بەرەكەگە كەنەلتەدى

رەسپۋبليكامىزدا اياق استىنان تەڭگەنىڭ باعام وزگەرتۋىنەن كوپتەگەن كاسىپورىندار مەن مەكەمەلەردىڭ ابىگەرگە ءتۇسىپ, ۇرەيلەنگەنىنە قاراماستان, اۋىل شارۋاشىلىعىنداعى جاعداي بىرقالىپتى. قاشاندا ەلباسىنىڭ ساياساتىن قولداپ, شىدامدىلىقتى العاشقى ورىنعا قويا بىلەتىن اۋىل ەڭبەككەرلەرى اقش دوللارىنىڭ شارىقتاي ءوسۋىنىڭ سوڭى جاقسىلىققا جەتكىزەر دەگەن سەنىمدە. راسىن ايتقاندا, 11 اقپان­داعى جايسىز حابار اۋىل ادام­دارىنىڭ دا جۇرەگىن اۋىرتتى. كوڭىلدەرىنە قاياۋ ءتۇسىردى. الايدا, ءوزىنىڭ ەلىن, جەرىن بارىنەن ارتىق كورەتىن, وتانىن شىن سۇيەتىن اۋىل پاتريوتتارىنىڭ سا­بىر­لىلىق ساقتاۋى باسقالارعا تاماشا ۇلگى دەۋگە لايىقتى مىسال. جاسىراتىنى جوق, كەيىنگى كەزدە اۋىل شا­رۋاشىلىعى ونىمدەرىنىڭ باعاسى قۇنسىزدانا باستادى. ەت, ءسۇت, ت.ب. ونىمدەر سىرتتان تاسىمالدانىپ, وتاندىق ونىمدەر دۇكەن سورەلەرى مەن قويمالاردا ۇزاق جاتىپ قالاتىندى شىعاردى. ەگەر دە ۇلتتىق بانك توراعاسى قايرات كەلىمبەتوۆتىڭ سوزىنە سەنسەك, الداعى ۋاقىتتا يم­پورت­تىق ونىمدەر مەن ىشكى ءونىم­­دەر ءوزارا باسەكەگە ءتۇسىپ, ءناتي­جەسىندە سوڭعىسىنا مارتەبە بەرىل­مەكشى. اگرارلىق كەشەننىڭ ەڭبەككەرلەرى دە وسى ءبىر قۇندى پىكىرگە دەن قويىپ, ءبىر-بىرلەرىن شىدامدىلىققا شاقىرعانداي. – تەڭگە باعامىنىڭ ناقتى­لانۋى, – دەدى بىزگە «قاز­اگر­و­قارجى» اق-تىڭ ارنايى وكىلى رينات كە­مەشوۆ, – قازاقستاندىق اگرار­شى­لاردىڭ ۇستانىمىن نىعايتا ءتۇس­پەك. ولار ونىمدەرىن ىشكى ساۋ­داعا دا, الىس شەتەلدەر مەن تمد ەلدەرىنە دە كوپتەپ جونەلتەتىن بولادى. ءبىزدىڭ مەملەكەتىمىز اۋىل شارۋاشىلىعىنا سۋبسيديا ءبو­لۋدى جالعاستىرا بەرمەك. جانار-جاعارماي, استىق, ءسۇت ونىمدەرى, تاعى باسقالار سۋبسيديا الادى. قىسقاسى, ءونىم وندىرۋشىلەردىڭ شىعىنى بۇرىنعى كورسەتكىشپەن قالا بەرەدى. ال تابىس كەرى­سىنشە وسەدى. بۇل – وتاندىق ءوندى­رۋشىلەردىڭ ونىمدەردى مولىنان شىعارىپ ساتۋىنا كەڭ جول اشىلدى دەگەن ءسوز. رينات كەمەشوۆ «قازاگرو­قارجى» اق-تان نەسيە العان اۋىل شارۋاشىلىعى ونىمدەرىن وندىرەتىن كاسىپكەرلەرگە