ەلورداداعى اۋماعى 90 گەكتار جەردى الىپ جاتقان ساياباقتىڭ ءدال قاسىنان تۇرعىن ءۇي كەشەنىن تۇرعىزۋعا جەر الۋ وڭاي شارۋا ەمەس. وسى ۋاقىتقا دەيىن مۇنداعى جەر تەلىمدەرى تەك BI group, «بازيس ا», «وردا ينۆەست» سەكىلدى ەڭ سەنىمدى قۇرىلىس كومپانيالارىنا عانا بەرىلىپ كەلىپ ەدى. وسى كومپانيالار ساياباقتى اينالدىرا ءۇي سالىپ, بوس جەر قالدىرماۋعا اينالعان. تەك ءبىر عانا ۇلكەن جەر تەلىمى بوس جاتاتىن. تۇرعىندار «بۇل جەرگە قالالىق پوليتسيا باسقارماسىنىڭ عيماراتى تۇرعىزىلادى ەكەن» دەپ اڭگىمە قوزعايتىن. ەكىنشى بىرەۋلەر «ءاي, مۇنداي كەرەمەت جەر پوليتسيا باسقارماسىنا تيە قويار ما ەكەن, ونىڭ ورنىنا تۇرعىن ءۇي مە ەكەن, جوق الدە ساۋدا ورنى ما, ايتەۋىر تابىس تابۋعا لايىق باسقا بىردەمە سالىناتىن بولىپتى» دەپ سوڭعى ەستىگەن جاڭالىعىن جەتكىزەتىن.
بيىلدان باستاپ وسى بوس جاتقان تەلىم قورشالىپ, بۇرقىلداتىپ سىنالار قاعىلا باستادى. كىم سالىپ جاتىر, نە سالىپ جاتىر, ەشكىمگە بەلگىسىز ەدى. ادەتتەگىدەي قۇرىلىستىڭ پاسپورتى دا ىلىنگەنجوق. ەشكىم ەشتەمەنى بىلە الماي ءدۇدامال بولدى. نەگىزىندە قۇرىلىستى جۇرگىزۋشى ۇيىم, زاڭ تالابى بويىنشا اينالاسىنداعى تۇرعىندارمەن كەزدەسىپ, قوعامدىق تىڭداۋ وتكىزۋى, نە سالىپ جاتقان نىسانىن ءتۇسىندىرۋى, ماڭايدا تۇراتىن حالىقتىڭ پىكىرىن ءبىلۋى كەرەك. بىراق مۇنىڭ جىلتى دا بولعان جوق.
«مىلقاۋ قۇرىلىستى» جۇرگىزۋشى ۇيىم وسى ادەتىمەن ءىسىن ودان ءارى جالعاستىرا بەرەر مە ەدى, كىم ءبىلسىن, ەگەر ىسكە ءدال وسى قۇرىلىس قاسىنداعى «پارك اۆەنيۋ» تۇرعىن ءۇي كەشەنىندە پاتەرى بار ادۆوكات جانات مالگەلدينوۆ ارالاسپاسا. ول ءتيىستى ورىندارعا حابارلاسا ءجۇرىپ, سالىنىپ جاتقان قۇرىلىس تۋرالى «قۇپيا» اقپاراتتاردى جيناستىرعان. ءسويتىپ قۇرىلىستى جۇرگىزۋشى BINA Group, KCG Invest كومپانيالارىنىڭ ارەكەتتەرىن زاڭسىز دەپ تاۋىپ, ولارعا قۇرىلىس جۇرگىزۋگە رۇقسات بەرگەن نۇر-سۇلتان قالاسى اكىمىنىڭ 2020 جىلعى 29 قىركۇيەكتەگى №510-2026 قاۋلىسىنىڭ كۇشىن جويۋ جونىندە سوتقا تالاپ ارىز تۇسىرگەن.
سوت بارىسىندا انىقتالعانداي, باسىندا بۇل جەر تەلىمىنىڭ قالالىق پوليتسيا دەپارتامەنتىنىڭ عيماراتىن سالۋعا بولىنگەنى راس ەكەن. بارلىعى ەكى گەكتار اۋماققا سالىناتىن عيماراتتىڭ جالپى اۋماعى 27 722 شارشى مەتردى قۇراعان. العاش 2012 جىلى قابىلدانعان بۇل شەشىم بىرنەشە رەت وزگەرتىلگەن. سوڭىندا جالپى اۋماعى 75 800 شارشى مەتردى قۇرايتىن 1 864 ادامعا ارنالعان تۇرعىن ءۇي كەشەنى سالىناتىن بولىپ شىققان.
