پىكىر • 18 قازان، 2021

وڭىرلەردەگى جەمقورلىقتى اۋىزدىقتاۋ امالى

272 رەت كورسەتىلدى

مەملەكەت باسشىسى قاسىم-جومارت توقاەۆ بىلتىرعى جولداۋىندا مەملە­كەت­ت­ىك اپپارات قىزمەتكەرلەرىنىڭ سانىن 25 پايىزعا قىسقارتۋ مەرزىمىن جەدەل­دەتۋدى تاپسىرا وتىرىپ: «ۇنەم­دەلگەن قارا­جاتتىڭ ەسەبىنەن قالعان قىزمەت­كەر­لەردىڭ جالاقىسىن كوبەيتەتىن بولامىز. ەڭبەكاقىسى از مەملەكەتتىك قىز­مەتتىڭ قو­عام ءۇشىن پايداسىنان زيانى كوپ»، دەگەن بولاتىن. پرەزيدەنتتىڭ بۇل ءسوزى قازىرگى ءومىر شىندىعىنا سۇيەنىپ اي­تىل­عان­دى­عى­نا شاك جوق.

بۇدان ون شاقتى جىل بۇرىن وبلىستىق قۇقىق قورعاۋ ورگاندارىنىڭ ءبىرىن باسقاراتىن تانىسىمنان ءوز ارىپتەستەرىنىڭ جەمقورلىعىن نەگە تىيا الماي وتىرعاندىعىن سۇراعانىمدا ول: «جۋىردا ءبىزدىڭ دەپارتامەنتتىڭ ىشكى قاۋىپسىزدىك قىزمەتىنىڭ باستىعى ءبىر جاس وفيتسەردىڭ ءوزى تەكسەرىپ جاتقان كاسىپكەردەن 100 مىڭ تەڭگە دامەتكەنى جايلى «سيگنال» تۇسكەنىن ايتتى. قىزمەتىن ءمىنسىز اتقارىپ، كەلەشەگىنەن ءۇمىت كۇتتىرىپ جۇرگەن اعا لەيتەنانت ەدى. ونىڭ تەرىس جولعا تۇسۋىنە نە سەبەپ بولعانىن بىلگىم كەلىپ: «وزىنە سەز­دىر­مەي اڭدىپ، كاسىپكەردەن العان اقشا­نى قانداي ماقساتقا جۇمساعانىن انىقتاپ، ماعان ايتىڭىز»، دەپ تاپسىردىم. ەرتەڭىنە قاۋىپسىزدىك قىزمەتىنىڭ باستىعى الگى وفيتسەر­دىڭ كاسىپكەردەن سۇراعان پارانى الىسىمەن دۇكەندەرگە بارىپ، بالالارىنا كيىم-كەشەك پەن تاماق العاندىعىن، سودان كەيىن ەشقايدا بۇرىلماي، ۇيىنە ورالعانىن باياندادى. كابينەتىمە شاقىرىپ سويلەسكەنىمدە ول ايەلى كىشكەنتاي ەكى بالاسىن كۇتىپ ۇيدە وتىرعاندىقتان، ءبىر ءوزىنىڭ تابىسى وتباسىسىن اسىراۋعا جەتپەيتىنىن ايتىپ، جىلامسىرادى. ونى ۇستىنەن قىلمىستىق ءىس قوزعاپ، تۇرمەگە وتىرعىزۋعا ءداتىم بارماي، قىزمەتتەن بوساتۋمەن شەكتەلدىم. ءبىز­دىڭ سالاداعى جەمقورلىقتىڭ ءبىر سەبەبى وسى. قىزمەتكەرلەرگە لايىقتى جالاقى تولەمەيىنشە، بۇل كەلەڭسىزدىكتىڭ تامىرىنا بالتا شابۋىمىز قيىن»، دەپ قىنجىلعان. جەمقورلىقپەن كۇرەستەگى وسى ماڭىزدى فاكتوردى ەسكەرگەن مەملەكەت باسشىلىعى كەيىنگى جىلدارى قۇقىق قورعاۋ ورگاندارى قىزمەتكەرلەرىنىڭ جالاقىسىن ەداۋىر كوبەيتتى. سونداي-اق ءوز دەڭگەيلەرىندە شەشىم قابىلداۋ قۇزىرەتى بەرىلگەن مەملەكەتتىك ساياسي قىزمەتشىلەر مەن «ا» كورپۋسىنداعى مەملەكەتتىك اكىمشىلىك قىز­مەت­شىلەرگە دە لايىقتى جالاقى تولەنىپ وتىر. الايدا وڭىرلەردەگى قاتارى قالىڭ «ب» كورپۋسى مەم­لە­كەتتىك اكىمشىلىك قىزمەت­شىلەرىنىڭ جا­لا­قىسى تومەن بولىپ، مۇنىڭ ءوزى مەملە­كەت­تىك قىزمەتتىڭ بەدەلىن ءتۇسىرىپ قانا قوي­ماي، جەرگىلىكتى بيلىك ورگاندارىندا كادر تۇ­راق­تا­ماۋىنىڭ بەلەڭ الۋىنا جانە سىبايلاس جەمقورلىقتىڭ تامىر جايۋىنا اكەلىپ سوققاندىعى انىق.