تەڭگە­نىڭ باعامىنىڭ تۇزەتىلۋى ەش اسەر ەتپەي­تىندىگىن, جاسالىنعان كەلىسىم­شارتقا ەشقانداي قايتا ەسەپتەسۋ جاسالىنبايتىندىعىن ەسكەرتتى. ساراپشىنىڭ پىكىرىنشە, ۇكىمەت وتاندىق اگرارشىلاردىڭ شەتەل تەحنيكالارىن ساتىپ الۋىنا دا ادەتتەگىدەي جەڭىلدىكتەردى ساقتاپ قالۋعا ءتيىس. – شىندىعىندا, شەتەلدەردەن اكەلىنەتىن ءسۇت ونىمدەرىنىڭ قۇنى بىزدىكىنەن ارزان بولعاندىقتان از زارداپ شەككەن جوقپىز, – دەيدى رەسپۋبليكاداعى ءسۇت وندىرەتىن اقتوبەلىك ءىرى كاسىپورىن – «ايس» جشس باس ديرەكتورى قۋانىش يششانوۆ, – ەندى شەتەلدىك ونىمدەر قىمباتتاۋعا ءتيىس. ولارمەن باسە­كەگە تۇسەتىن كەز كەلدى. ءبىز ءوندى­رەتىن ءسۇت جانە ءسۇت ونىمدەرى ەكولوگيالىق تازا بولىپ سانالادى. ءبىر عانا پروبلەما بار, ول – استىق پەن جەمگە باعانىڭ ءوسىپ كەتۋى مۇمكىن. بۇل ورايدا, ۇكىمەتتىڭ قامقورلىعىنا سەنەمىز. ويتكەنى, مەملەكەت ءبىزدى ءاردايىم قولداپ كەلدى. ق.يششانوۆ يمپورتتىق تەحنيكالار مەن قۇرال-جابدىقتاردىڭ, ولارعا قاجەتتى بولشەكتەردىڭ باعا­سى وسەتىندىگىن ەسكەردى. الاي­دا, بەل­گىلى بيزنەسمەن بۇل ورايدا كوپ شىعىنعا باتپاسپىز دەپ ۇمىتتە­نەدى. قاراعاندى قالاسىنا تاياۋ ورنالاسقان «توپار جىلىجايلارى» جشس ديرەكتورى الەكساندر زابيروۆپەن حابارلاسقانىمىزدا, بىلىكتى باسشى تەڭگەنىڭ قۇنسىز­دانۋىنا قىنجىلىس تانىتپادى. كەرىسىنشە, ءوز كاسىپورنى وندىرەتىن ونىمدەردىڭ كوپتەپ ساتىلاتىنىن بىلايشا ءتۇسىندىردى: – تەڭگەنىڭ قۇنسىزدانۋى ءبىز ءۇشىن قاۋىپتى ەمەس, – دەدى ول بىزگە. – بىرىنشىدەن, يمپورتتىق ءونىم­دەرمەن باسەكە باستالادى. ءبىزدىڭ ءونىمىمىز ساپالى. سون­دىقتان شەتەل ونىمدەرىنىڭ ورنىن اۋىستىرامىز دەپ ويلايمىز. اۋىل شارۋاشىلىعىندا ەسەلى ەڭبەك ەتىپ جاتقان كاسىپكەرلەردىڭ پىكىرلەرىن كوپتەپ كەلتىرۋگە دە بولار ەدى. بىراق, ولاردىڭ وي­لا­رى ءبىر ارناعا توعىسادى. تەڭگەنىڭ قۇنسىزدانۋى اۋىل شارۋا­شى­لىعى ونىمدەرىنە زيانىن تيگىزبەك ەمەس. سوندىقتان, ولار ەرتەڭگى كۇنگە دەگەن نىق سەنىم­مەن, حا­لىقتى ساپالى دا قىمبات ەمەس ونىمدەرىمەن بەرەكەگە كەنەلتە بەرەمىز, دەيدى ءبىراۋىزدان. تاڭات قوجمانوۆ.