جىل باسىنان بەرگى 9 ايدا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە جالپى 73 قىلمىستىق ءىس تىركەلسە, سىبايلاس جەمقورلىق ساناتىنا جاتاتىنى – 55. سونىڭ ىشىندە اۋىر قىلمىستارى – 51, اۋىرلىعى ورتاشا – 18, ونشا اۋىر ەمەس – 4. جالپى تىركەلگەن قىلمىستاردىڭ ىشىندە پاراقورلىق قىلمىسى – 37, جىمقىرۋ دەرەگى – 25, وكىلەتتىگىن اسىرا پايدالانۋ – 3. سونىمەن قاتار جەرگىلىكتى اتقارۋشى ورگاندار سالاسى جانە وعان قاراستى قۇرىلىمدىق بولىمشەلەر قىزمەتكەرلەرى تاراپىنان شاعىن جانە ورتا كاسىپكەرلىك قىزمەتىنە زاڭسىز ارالاسۋدىڭ 7 دەرەگى انىقتالىپ, 7 ازامات ۇستالىپ, ەكەۋى سوتتالدى. اتالعان كەدەرگىلەردىڭ ورىن الۋىنا مەملەكەتتىك كىرىستەر باسقارماسى, پوليتسيا قىزمەتى, سانيتارلىق-ەپيدەميالىق جانە اكىمشىلىك مەكەمەلەر تۇرتكى بولعان. جوعارىداعى دەرەكتەردى سىبايلاس جەمقورلىققا قارسى ءىس-قيمىل اگەنتتىگى تۇركىستان وبلىسى بويىنشا دەپارتامەنتىنىڭ باسشىسى حاكىم كوشقاليەۆ قوعامدىق كەڭەستە جاساعان بايانداماسىندا كەلتىردى. جىل باسىنان بەرى جۇيەلى سىبايلاس جەمقورلىقتىڭ دەرەگى انىقتالعان, مەملەكەتتىك باعدارلامالار بويىنشا 35 قىلمىس تىركەلگەن. وبلىستىق دەڭگەيدەگى ءبىرىنشى باسشىلارعا قاتىستى – 3, ال اۋدان جانە قالالىق دەڭگەيدە 7 قىلمىس انىقتالعان. سىبايلاس جەمقورلىققا قارسى مادەنيەتتى قالىپتاستىرۋ باعىتىندا 900 مىڭعا جۋىق ادامدى قامتىعان 1887 ءىس-شارا وتكىزىلىپتى. ال Protecting business andinvestments جوباسى اياسىندا جالپى سومماسى 684 782 492 274 تەڭگە بولاتىن 76 ءىرى ينۆەستور مەن كاسىپكەرلەر دەپارتامەنت تاراپىنان سىبايلاس جەمقورلىققا قارسى سۇيەمەلدەۋگە الىنعان. جوبالىق كەڭسەگە كاسىپتىك سۋبەكت وكىلدەرىنەن 72 شاعىم مەن وتىنىشتەر ءتۇسىپ, ولاردىڭ بارلىعىنىڭ زاڭدى قۇقىقتارى قالپىنا كەلتىرىلدى. «ساپالى جول» جوباسى اياسىندا 10 اۋدان, قالادا جول ساپاسىنا مونيتورينگ جۇمىستارى جۇرگىزىلىپ, 44 كەمشىلىك انىقتالىپتى. انىقتالعان كەمشىلىكتەر نەگىزىندە ءتيىستى مەكەمەلەرگە ۇسىنىس حات جولدانىپ, بۇگىنگە دەيىن 36 كەمشىلىك قايتا قالپىنا كەلتىرىلگەن. «سىبايلاس جەمقورلىققا قارسى مونيتورينگ سپورتشىلاردىڭ جارىستارعا جانە وقۋ-جاتتىعۋ جيىندارىنا قاتىسۋى بويىنشا, سونداي-اق جەرگە ورنالاستىرۋ جوباسىن دايىنداۋ سالالارىنا قاتىستى جۇرگىزىلدى. ەنگىزىلگەن ۇسىنىستاردىڭ سانى – 9. بيىلعى 9 ايدا وندىرىستە جالپى 227 قىلمىس بولعان, دەپارتامەنت قىزمەتكەرلەرىنىڭ تىركەگەنى – 104. وندىرىسپەن 125 قىلمىس اياقتالىپ, نەگىزگى 20 قىلمىستىق ءىس سوت قاراۋىنا جولدانعان. قالعان 105-ءى قىلمىس قۇرامىنىڭ بولماۋىنا بايلانىستى قىسقارتىلعان. جالپى سوتقا جولدانعان قىلمىستىق ىستەر بويىنشا 560 ملن تەڭگە زالال كەلتىرىلىپ, 336 ملن تەڭگەسى وندىرىلگەن», دەدى حاكىم كوشقاليەۆ.
سونداي-اق دەپارتامەنت باسشىسى قوعامدىق كەڭەس جۇمىسىنا تۇراقتى قاتىسىپ, ەل پىكىرىمەن ساناسا ارەكەت ەتۋگە ءازىر ەكەندىگىن ءبىلدىردى. سىبايلاس جەمقورلىقپەن كۇرەستە ازاماتتاردى كوتەرمەلەۋدىڭ جاڭا سارالانعان جۇيەسى ەنگىزىلگەنى ءمالىم. ياعني مۇنداي جاعدايلار تۋرالى حابارلاعان ادام اقشالاي قاراجاتپەن ىنتالاندىرىلىپ قانا قويماي, مەملەكەتتىڭ قورعاۋىندا بولادى. دەپارتامەنت باسشىسىنىڭ ايتۋىنا قاراعاندا, قىلمىستىڭ اشىلۋىنا جاردەمدەسكەن 9 تۇلعاعا 1 762 690 تەڭگە كولەمىندە اقشالاي سىياقى بەرىلگەن.
