ارماتۋرا شىعاراتىن «ەۆراز كاسپيان ستال» زاۋىتىنىڭ ديرەكتورى ۆلاديسلاۆ تسەنزۋرانىڭ ايتۋىنشا, ءوزى باسقارىپ وتىرعان كاسىپورىن مەن وزگە دە بىرنەشە ءىرى كومپانياعا وسى تەمىر جولدىڭ توڭىرەگىندە شيەلەنىسكەن جاعداي ەكونوميكالىق شىعىن كەلتىرۋى مۇمكىن.
2018 جىلى «توبىل ترانس» سەرىكتەستىگى قوستاناي تەمىر جول ستانساسىندا قاراۋسىز جاتقان تەمىرجول تورابىن كونكۋرس بويىنشا ۇتىپ الىپ, ونى 30 جىلعا سەنىمدى باسقارۋ قۇقىنا يە بولعان. ۇزىندىعى 2 شاقىرىم بولاتىن تەمىرجول سودان كەيىن جوندەۋدەن ءوتىپ, پايدالانۋعا بەرىلدى. قوستاناي ارقىلى وتەتىن توقسان تاراۋ توراپتى جالعاپ جاتقان تەمىرجول وبلىس ورتالىعىنداعى «اگروماشحولدينگ» جشس, «يستكومترانس» جشس, «اگروماشحولدينگKZ» جشس, «ماشتەح» اق, «KSTtrade» جشس, «قوستاناي ءۇي قۇرىلىسى كومبيناتى» جشس سياقتى ءىرى كاسىپورىنداردى جۇك ۆاگوندارىمەن قامتاماسىز ەتىپ تۇردى. «توبىل ترانس» باسشىلارىنىڭ سوزىنە سەنسەك, سەرىكتەستىك سوڭعى 9 ايدىڭ ىشىندە قوستاناي قالاسىنا كىرىپ-شىعىپ جاتقان جۇك اينالىمىنىڭ 40%-دان استامىن ۆاگونمەن قامتاماسىز ەتكەن.
«توبىل ترانس» اتقارىپ جاتقان جۇمىستىڭ ساپاسى تەمىرجولشىلاردىڭ دا, وبلىس ورتالىعىنداعى ءىرى كاسىپورىن باسشىلارىنىڭ دا كوڭىلىنەن شىعاتىن سياقتى ەدى, الايدا وسىدان بىرنەشە اي بۇرىن قوستاناي قالالىق اكىمدىگىنىڭ مەملەكەتتىك اكتيۆتەر جانە ساتىپ الۋ ءبولىمى سوتقا جۇگىنۋ ارقىلى جوعارىدا اتالعان سەرىكتەستىكتى سەنىمدى باسقارۋ قۇقىعىنان ايىرىپ, 30 جىلعا جاسالعان كەلىسىمشارتتى مەرزىمىنەن بۇرىن بۇزۋدى تالاپ ەتتى. ءبىرىنشى ساتىداعى سوت ماسەلەنى «توبىل ترانستىڭ» پايداسىنا شەشىپ بەرگەن. بىراق بۇل سوتتىڭ شەشىمىنە قالالىق اكىمدىك نارازىلىق ءبىلدىرىپ, شاعىم ءتۇسىرىپ, اپەللياتسيالىق ساتىدا جەڭىپ شىقتى.
وسىلايشا, جاڭا كونكۋرس جاريالانىپ, توراپتىڭ جاڭا يەسى تابىلعانشا, بۇكىل ترانسپورتتىق جۇكتەمەنى بىرنەشە مەنشىك يەسى بار نەگىزگى تەمىرجول اتقاراتىن بولىپ شەشىلگەن. وسى تۇستا جۇك تاسۋ قىزمەتىنىڭ ءتاريفى مەن نەگىزگى تەمىرجولدىڭ جۇك جونەلتۋ قابىلەتىنە قاتىستى ەكى بىردەي ماسەلە بوي كوتەرىپ شىعا كەلدى. ماسەلەنىڭ ءمانىسى مىنادا: جاڭا جۇكتەمە قوسىلسا, م8 دەپ اتالاتىن نەگىزگى تەمىر جولدىڭ جۇكتەمەسى بۇرىنعىسىنان بىرنەشە ەسە ارتىپ كەتەدى. وسىنىڭ سالدارىنان ۆاگوندار قالاعا كىرەتىن جانە شىعاتىن جولداردا ۇزاق ۋاقىت كەزەك كۇتىپ, قاڭتارىلىپ تۇرىپ قالۋى مۇمكىن. كاسىپكەرلەردىڭ سوزىنشە, مۇنىڭ ارتى وزدەرى باسقارىپ وتىرعان ءىرى كاسىپورىنداردىڭ جۇمىسىنا كەدەرگى كەلتىرىپ, باسى ارتىق شىعىنعا ۇشىراتادى.
«قتج جۇك تاسىمالى» جشس فيليالىنا قاراستى كىرەبەرىس جولدار ءبولىمىنىڭ جەتەكشى ينجەنەرى اسەل قايرالاپوۆانىڭ ايتۋىنشا, تىعىرىققا تىرەلگەن جاعدايدان شىعۋدىڭ جالعىز جولى – جاڭا كونكۋرس جاريالانىپ, تەمىرجولدىڭ جاڭا يەسى انىقتالعانشا, ونى پايدالانۋ تۋرالى ۋاقىتشا نۇسقاۋلىق ازىرلەۋ قاجەت. ماماندار ارالىق ۋاقىت جارتى جىلعا دەيىن سوزىلادى دەيدى. وعان دەيىن «توبىل ترانس» ءوز قىزمەتىن جالعاستىرا بەرەدى. مۇنىمەن وبلىستىق ترانسپورتتىق باقىلاۋ ينسپەكتسياسى دا كەلىسىپ وتىر. وڭىرلىك كاسىپكەرلەر پالاتاسىنىڭ ديرەكتورى دانيار سماعۇلوۆتىڭ سوزىنشە, بۇل ماسەلەنىڭ رەتتەلۋىن پروكۋراتۋرا دا ءوز باقىلاۋىنا الۋعا ءتيىس.