بۇدان بىرەر جىل بۇرىن ءوز كاسىبىن اشىپ، وزىق تەحنولوگيامەن ساپالى مەتالل بۇ­يىمدار شىعارىپ، اتى شىعا باستاعان جاس كاسىپكەر ءبىر مەگاپوليستىڭ ىشىندەگى اۋداننىڭ اكىمىنىڭ ورىنباسارىنا جولىعىپ: «مەن سىزدەر جاريالاعان تەندەرگە قاتىسىپ، پايدالانۋ مەرزىمى 25 جىلعا دەيىن جەتەتىن، مىقتى ماتەريالدان جاسالعان ءارى ءساندى ورىندىقتارىمىزدى قالا كوشەلەرىنە قويۋعا ۇسىنباقشىمىن»، دەگەن ەكەن. سوندا الگى شەنەۋنىك: «اينالايىن، سوندا مەن كەلەسى تەندەردى وتكىزۋدى شيرەك عاسىر كۇتىپ وتىرامىن با؟ تەك جالاقىما قاراپ وتىرسام، بالا-شاعامدى قالاي قامتاماسىز ەتەمىن؟»، دەگەن ەكەن بەتى بۇلك ەتپەستەن. وسى مىسالدان-اق، پرەزيدەنت ايتقانداي، ەڭبەكاقىسى از مەملەكەتتىك قىزمەتتىڭ قوعام ءۇشىن پايداسىنان زيانى كوپ ەكەندىگى اڭعارىلادى.

ەندى، مىنە، مەملەكەت باسشىسىنىڭ تاپسىرماسى ورىندالىپ، شىلدە ايىنان باستاپ جەرگىلىكتى اتقارۋشى ورگانداردىڭ «ب» كورپۋسىنداعى مەملەكەتتىك اكىمشىلىك قىزمەتشىلەرىنىڭ جالاقىسى ايتارلىقتاي ءوسىرىلدى. مىسالى، بۇرىن اۋىلدىق وكرۋگ اكىمى اپپاراتىنىڭ جەتەكشى مامانى مەملەكەتتىك قىزمەتتەگى ەڭبەك وتىلىنە قاراي ايىنا 84-114 مىڭ تەڭگە ارالىعىندا جالاقى العان بولسا، ەندى ونىڭ مولشەرى ەكى ەسەدەي ارتتىرىلىپ، 210 مىڭ تەڭگەگە جەتكىزىلگەن. اۋداندار مەن قالالار اكىمدەرىنىڭ ورىنباسارلارى وسىعان دەيىن نەبارى 150-203 مىڭ ارالىعىندا جالاقى الىپ، ۇنجىرعالارى تۇسىڭكىرەپ جۇرگەن بولسا، قازىر ايىنا 512 مىڭ تەڭگە تابىس تا­­­ۋىپ، كوڭىلدەرى كوتەرىلگەن. 182-دەن 246 مىڭ تەڭگەگە دەيىنگى ايلىعىن مىسە تۇتپاي جۇرگەن وبلىستىق باسقارمالار باسشىلارى ەندى 688 مىڭ تەڭگە الىپ، جۇمىسقا ىنتالارى دا ەسەلەپ ارتقان كورىنەدى. وسىلايشا، ەلىمىزدە ىسكە اسىرىلىپ جاتقان رەفورمالاردىڭ نەگىزگى سالماعى يىقتارىنا ءتۇسىپ جۇرگەن وڭىرلەردەگى مەملەكەتتىك قىزمەتشىلەردىڭ مەرەيى ءوسىپ وتىر. «الماقتىڭ دا سالماعى بار» دەمەكشى، ەندى سالىق تولەۋشىلەردىڭ مەملەكەتتىك قىزمەتتەگى جەمقورلىقتىڭ جويىلۋىن قاتاڭ تالاپ ەتۋگە حاقىسى بار.

سوڭعى جاڭالىقتار

جەكپە-جەكسىز وتكەن العاشقى جىل

كاسىپقوي بوكس • بۇگىن، 09:08

«دينامودان» جەڭىلدى

حوككەي • بۇگىن، 07:34

كرەاتيۆتى كىتاپ دۇكەنى

ايماقتار • بۇگىن، 07:33

جانبوتا جاراپ تۇر

سپورت • بۇگىن، 07:27

اقىن تۇتىنعان كەسە

تاريح • بۇگىن، 07:24

ۇلى جامبىل مۇراسى ۇلىقتالدى

رۋحانيات • بۇگىن، 00:33

ۇقساس جاڭالىقتار