وسى رەتتە ايتا كەتەتىن ءبىر جاعداي, اتالعان تۇرعىن ءۇي كەشەنى سالىنادى دەپ جوسپارلانعان ماڭايدا مەكتەپ پەن بالاباقشا تاپشى. ماسەلەن, وسى ماڭايعا ەڭ جاقىن ورنالاسقان 1 400 وقۋشىعا ارنالعان №84 مەكتەپتە قازىر 3 مىڭ وقۋشى وقىپ جاتىر. ال «دارىن» دەپ اتالاتىن جالعىز بالاباقشا بوس ورىننىڭ جوقتىعىنان قاسىندا تۇراتىن تۇرعىنداردىڭ بالالارىن قابىلداۋدان باس تارتۋدا.
تاعى ءبىر ەسكەرە كەتەتىن جاعداي, بوتانيكالىق باق ورنالاسقان اۋماق – قالانىڭ ەڭ ءبىر كورنەكتى جەرى بولىپ ەسەپتەلەتىندىكتەن مۇندا كوبىنەسە بيزنەس كلاستى ۇيلەر, جوق دەگەندە كومفورت كلاستى ۇيلەر سالىنۋدا. ونى تاجىريبەلى قۇرىلىس كومپانيالارى ساپاسىن جاقسى ەتىپ, تالاپ دارەجەسىندە سالۋدا. ۇلكەن تۇرعىن ءۇي كەشەنىن تۇرعىزعان كەزدە ىشىندە مەكتەپ پەن بالاباقشانىڭ بولۋىنا دا ءمان بەرۋدە. ال «مىلقاۋ قۇرىلىستى» جۇرگىزۋشى BINA Group, KCG Invest كومپانيالارىنىڭ قانداي تۇرعىن ءۇيدى جوسپارلاپ وتىرعانى دا بەلگىسىز. ءبىر بىلگەنىمىز, سالاتىن تۇرعىن ءۇي كەشەنىنىڭ پاركينگى ونداعى ادامدار سانىنا مۇلدەم سايكەس كەلمەيتىن بولىپ شىقتى. مەكتەپ پەن بالاباقشا سالۋ دەگەنىڭىز ويعا دا الىنباعان. سوندا 12-14-16-18 قاباتتان تۇراتىن بيىك ۇيلەردى شاعىن اۋماققا قاپتاتىپ سالىپ, حالىقتى تۇرعان جەرىمەن قىزىقتىرىپ پاتەرلەردى ساتىپ, اۋماقتى ىعى-جىعى ادامدارعا تولتىرىپ, «ءىس ءبىتتى, قۋ كەتتى» دەگەندەي تايىپ تۇرماق پا؟! وسى تۇرعىن ءۇي كەشەنىنەن پاتەر العاندار ەرتەڭ بالالارىن قايدا وقۋعا اپارادى؟
ءبىر جاقسىسى, ءىستى قاراعان نۇر-سۇلتان قالاسىنىڭ مامانداندىرىلعان اۋدانارالىق اكىمشىلىك سوتى قالا اكىمدىگىنىڭ شەشىمىن زاڭسىز دەپ تاۋىپ, ونىڭ كۇشىن جويدى.
ەلباسىمىز ەلوردانى حالىققا جايلى ەتىپ سالۋعا ۇمتىلىپ, ۇنەمى ءوز باقىلاۋىندا ۇستاعانى بەلگىلى. پرەزيدەنت قاسىم-جومارتتوقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن ەنگىزگەنى ءمالىم. وقيعانىڭ توبىقتاي ءتۇيىنى, وسى قاعيدات جۇمىس ىستەي باستاپتى. ادۆوكات جانات مالگەلدينوۆتىڭ سوتتاعى جەڭىسىن سونىڭ ءبىر ايقىن دالەلى دەپ قابىلداۋعا بولادى. تەك اركىم ءوز قۇقىن دۇرىس قورعاي ءبىلۋى كەرەك سەكىلدى.
