۋحىندا تاربيەلەۋگە مۇمكىندىك بەرەدى. ەل ءوز باتىرلارىن ۇمىتپاۋى كەرەك.
