بۇل ماسەلەنى ءماجىلىستىڭ جالپى وتىرىسىندا دەپۋتات ءجاميلا نۇرمانبەتوۆا كوتەردى. ول كوروناۆيرۋسقا قارسى ۇجىمدىق يممۋنيتەتتى قالىپتاستىرۋ ءۇشىن ۆاكتسيناتسيالاناتىن كونتينگەنتتى 9,9 ميلليوننان 11,4 ميلليون ادامعا دەيىن كوبەيتۋ تۋرالى شەشىم قابىلدانعانىن ەسكە سالدى. الايدا 2022-2024 جىلدارعا ارنالعان رەسپۋبليكالىق بيۋدجەت جوباسىندا ۆاكتسينا ساتىپ الۋعا جانە رەۆاكتسيناتسياعا قاراجات كوزدەلمەگەن.
سۇراققا جاۋاپ بەرە وتىرىپ, ۆيتسە-پرەمەر ەرالى توعجانوۆ قاراجات «ۇكىمەت رەزەرۆىنەن» بولىنەتىنىن حابارلادى.
«ددۇ ۇسىنىمدارى بويىنشا, 20-دان استام ەلدىڭ تاجىريبەسىن ەسكەرە وتىرىپ, ءبىز قاراشانىڭ ءۇشىنشى ونكۇندىگىنەن باستاپ قايتا ۆاكتسيناتسيالاۋدى جۇرگىزۋ تۋرالى شەشىم قابىلدادىق. التى ايدان كەيىن بەلسەندى ەمەس ۆاكتسينا ءۇشىن جانە توعىز ايدان كەيىن ۆەكتورلىق ۆاكتسينا العاندار ءۇشىن رەۆاكتسيناتسيا باستالادى. ءبىرىنشى كەزەكتە مايداندا جۇرگەندەر - دارىگەرلەر, مۇعالىمدەر, سونداي-اق 60 جاستان اسقان ازاماتتار ۆاكتسيناتسيالانادى. ولار جىل سوڭىنا دەيىن ۆاكتسينامەن تولىق قامتاماسىز ەتىلەدى», دەپ ءتۇسىندىردى پرەمەر-ءمينيستردىڭ ورىنباسارى.
ونىڭ ايتۋىنشا, قالعان ازاماتتارعا كەزەڭ-كەزەڭىمەن ەكپە جاسالاتىن بولادى. 2022 جىلى شامامەن 2 ملن ادامدى ەگۋ جوسپارلانۋدا. ال 2023-2024 جىلدارى ەپيدجاعدايعا قارايتىن بولادى.
«قازاقستاننىڭ بارلىق حالقى ۆاكتسينامەن, ونىڭ ىشىندە رەۆاكتسيناتسيامەن قامتاماسىز ەتىلەدى», دەپ تۇيىندەدى توعجانوۆ.
